បញ្ហា៥លើរថយន្ត ដែលអ្នកអាចហិតក្លិនក៏ដឹង

2016-01-26 13:15:17
ចំនួនមតិ 0 | ចំនួនចែករំលែក 0

ចន្លោះមិនឃើញ

រថយន្តមួយចំនួនក្រៅពីមានក្លិនក្រអូបឈ្ងុយក៏អាចនឹងមានបង្កប់ក្លិនដទៃទៀតដែលអ្នកប្រើប្រាស់មិនគួរមើលរំលង ព្រោះក្លិនទាំងនោះអាចឲ្យពួកគេដឹងបានថារថយន្តមានបញ្ហាត្រង់ផ្នែកអ្វីមួយ។

អង្គការមិនរកប្រាក់ចំណេញ Car Care Council បានណែនាំពីក្លិនរថយន្តដែលបង្ហាញថាមានបញ្ហាមានដូចខាងក្រោម៖

១. ក្លិនឆ្ងៀមប្រេង៖ អាចមានន័យថាប្រេងម៉ាស៊ីនរថយន្តបានធ្លាយ ហូរកាត់លើប្រព័ន្ធបញ្ចេញផ្សែង។ ដើម្បីពិនិត្យថាធ្លាយឬយ៉ាងណាលើផ្លូវថ្នល់ ឬមើលថាមានផ្សែងហុយចេញពីតំបន់ម៉ាស៊ីនរថយន្តឬទេ។

២. ក្លិនប្រេងសាំង៖ ទំនងជាសញ្ញានៃការលេចធ្លាយសាំងនៅផ្នែកណាមួយនៃរថយន្ត។ ត្រូវចាំថាការលេចធ្លាយនៃសាំងអាចបង្កើតជាគ្រោះថ្នាក់អគ្គីភ័យបាន ដូចនេះគួរពិនិត្យឲ្យបានប្រុងប្រយ័ត្ន។

៣. ក្លិនទឹកសឺរូផ្អែមៗ៖ អាចជាសញ្ញាថារថយន្តអ្នកធ្លាយចេញនូវទឹកបញ្ចុះកម្ដៅម៉ាស៊ីនពីផ្នែកណាមួយ ដែលទាក់ទងនឹងប្រព័ន្ធបញ្ចុះកម្ដៅម៉ាស៊ីន។

៤. ក្លិនដូចក្រណាត់ឆេះ៖ អាចជាសញ្ញានៃបញ្ហាហ្វ្រាំង ដូចនេះគួរពិនិត្យហ្វ្រាំងភ្លាមៗ ជាពិសេសពេលដែលក្លិននេះភាយឡើងនៅពេលកំពុងបើកបរ។

៥. ក្លិនពងទាស្អុយ៖ ក្លិននេះអាចមានន័យថា ប្រព័ន្ធបម្លែងកាតាលីករមានបញ្ហា ដោយវាមិនបម្លែងសារធាតុអ៊ីដ្រូហ្សែននៅក្នុងប្រព័ន្ធបញ្ចេញផ្សែង ទៅជាសារធាតុស្ពាន់ធ័រឌីអុកស៊ីតបានត្រឹមត្រូវនោះទេ។ ក្លិននេះក៏អាចកំណត់បានថាម៉ាស៊ីនរថយន្ត ដំណើរការខុសប្រក្រតី៕

ចុចអាន៖ ស្លាកសញ្ញាលើតាប្លូមួយចំនួនដែលបង្ហាញថារថយន្តអ្នកមានបញ្ហា

ប្រែសម្រួល៖ ហៃ សុខហេង ប្រភព៖ CarCare