ស្រឡាញ់បែបណាទើបត្រូវចិត្តអូន?

2016-02-04 16:53:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្ញុំមិនយល់ថា ហេតុអ្វីមនុស្សស្រឡាញ់គ្នាចាំបាច់ឈ្លោះគ្នាធ្វើអី? បើចង់បែកគ្នាដដែលហេតុអ្វី ពីដំបូងស្រឡាញ់គ្នា? រឿងរ៉ាវនិងសំណួរជាច្រើន កំពុងតែចាក់ដោតពេញដោយការចងចាំរបស់ខ្ញុំ។

ខ្ញុំបានស្គាល់នាង ព្រោះពួកយើងនៅភូមិជាមួយគ្នា។ អ្នកផ្សេងថានាងស្អាត តែសម្រាប់ខ្ញុំ នាងមិនសូវស្អាតឡើយតែកិរិយាមារយាទរបស់នាងល្អ។ នាងសុភាពរាបសា ស្លូតបូត ទោះរៀនមិនសូវពូកែតែនាងពូកែកិច្ចការផ្ទះ។អ្វីដែលខ្ញុំស្រលាញ់នោះគឺការចេះទទួលកំហុស ចេះសុំទោសនិងកែប្រែវាឡើងវិញ។

ដំបូងខ្ញុំគិតថា ស្រឡាញ់នាងលេងៗ ប៉ុន្តែដោយសារចំណុចល្អនាងបែបនេះ ទើបខ្ញុំស្រឡាញ់នាងនិងចង់បាននាងជាគូអនាគត។ ពួកយើងចាប់ផ្ដើមទាក់ទងគ្នានៅថ្ងៃទី ៨ ខែកុម្ភៈ ឆ្នាំ ២០១៤ ហើយកាលនោះពួកយើងស្រឡាញ់គ្នាខ្លាំងណាស់។

យាយស្វិត នាងតែងតែស្ដាប់ខ្ញុំគ្រប់ពេល ពេលដែលខ្ញុំប្រាប់ថាមិនចូលចិត្តអ្វីមួយនាងនឹងសម្របតាមខ្ញុំ មិនចូលចិត្តពណ៌សក់របស់នាង នាងក៏ប្ដូរតាមខ្ញុំដែរ។ ពួកយើងតែងតែជួបគ្នារាល់ថ្ងៃ ទាល់តែបានជួបមុខគ្នារាល់ថ្ងៃទើបខ្ញុំសប្បាយចិត្ត ធ្វើការងារផ្សេងកើត។ មានពេលមួយដែលខ្ញុំអត់លុយនាងបបួលខ្ញុំញ៉ាំអី តែខ្ញុំប្រកែកមិនទៅព្រោះគ្មានលុយ ដោយយកលេសថាមិនស្រួលខ្លួន។ នាងក៏សួរនាំប្រុងទិញថ្នាំឱ្យតែខ្ញុំប្រកែក ទើបនាងទិញរបស់ញ៉ាំមកផ្ទះខ្ញុំ។

ពេលនោះខ្ញុំសប្បាយចិត្តណាស់ប៉ុន្តែខ្ញុំមានអារម្មណ៍ថាខ្មាសខ្លួនឯងហើយក៏បានប្រាប់ពីមូលហេតុទៅនាងថា «បងមិនទៅព្រោះតែបងអត់លុយ»។ បន្ទាប់មកនាងក៏និយាយថា «ហេតុអ្វីបងគិតអញ្ចឹង? បើបងអត់លុយអូនអ្នកចេញក៏បានដែរ មិនមែនចាំបងឯងអ្នកចេញរហូតណា!»។ នាងនិយាយបែបនេះរឹតតែធ្វើឱ្យខ្ញុំស្រឡាញ់នាងលើសដើម។

ពួកយើងប្រើពាក្យផ្អែមល្ហែមជាមួយគ្នា ទាំងការនិយាយទាំងការផ្ញើសារ។ ក្រោយមកខ្ញុំដឹងថានាងធ្លាប់រស់នៅជាមួយសង្សារចាស់នាងរួចហើយមុនពេលជួបខ្ញុំ ប៉ុន្តែខ្ញុំមិនប្រកាន់ឡើយ ព្រោះខ្ញុំស្រឡាញ់ចិត្តរបស់នាង មិនមែនសំដៅលើខ្លួនប្រាណរបស់នាងឡើយ។ ហើយពួកយើងចាប់ផ្ដើមនៅជាមួយគ្នាដូចជាប្ដីប្រពន្ធដែរ ប៉ុន្តែមិនមែនរស់ក្នុងផ្ទះជាមួយគ្នារហូតទេគ្រាន់តែចំណាយពេល១ទៅ៤ម៉ោងក្នុងមួយថ្ងៃ។ រយៈពេលមួយឆ្នាំជាងស្នេហាយើងហាក់ដូចជាផ្អែមល្ហែម រហូតដល់ថ្នាក់អ្នកផ្សេងមិនជឿថាយើងធ្លាប់ឈ្លោះគ្នាឡើយ។ ចានក្នុងរាវតែងប៉ះទង្គិច រយៈពេលកន្លះឆ្នាំចុងក្រោយនេះនាងហាក់ដូចជាប្លែកណាស់។ ពីមុនខ្ញុំទូរសព្ទសួរនាំនាងថានៅណា? ហើយញ៉ាំបាយឬនៅ? នាងតែងតែឆ្លើយតប និយាយពាក្យល្អដាក់ខ្ញុំ តែឥឡូវនាងបែរជានិយាយថា ហេតុអ្វីក៏ខ្ញុំរំខានម្ល៉េះរកតែធ្វើការអ្វីមិនកើត?

នៅពេលដែលនាងឈ្លោះគ្នាជាមួយខ្ញុំធ្វើចរិតប្លែកដាក់ខ្ញុំហើយបានបិតទូរសព្ទ ខ្ញុំក៏បានទូរសព្ទទៅសួរអ្នកផ្ទះនាង នាងបន្ទោសថាហេតុអ្វីក៏យករឿងនាងដើរនិយាយក្រោយខ្នងអញ្ចឹង? ខ្ញុំពិតជាមិនយល់ថាហេតុអ្វីសុខៗនាងផ្លាស់ប្ដូរស្ទើរតែ ១០០ ភាគរយអញ្ចឹង? របស់ដែលខ្ញុំទិញឱ្យនាង នាងធ្លាប់ធ្វើឱ្យបាត់ តែរបស់ដែលសង្សារចាស់នាងឱ្យ នាងថែរក្សាបានយ៉ាងល្អ។

(រូបតំណាង)

រាល់ល្ងាចនាងតែងតែមកជួបមុខខ្ញុំ តែថ្ងៃមួយខ្ញុំបានណាត់នាងញ៉ាំអី ពេលទៅដល់កន្លែងណាត់នាងថា នាងមិនបានមកទេ នាងត្រូវទៅខួបកំណើតមិត្តភ័ក្ដិ។ ទាំងដែលនាងបានណាត់ជាមួយខ្ញុំមុនហើយ។ប៉ុន្តែនាងបានប្រាប់ខ្ញុំថានាងទៅតែមួយភ្លែតទេហើយនាងបានប្រាប់ខ្ញុំថានាងមិនចង់ទៅប៉ុន្មានទេ ហើយនាងប្រាប់ខ្ញុំទៀតថានាងនឹងមកជួបខ្ញុំ តែអ្វីដែលគួរឱ្យខឹងជាងនេះទៀត គឺដល់ពេលនាងទៅដល់នាងមិនបាន call មកប្រាប់ខ្ញុំទេ ដល់ពេលខ្ញុំចាំយូរពេកខ្ញុំក៏បាន call ទៅនាង។

ខ្ញុំ៖ អូននៅណា? នាង៖ កំពុងនៅខួបកំណើតគេ! ស្មានតែធ្វើធំតាមពិតមកញ៉ាំអីនៅមាត់ទន្លេសោះ!

បន្ទាប់មកនាងបានប្រាប់ខ្ញុំថានាងអត់បានមកជួបខ្ញុំទេព្រោះម៉ូតូបែកកង់ហើយនាងជិះឡានមកជាមួយមិត្តភ័ក្ដិ។ ខ្ញុំមានអារម្មណ៍ថាអន់ចិត្តណាស់ខ្ញុំបានប្រាប់នាងថា «បើគេធ្វើតូចទេអូនឯងខ្ចីម៉ូតូរបស់មិត្តភ័ក្ដិអូនឯងមកជួបបងតិចមកព្រោះបងនឹកអូនឯងណាស់!»។ តែនាងបែរជានិយាយថា «អត់ទៅទេ!»។

ខ្ញុំក៏ខឹងហើយនិយាយថា៖ «អូនឯងសន្យាជាមួយបងមុនហើយបានប្រាប់បងថាអូនមិនចង់ទៅទៀតតែពេលនេះអូនបែរមកនិយាយបែបនេះដាក់បងទៅវិញ មិនត្រឹមតែប៉ុណ្ណោះអូនឯងអោយបងចាំអស់រយៈពេល ២ម៉ោងទៀត!»។ ពេលនោះហើយជាពេលដែលពួកខ្ញុំក៏បានឈ្លោះខ្លាំងហើយក៏បានបែកគ្នាលើកទីមួយ។

ប៉ុន្តែដោយក្ដីស្រលាញ់និងមិនទាន់អស់ចិត្ត ខ្ញុំបានតេទៅនាងប៉ុន្តែនាងបានបិទទូរសព្ទ។ ថ្ងៃបន្ទាប់ខ្ញុំក៏បានតេទៅនាងទៀតប៉ុន្តែទូរសព្ទរបស់នាងនៅតែបិទដដែល ទើបខ្ញុំសំរេចចិត្តតេទៅអ្នកផ្ទះរបស់នាង ហើយអ្នកផ្ទះរបស់នាងទៅប្រាប់អោយបើកទូរសព្ទ និងពន្យល់ទើបគេព្រមបើក។ ពេលនោះខ្ញុំបាននិយាយនិងអង្វរអោយគេមកជួបខ្ញុំហើយនិយាយគ្នាពេលនោះនាងក៏បានយល់ព្រមហើយក៏បាននិយាយត្រូវគ្នាជាមួយខ្ញុំវិញ។

មិនបានមួយខែផងពួកខ្ញុំក៏មានរឿងឈ្លោះគ្នាមួយទៀតគឺខ្ញុំដឹងថាគេមានទំនាក់ទំនងជាមួយសង្សារចាស់របស់គេគឺតាំងពីពេលដែលខ្ញុំឈ្លោះគ្នាលើកទីមួយមកម្ល៉េះ ហើយខ្ញុំក៏បានសួរគេថាមានទំនាក់ទំនងជាមួយគ្នាយូរនៅគេបានប្រាប់ខ្ញុំថា២ទៅ៣ថ្ងៃហើយគេក៏បានសុំទោសខ្ញុំ។ ដោយក្ដីស្រលាញ់ខ្ញុំក៏បានលើកលែងទោសអោយគេ។ ដោយពេលវេលាផ្លាស់ប្ដូរ មនុស្សក៏ផ្លាស់ប្ដូរដែរមួយរយៈពេលចុងក្រោយនេះគេមិនដែលមើលឃើញពីអ្វីដែលខ្ញុំធ្វើល្អចំពោះគេម្ដងនោះទេគេមើលឃើញតែរឿងអាក្រក់របស់ខ្ញុំតែប៉ុណ្ណោះហើយគេបានតែលើកពីចំណុច ល្អរបស់សង្សារចាស់របស់គេតែប៉ុណ្ណោះ ដោយសារតែមនុស្សចង់បែកទៅហើយខ្ញុំធ្វើអ្វីក៏ខុសដែរ រឿងតូចធ្វើអោយក្លាយជារឿងធំ។ នៅថ្ងៃទី២៣ខែមករា ពួកខ្ញុំក៏បានឈ្លោះគ្នាដោយគេលើកយករឿងពីមុនយកមកនិយាយនិងនិយាយថា «ខ្ញុំទាក់ទងជាមួយយើងជិត២ឆ្នាំនេះគ្មានអ្នកណាម្នាក់ចូលចិត្តយើងនោះទេសូម្បីតែមិត្តភ័ក្ដិរបស់ខ្ញុំក៏គ្មានអ្នកណាចូលចិត្តអ្នកឯងដែរ!»។

ហើយពេលនោះពួកខ្ញុំក៏បានឈ្លោះគ្នាម្ដងទៀតខ្ញុំខឹងនាងខ្លាំងណាស់ ទើបទូរសព្ទទៅសួរនាងតើនាងអស់ចិត្តពីខ្ញុំឬនៅ? បើអស់ចិត្តម៉េចមិនសុំខ្ញុំបែក? នាងថានាងបានសុំខ្ញុំបែកច្រើនដងហើយ។ ខ្ញុំឮហើយធ្វើអ្វីមិនត្រូវឡើយ ចុងក្រោយពួកយើងនិយាយពាក្យបែកដាក់គ្នា ហើយទីបំផុតស្នេហានេះចប់ទាំងខ្ញុំមិនទាន់បានត្រៀមខ្លួន។

លុះស្អែកឡើង លេខទូរសព្ទដែលនាងធ្លាប់ប្រើ គឺយកអត្តសញ្ញាណប័ណ្ណរបស់ខ្ញុំទៅទិញ ទើបខ្ញុំតេទៅក្រុមហ៊ុនឱ្យបិតលេខនោះ ព្រោះគ្មានហេតុផលអីដែលខ្ញុំត្រូវឱ្យនាងយកឈ្មោះខ្ញុំទៅប្រើប្រាស់ទៀតទេ។ រួចហើយនាងក៏បានបង្ហោះ Status ដោយប្រើពាក្យមិនសមរម្យ ទោះមិនបញ្ចេញឈ្មោះក៏ខ្ញុំដឹងថានាងសំដៅដល់អ្នកណាដែរ។

មិនតែប៉ុណ្ណោះនាងក៏បាន block ខ្ញុំចោលហើយ unblock សង្សារចាស់របស់នាងវិញ។ ហេតុផលនេះធ្វើឱ្យខ្ញុំដឹងហើយថា នាងប្រហែលមានចិត្តចង់ត្រឡប់ទៅរកសង្សារចាស់របស់នាងវិញ។ ខ្ញុំជឿទៀតថានាងប្រហែលជាចង់បានសង្សារដែលមានរូបរាងសង្ហាជាងខ្ញុំ ព្រោះខ្ញុំធ្លាប់ឮសម្ដីមួយចំនួនដែលចេញពីមាត់មិត្តភ័ក្ដិរបស់នាងថា «គួរតែរកសង្សារណា រូបរាងគ្រាន់មើលជាងហ្នឹងទៅ!»។

បែកគ្នារួចនាងមើលទៅសប្បាយចិត្តណាស់ ព្រោះនាងបង្ហោះថា នាងឡើងបីគីឡូ ចំណែក ខ្ញុំវិញពិបាកចិត្តស្រក់ទឹកភ្នែកស្ទើររាល់ថ្ងៃ។ ខ្ញុំតែងតែនឹកឃើញរាល់អនុស្សាវរីយ៍ដែលពួកយើងធ្លាប់មានជាមួយគ្នា នាងចង់មើលរឿងអ្វីខ្ញុំ download ទុកឱ្យនាងមើល ពេលនាងឈឺប្រចាំខែក៏ខ្ញុំរត់ទៅទិញរបស់មនុស្សស្រីឱ្យនាងចង់ញ៉ាំអ្វីខ្ញុំទិញហ្នឹង ថ្ងៃខួបកំណើត តែងមានកាដូឱ្យនាង។ ចុះហេតុអ្វីក៏នាងដាច់ចិត្តម្ល៉េះ?

មនុស្សប្រុសភាគច្រើនយកភាពបរិសុទ្ធរបស់នារីជាសំខាន់ តែសម្រាប់ខ្ញុំទទួលយកគ្រប់បែបយ៉ាងរបស់នាងរួមទាំងប្រវត្តិរបស់នាង ពីមុនយ៉ាងណាក៏ខ្ញុំមិនខ្វល់ សំខាន់ខ្ញុំស្រឡាញ់។ ខ្ញុំធ្លាប់ឈ្លោះគ្នាជាមួយម៉ាក់ប៉ា ដោយសារតែនាងព្រោះពួកគាត់មិនពេញចិត្តនឹងប្រវត្តិរបស់នាងឡើយ តែខ្ញុំជម្នះរហូតដល់ពួកគាត់លែងឃាត់។ ខ្ញុំជឿថាបើនាងតស៊ូជាមួយខ្ញុំ តែកន្លះឆ្នាំទៀតពួកយើងនឹងបានរៀបការជាមួយគ្នា រស់នៅជាមួយគ្នាពេញមុខពេញមាត់ជាមិនខាន។

ឥឡូវនេះខ្ញុំគិតថា អ្វីដែលនាងធ្វើវាសាហាវចំពោះខ្ញុំខ្លាំងណាស់! ហេតុអ្វី? ខ្ញុំដឹងថា នាងបានឆាតជាមួយសង្សារចាស់នាង ដោយមើលទៅសប្បាយចិត្តណាស់ សង្សារចាស់នាងសួរថាហេតុអ្វីក៏សប្បាយចិត្តម្ល៉េះ? នាងថា «មកពីបានបែកគ្នាជាមួយអាជ្រូក!»។ ពាក្យនេះជាពាក្យដែលខ្ញុំស្អប់បំផុតក្នុងឆាកជីវិត ហើយនាងក៏ដឹងច្បាស់ដែរថាខ្ញុំស្អប់អ្នកណាដែលហៅខ្ញុំបែបនេះ តែទីបំផុតនាងខ្លួនឯងប្រើពាក្យបែបនេះនៅពីក្រោយខ្នងខ្ញុំ។

ខ្ញុំគិតថាចង់ឱ្យនាងត្រឡប់វិញមុនថ្ងៃ ៨ កុម្ភៈជាថ្ងៃដែលយើងស្រឡាញ់គ្នា តែពេលនេះខ្ញុំដឹង ហើយ នាងមិនចង់មករកខ្ញុំវិញទេ ប៉ុន្តែខ្ញុំនៅតែរងចាំថ្ងៃនោះមកដល់ ។ តែខ្ញុំនៅតែឆ្ងល់ចង់សួរទៅមនុស្សស្រីគ្រប់គ្នាថា បើអ្នកជានាងវិញតើអ្នកធ្វើបែបណា? មនុស្សប្រុសម្នាក់ខំស្មោះនាងប៉ុណ្ណឹងហើយហេតុអ្វីក៏នាងធ្វើបែបនេះ? ពាក្យចុងក្រោយដែលខ្ញុំចង់និយាយប្រាប់នាង «បងនៅស្រឡាញ់អូនបារម្ភពីអូន ហើយបងចង់និយាយពាក្យដែលបងធ្លាប់និយាយមុនពេលចូលគេង good night ប្រពន្ធសំឡាញ់ បងស្រឡាញ់អូន!»៕

អត្ថបទ៖ តាម៉ាប់

ចុចអាន៖ កើតមកជាអ្នកក្រខុសមែនទេ?

មានរឿងរ៉ាវចង់ចែករំលែក សូមផ្ញើមកកាន់ e-mail: kong.chanvanneng@sabay.com

ព័ត៌មានបន្ថែមសូមទូរសព្ទមកកាន់លេខ ០១០ ៧០០ ៧២៧