កសិករចិនចំណាយពេល១០ឆ្នាំ សង់ផ្ទះកម្ពស់៧ជាន់ គួរឲ្យភ្ញាក់ផ្អើល

2016-02-15 16:20:43
ចំនួនមតិ 0 | ចំនួនចែករំលែក 0

ចន្លោះមិនឃើញ

កសិករជនជាតិចិនម្នាក់ បានចំណាយពេលជាង ១០ឆ្នាំ ក្នុងការសាងសង់ផ្ទះដ៏ចម្លែកមួយកន្លែងពីការតម្រៀប ដុំថ្ម ឈើ និងដីឥដ្ឋ បន្តុបលើគ្នាយ៉ាងនឹងថ្កល់ គួរឲ្យចាប់អារម្មណ៍។

កសិកររូបនេះមានឈ្មោះ Hu Guangzhou អាយុ ៥៥ឆ្នាំ រស់នៅស្រុក Linqu ខេត្តសានទុង និងបាននិយាយប្រាប់សារព័ត៌មានក្នុងស្រុកថា គាត់សង់បែបនេះគឺដើម្បីទទួលបងប្អូនប្រុសរបស់ខ្លួនត្រលប់មកវិញ ប៉ុន្តែពួកគេបានស្លាប់បាត់រយៈពេល ១០ឆ្នាំមកហើយ។

រូបរាងសំណង់អគារចម្លែកនេះ ត្រូវបានគេប្រៀបធៀបទៅនឹងអគារដ៏ល្បីឈ្មោះក្នុងរឿងតុក្កតាជប៉ុន Howl's Moving Castle ។ បុរសរូបនេះបានសង់គ្រឹះផ្ទះរយៈពេល ៥ឆ្នាំ និងបន្ថែមកម្ពស់ទៀតនៅរយៈពេល ៣ឆ្នាំបន្ទាប់។

លោកបានធ្លាក់ខ្លួនឈឺ ក្រោយពីបញ្ចប់សាងសង់ជាន់ទីពីរ ដែលធ្វើឲ្យមានការផ្អាកជាច្រើនខែ និងចុងក្រោយបានសង់បន្ត និងរហូតដល់ដំបូល។ គ្រឿងសម្រាប់សាងសង់សំខាន់ជាងគេគឺដីឥដ្ឋ និងដុំថ្ម ដែលដើរប្រមូលបានតាមរុញរទេះ នៅតំបន់ក្បែរគាត់រស់នៅ។

បងប្អូនប្រុសរបស់លោក Hu បានស្លាប់ជាងមួយទសវត្សកន្លងទៅ ប៉ុន្តែលោក Hu មានអារម្មណ៍ថាពួកគេនៅរស់នៅឡើយ ហើយថ្ងៃណាមួយពួកគេនឹងមករស់នៅក្នុងផ្ទះដែលលោកបានសង់។ កសិករដដែល តែងតែជួសជុល រុះរើ និងពង្រឹងគុណភាពសំណង់ នៅពេលទំនេរ។

គាត់តែងតែទទួលការឧបត្ថម្ភពីរដ្ឋាភិបាលក្នុងរយៈពេល ៣ខែម្ដង ព្រោះគាត់មានជីវភាពក្រខ្សត់។ សំណង់ទាំងនេះ នៅតែទាក់ទាញភ្នែកមហាជន ពេលដែលគេធ្វើដំណើរកាត់៕