ទម្លាប់អាក្រក់៦យ៉ាងរបស់អ្នកបើកបរ ធ្វើឲ្យឡានខូចដោយមិនដឹងខ្លួន

2016-01-27 13:15:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ការចេះបើកបររថយន្តតែមួយមុខវាមិនទាន់គ្រប់គ្រាន់នៅឡើយនោះទេ ដោយត្រូវស្វែងយល់ពីរបៀបថែទាំរថយន្ត ព្រមទាំងសិក្សាពីកត្តាបណ្ដាលឲ្យរថយន្តខូច ជាបន្ថែមទៀត។ ខាងក្រោមជាទម្លាប់អាក្រក់របស់អ្នកបើកបរមួយចំនួនតូច ដែលអាចធ្វើឲ្យរថយន្តខូចដោយមិនដឹងខ្លួន៖

១. មិនប្រើប្រាស់ហ្វ្រាំងដៃ

មិនថានៅពេលចតរថយន្តនៅតំបន់ជម្រាល ឬតំបន់រាបស្មើ ការចតដោយមិនប្រើប្រាស់ហ្វ្រាំងដៃ គឺវាផ្ដល់សម្ពាធទាំងអស់ទៅឲ្យប្រអប់លេខ។ វត្ថុម្យ៉ាងគត់ស្ថិតនៅក្នុងប្រអប់លេខដែលអាចទប់លំនឹងរថយន្តបាននោះគឺម្ជុលដ៏តូចមួយដែលគេហៅថា "parking pawl”។ ដូចនេះតាមរយៈការប្រើប្រាស់ហ្វ្រាំងដៃពេលចតវានឹងជួយបន្ធូរសម្ពាធរបស់ប្រអប់លេខ និងអាចបន្ថែមអាយុកាលប្រអប់លេខបានកាន់តែយូរ។

២. មិនទាន់ឈប់ឡានស្រួលបួលក៏ប្ដូរលេខភ្លាមៗ

នៅខាងក្នុងប្រអប់លេខគឺមានលេខជាច្រើន ដូចនេះពេលដែលប្ដូរលេខដោយមិនបានឈប់ឲ្យត្រឹមត្រូវ នោះហាក់បីដូចជាធ្វើឲ្យលេខបំពេញតួនាទីជាហ្រ្វាំងទប់ ដែលនេះផ្ដល់សម្ពាធដ៏ធំមួយទៅឲ្យប្រព័ន្ធដ៏តូចមួយ។ ការធ្វើដូចនេះក៏អាចបណ្ដាលឲ្យខូចខាតដងបង្វិលរថយន្ត ដែលជាឧបករណ៍មួយមាននាទីបញ្ជូនថាមពលទៅឲ្យកង់។

៣. ជិះចុះចំណោតដោយជាន់ហ្វ្រាំងជាប់

ការជិះចុះចំណោតដោយជាន់ហ្វ្រាំងជាប់អាចជាវិធីសាស្ត្រមួយដ៏សុវត្ថិភាពបំផុត ប៉ុន្តែការជិះលើផ្លូវចម្ងាយឆ្ងាយអាចបណ្ដាលឲ្យស្បែកហ្វ្រំងឡើងកម្ដៅនិងខូចគុណភាពបាន។ ដូចនេះគួរតែជិះដោយលែងហ្វ្រាំងម្ដងម្កាលប្រសិនបើអាន។

៤. លាងសម្អាតម៉ាស៊ីនឡានដោយកម្លាំងទឹកខ្លាំង

ម៉ាស៊ីនរថយន្តមួយចំនួនប្រសិនបើលាងសម្អាតដោយប្រើប្រាស់កម្លាំងទឹកខ្លាំង អាចធ្វើឲ្យផ្នែកមួយចំនួននៃម៉ាស៊ីនរងការប៉ះពាល់បាន ដូចជារហូតសន្ទះការពារជាដើម។

៥. មិនខ្វល់ពីសំឡេងរថយន្ត

ជួនកាលសំឡេងដែលបញ្ចេញដោយរថយន្តមួយចំនួន អាចឲ្យអ្នកដឹងថារថយន្តកំពុងតែមានបញ្ហាត្រង់ផ្នែកអ្វីមួយ ហេតុនេះពេលបើកបររថយន្តគួរចំណាយពេលស្ដាប់សំឡេងរថយន្ត ជាជាងស្ដាប់ចម្រៀង ឬវិទ្យុ។

៦. ទ្រនិចសាំងធ្លាក់ដល់បាតនៅតែបើកទៅមុខ

លោក Ray Sparrow អ្នកជំនាញខាងជាងម៉ាស៊ីនមួយរូបបានឲ្យដឹងថា ប្រសិនបើរថយន្តអស់សាំងហើយ នៅតែបើកទៅមុខទៀត បញ្ហានឹងកើតមានឡើងចំពោះម៉ាស៊ីនរថយន្ត។ សម្រាប់រថយន្តដែលមានម៉ាស៊ីនប្រើប្រាស់ប្រេងម៉ាស៊ូត បញ្ហាអាចកើតមានឡើងលើគ្រឿងបង្គំនៃម៉ាស៊ីនរថយន្ត ដោយអាចមានការខូចខាតបានព្រោះតែម៉ាស៊ីនសំបូរទៅដោយខ្យល់ជាជាងប្រេងម៉ាស៊ូត។

ចំពោះរថយន្តដែលមានម៉ាស៊ីនប្រើប្រាស់ដោយសាំងវិញ មានភាពប្រសើរជាងម៉ាស៊ីនម៉ាស៊ូតបន្តិច។ ប៉ុន្តែមានចំណុចមួយដែលអ្នកគួរព្រួយបារម្ភនោះគឺ ក្នុងករណីដែលអ្នកបានចាក់សាំងបំពេញរួចហើយក៏ម៉ាស៊ីននៅតែមិនអាចបញ្ឆេះបានដែរ។ បញ្ហានេះអាចមកពីការស្ទះខ្យល់។ ខ្យល់ដែលមាននៅក្នុងធុងសាំងធ្វើឲ្យសាំងមិនអាចបង្ហូរទៅកាន់ម៉ាស៊ីនបាន ដែលនេះត្រូវការជំនួយពីជាងជួសជុល ហើយវាអាចចំណាយប្រាក់អស់ច្រើនជាងតម្លៃសាំងដែលអ្នកបានសន្សំសំចៃទៅទៀត៕

ចុចអាន៖ បញ្ហា៥លើរថយន្ត ដែលអ្នកអាចហិតក្លិនក៏ដឹង

ប្រែសម្រួល៖ ហៃ សុខហេង ប្រភព៖ StanleySubaru