អ្នកជំនាញអង់គ្លេស៖ ប្រើតែខ្មៅដៃ ក៏អាចបំបាត់អាការៈឈឺក្បាលបានដែរ

2016-02-15 18:37:48
ចំនួនមតិ 0 | ចំនួនចែករំលែក 0

ចន្លោះមិនឃើញ

បរិយាកាសមមាញឹកអាប់អួនៅកន្លែងធ្វើការ ឬសូរសម្លេងរំខានពីក្មេងៗ អាចជាសំពាធមួយធ្វើឲ្យមនុស្សមានអាការៈឈឺក្បាល។ ប៉ុន្តែមុននឹងរកថ្នាំឈឺក្បាលលេប អ្នកជំនាញខាងសុខភាពមកពីអង់គ្លេស បានបង្ហាញពីដំណោះស្រាយសាមញ្ញមួយ ដោយគ្រាន់តែ ខាំខ្មៅដៃ។

អ្នកស្រីវេជ្ជបណ្ឌិត Jane Leonard ដែលមានគ្លីនិក នៅទីក្រុង ឡុងដុង និង Menchester ប្រទេសអង់គ្លេស បានប្រាប់ទៅសារព័ត៌មាន Express Online ថា ភាពតានតឹងដូច ជា ស្ត្រែស ភាពថប់អារម្មណ៍ នឿយហត់អស់កម្លាំង និង អារម្មណ៍ពិបាកចិត្ត ជាការកត្តាបង្កឲ្យមានការអាការៈឈឺក្បាលខ្លាំង។ ដំណើរកន្ត្រាក់សាច់ដុំ មុខ ក ថ្គាម និង លលាដ៍ក្បាល ព្រមទាំង អាការៈសាច់ដុំថ្គាមឡើងរឹងណែន ឬការសង្កៀតធ្មេញកំលុងពេលគេង ក៏ជាបញ្ហាទាក់ទង ដែលបង្កឲ្យមានការឈឺក្បាលផងដែរ។

អ្នកស្រីវេជ្ជបណ្ឌិតបន្តថា ការខាំខ្មៅដៃដាក់នៅចន្លោះធ្មេញ អាចបន្ធូរអាការៈសាច់ដុំថ្គាមបាន ដែលវាជាលំហាត់ប្រាណមួយជួយឲ្យសាច់ដុំដែលមាននៃចលនាទំពាធូរស្បើយ នាំឲ្យអាការៈឈឺក្បាលបានធូរស្រាល។

ថ្គាមជាផ្នែកមួយដែលជាកន្លែងជាប់ទាក់ទងនិងផ្នែកដទៃទៀតនៃរាងកាយ ដូចជាត្រចៀក ឆ្អឹងថ្គាម និងលលាដ៍ក្បាល ជាលក្ខណៈស្មុគស្មាញ ដូចនេះ បញ្ហាណាមួយធ្វើឲ្យវាជាប់គាំង អាចបង្កឲ្យមានការឈឺក្បាល។

យ៉ាងណាក្ដី អ្នកជំនាញសុខភាពជាច្រើនទៀត បង្ហាញថា អាការៈឈឺក្បាលកើតឡើងពីមូលហេតុជាច្រើនទៀត។ ចំពោះវិធីខាងលើ គ្រាន់តែជាវិធីសាស្ត្រមួយ ក្នុងចំណោមវិធីបំបាត់អាការៈឈឺក្បាលជាច្រើនទៀត៕