ប្រធានគម្រោងផលិតរថយន្តអគ្គិសនីរបស់ Apple ត្រៀមដើរចេញពីក្រុមហ៊ុន

2016-01-24 19:22:34
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Steve Zadesky ដែលជាអ្នកទទួលខុសត្រូវគម្រោងផលិតរថយន្តអគ្គិសនីរបស់ក្រុមហ៊ុន Apple Inc រយៈពេល២ឆ្នាំចុងក្រោយ ត្រៀមចាកចេញពីក្រុមហ៊ុនហើយ។ នេះបើយោងតាមការចុះផ្សាយរបស់ Wall Street Journal កាលពីថ្ងៃសុក្រ។

Zadesky ដែលពីមុនធ្វើការក្នុងក្រុម iPod និង iPhone ត្រៀមចាកចេញពីក្រុមហ៊ុនដែលខ្លួនធ្លាប់ធ្វើការ១៦ឆ្នាំ ដោយបញ្ជាក់ថាមានហេតុផលផ្ទាល់ខ្លួន មិនទាក់ទងនឹងសមត្ថភាពធ្វើការងារនោះឡើយ។ យ៉ាងណាក្ដី ប្រភពដដែល មិនទាន់បញ្ជាក់ថាលោកនឹងចាកចេញពីក្រុមហ៊ុននៅថ្ងៃណានៅឡើយនោះទេ។

គិតត្រឹមថ្ងៃសុក្រ ឈ្មោះរបស់លោកក្នុង LinkedIn នៅតែដាក់ថាធ្វើការនៅ Apple ដដែល មិនទាន់ផ្លាស់ប្ដូរនោះទេ។ ចំណែកឯខាងក្រុមហ៊ុនវិញ បានបដិសេធមិនអត្ថាធិប្បាយជុំវិញបញ្ហានេះទេ។

កន្លងមក Apple មិនធ្លាប់ប្រកាសថានឹងផលិតរថយន្តអគ្គិសនីនោះទេ ប៉ុន្តែក្រុមហ៊ុនបាននាំយកអ្នកជំនាញខាងរថយន្តជាច្រើននាក់មកធ្វើការ ដែលមានមកពីក្រុមហ៊ុនផលិតរថយន្តធំៗ ដូចជា Ford និង Mercedes-Benz ជាដើម។

ចំណែកឯនាយកប្រតិបត្តិក្រុមហ៊ុន លោក Tim Cook ក៏ធ្លាប់ទៅមើលដល់ក្រុមហ៊ុន BMW ទៀតផងកាលពីឆ្នាំ២០១៤ រីឯនាយកជាន់ខ្ពស់ជាច្រើននាក់ទៀត បានទៅទស្សនកិច្ចនៅក្រុមហ៊ុនផលិតរថយន្ត Leipzig ដើម្បីសិក្សាពីការផលិតរថយន្តអគ្គិសនី i3។ នេះបើយោងតាមប្រភពពី Reuters។