អំពូលភ្លើងភ្លឺពេលថ្ងៃ រួមចំណែកកាត់បន្ថយគ្រោះថ្នាក់ចរាចរណ៍

2016-02-16 16:58:15
ចំនួនមតិ 0 | ចំនួនចែករំលែក 0

ចន្លោះមិនឃើញ

អំពូល «Daytime Running Light» ឬហៅកាត់ថា DRL គឺជាអំពូលភ្លើងពេលថ្ងៃប្រភេទ LED (Light-Emitting Diode) ស្វ័យប្រវត្តិម្យ៉ាងដែលភ្លឺដំណាលពេលដែលម៉ាស៊ីនរបស់រថយន្តបញ្ឆេះឡើង។ ពន្លឺនៃអំពូល DRL នេះវានឹងត្រូវថយពន្លឺវាដោយស្វ័យប្រវត្តិបន្តិចទៅវិញនៅពេលភ្លើងមុខត្រូវបានបំភ្លឺឡើង ដែលធ្វើឲ្យអ្នកបើកបរអាចមើលឃើញគ្នាពីចម្ងាយជាវិធីអាចជួយកាត់បន្ថយគ្រោះថ្នាក់មួយដ៏ល្អបំផុត ដូចជាការបើកបរក្នុងពេលបញ្ច្រាសទិសគ្នា ពេលមានធូលីដីហុយខ្លាំង ពេលចុះអ័ព្ទ ពេលមានផ្សែង ពេលភ្លៀងធ្លាក់ ឬពេលមេឃ ងងឹត ជាដើម។

លោក សូ ឌែនី ម្ចាស់ហាងលេងរថយន្តយីហោ Car Lovers បានប្រាប់ថា អំពូលភ្លើងប្រភេទ DRL នេះពុំមានផលរំខានដែលធ្វើឲ្យចាំងភ្នែកដល់អ្នកបើកបរតាមទិសដៅប្រឈមគ្នានោះឡើយ ដោយហេតុថា វាមានមាត្រដ្ឋានតូចល្អិតដែលរចនាយ៉ាងវិចិត្រនៅក្នុងប្រអប់ចង្កៀងមុខ។ វាប្រើប្រាស់ថាមពលអគ្គិសនីតិចបំផុត ហើយមានកាំរស្មីត្រឹមតែជាអំពូលបំភ្លឺនៅជុំវិញខ្លួនឯងប៉ុណ្ណោះ ប៉ុន្តែវាផ្ដល់លទ្ធភាពដល់អ្នកបើកបរបញ្ច្រាសទិសគ្នាអាចមើលឃើញ រថយន្តយ៉ាងច្បាស់ពីចម្ងាយអាចចូលរួមចំណែកក្នុងការកាត់បន្ថយគ្រោះថ្នាក់ចរាចរណ៍បានមួយកម្រិតធំ។

លោកបន្ថែមថា អំពូលប្រភេទនេះត្រូវបំពាក់នៅលើរថយន្តផលិតនៅបណ្ដាប្រទេសក្នុងទ្វីបអឺរ៉ុបដំបូងគេដូចជា អាល្លឺម៉ង់ ដាណឺម៉ាក ន័រវែស និងស៊ុយអែត ជាដើម។ រថយន្តស៊េរីទំនើបៗក្នុងប្រទេសកម្ពុជា បច្ចុប្បន្ននេះក៏មានបំពាក់នូវប្រភេទភ្លើងបែបនេះស្ទើរតែគ្រប់រថយន្តដែរ។

បន្តអាន៖ របៀបពិនិត្យមើលអំពូលឡេស៊ែែររថយន្តពិត ឬក្លែងក្លាយ

អត្ថបទ៖ រក្សា