ចូលចិត្តលេងភ្លើងឡានញឹកញាប់ ប្រយ័ត្នខុសបច្ចេកទេសនាំទុក្ខធំដាក់ខ្លួន

2016-02-15 16:12:27
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកបើកបរមួយចំនួន ពិសេសស្ទាវៗតែងចូលចិត្តលេងភ្លើងឡានអួតគ្នាទៅវិញទៅមកតែពេលខ្លះមិនដឹងថាការលេងភ្លើេងខុសបច្ចេកទេស នាំឱ្យមានគ្រោះថា្នក់ផ្សេងៗពេលធ្វើដំណើរ។

និយាយពីការតុបតែងភ្លើងឡានខុសបច្ចេកទេស លោក វង្ស គីម ហួត ម្ចាស់ហ្ការ៉ាស់ច្នៃឡានល្បីឈ្មោះ VKH នៅភ្នំពេញបានឱ្យដឹងថា គ្រោះថា្នក់ជាយថាហេតុដែលកើតឡើងដោយសារ ការតភ្លើងខុសក្បួនខ្នាតត្រឹមត្រូវនោះ គឺអាចធ្វើឱ្យរថយន្តឆេះពេលត្រូវបើកបរផ្លូវឆ្ងាយជាដើម។

បើតាមបទពិសោធន៍បើកហ្ការ៉ាស់ច្នៃឡានរយៈពេលជាង ១០ឆ្នាំមកនេះ លោកគីម ហ៊ួត បានបង្ហើបព័ត៌មានរសើបមួយថា ករណីមួយក្នុងចំណោមករណីជាច្រើនទៀតដែលធ្វើឱ្យរថយន្តឆេះពេលត្រូវបើកបរផ្លូវឆ្ងាយ នោះគឺដោយសារជាងតភ្លើងរថយន្តមួយផ្នែកតូច ប្រើខ្សែភ្លើងតតាមផ្ទះមកតុបតែងភ្លើងរថយន្តឱ្យអតិថិជន។

ម្ចាស់ហ្ការ៉ាស់រូបនេះបន្តថា ខ្សែភ្លើងតតាមផ្ទះទាំងនោះពុំអាចស៊ូនឹងកម្តៅបានយូរអង្វែងនោះទេ ហើយនៅពេលរថយន្តបើកក្នុងរយៈពេលយូរ នោះនឹងអាចធ្វើឱ្យជ័រខ្សែភ្លើងរលាយឆេះតែម្តង ដែលធ្វើឱ្យមានគ្រោះថា្នក់ដល់អ្នកដំណើរក្នុងរថយន្ត។

ក្រៅពីព័ត៌មានរសើបយកខ្សែភ្លើងតផ្ទះមកតុបតែងលេងភ្លើងរថយន្ត ការលេងភ្លើងស៊ីញ៉ូខុសមាត្រដ្ឋានចរាចរណ៍ ក៏នាំបញ្ហាផងដែរ។ លោក ហ៊ួតថា ភ្លើងស៊ីញ៉ូរថយន្តខ្លះ ដូចជាភ្លើងស្តុបក្រហមសម្រាប់សម្គាល់ពេលរថយន្តត្រូវឈប់ តែម្ចាស់ឡានបែរជាលេងភ្លើងឬដូរពណ៌ទៅវិញ។

ជាងតុបតែងភ្លើងឡាន ត្រូវមានភាពស្មោះត្រង់និងបច្ចេកទេសត្រឹមត្រូវក្នុងការតភ្លើងរថយន្តឱ្យភ្ញៀវ ហើយក៏មានតួនាទីផ្តល់យោបល់ដល់ម្ចាស់រថយន្តផងដែរ មុនពេលពួកគេសម្រេចចិត្តលេងភ្លើងឡាន មិនមែនធ្វើយកតែលុយឱ្យរួចតែពីដៃនោះទេ។ ថៅកែហ្ការ៉ាស់ច្នៃឡានវ័យ ៣៤ឆ្នាំរូបនេះក្រើនរំលឹកចុងក្រោយ៕

អាន៖ វិធីសាស្ត្រធ្វើឲ្យរថយន្តមិនសូវស៊ីសាំង

អត្ថបទ៖ ប៉ែត ផាន់និត