លី ហួរ ទទួលអាជ្ញាប័ណ្ណ ផ្ទេរប្រាក់ និងទូទាត់ប្រាក់ ពីធនាគារជាតិ
- 2016-02-25 18:26:42
- ចំនួនមតិ 0 | ចំនួនចែករំលែក 0
លី ហួរ ទទួលអាជ្ញាប័ណ្ណ ផ្ទេរប្រាក់ និងទូទាត់ប្រាក់ ពីធនាគារជាតិ
ចន្លោះមិនឃើញ
ក្រុមហ៊ុន លី ហួរ ផេប៉្រូ ភីអិលស៊ី បានទទួលអាជ្ញាប័ណ្ណធ្វើប្រតិបត្តិការ ជាអ្នកដំណើរការតតិយភាគី (ផ្ទេរប្រាក់ និងទូទាត់ប្រាក់) ពីធនាគារជាតិនៃកម្ពុជា នៅសណ្ឋាគារសុខាភ្នំពេញ ក្រោមវត្តមានឯកឧត្តម គិម រ៉ាដា អគ្គនាយកត្រួតពិនិត្យ តំណាងដ៏ខ្ពង់ខ្ពស់របស់ ឯកឧត្ដម ជា ចាន់តូ ទេសាភិបាលធនាគារជាតិនៃកម្ពុជា និងវត្តមានរបស់ឯកឧត្ដម ហ្គី អានវានិថ អគ្គនាយក និងជាសមាជិកក្រុមក្រុមប្រឹក្សាភិបាល ធនាគារពាណិជ្ជកម្មក្រៅប្រទេសនៃកម្ពុជា FTB។
ក្នុងពិធីទទួលអាជ្ញាប័ណ្ណធ្វើប្រតិបត្តិការ ជាអ្នកដំណើរការតតិយភាគី (ផ្ទេរប្រាក់ និងទូទាត់ប្រាក់) ពីធនាគារជាតិនៃកម្ពុជា លោក ឧកញ៉ា លី ហួរ អគ្គនាយក ក្រុមហ៊ុន លី ហួរ គ្រុប បានថ្លែងថា លី ហួរ ផេរប៉្រូ ភីអិលស៊ី ក្រោមស្លាកសញ្ញាពាណិជ្ជកម្ម "លី ហួរ វេរលុយ" ជាក្រុមហ៊ុនផ្ដល់សេវាកម្មដូចជា សេវាផ្ទេរប្រាក់ដកប្រាក់ក្នុងស្រុក ចេញប័ណ្ណសមាជិក សេវាលក់កាតទូរស័ព្ទ និងសេវាទូទាត់សងប្រាក់ (ទូទាត់វិក្កយបត្រ ទឹកភ្លើង បើកប្រាក់ខែ និងទូទាត់ប្រាក់ក្នុងបរិមាណច្រើន)។
លោកបញ្ជាក់ថា ក្រុមហ៊ុនមានទស្សនវិស័យ និងបេសកកម្មច្បាស់ដូចជា ចូលរួមអភិវឌ្ឍសេដ្ឋកិច្ច និងកាត់បន្ថយភាពក្រីក្រនៅកម្ពុជា តាមរយៈការផ្ដល់សេវាទូទាត់ប្រាក់តាមភ្នាក់ងារ លី ហួរ តាមជនបទ បណ្ដាខេត្តក្រុង និងតំបន់ដាច់ស្រយាល។ ក្រុមហ៊ុនផ្ដល់ភាពងាយស្រួល ឆាប់រហ័សទាន់ចិត្ត តាមរយៈប្រើប្រាស់ប្រព័ន្ធទូទាត់ទំនើប ត្រឹមត្រូវ សុវត្ថិភាពខ្ពស់ គោរពតាមបទដ្ឋានអន្តរជាតិ និងមានសេវាកម្មធូរថ្លៃ។
នាឱកាសនោះដែរ ឯកឧត្ដម គិម រ៉ាដា បានថ្លែងឲ្យដឹងដែរថា ការសហការជាដៃគូនេះ បានចូលរួមចំណែកក្នុងការគាំទ្រការអភិវឌ្ឍវិស័យហិរញ្ញវត្ថុនៅកម្ពុជា ជាពិសេសគឺសេវាទូទាត់សាច់ប្រាក់ និងផ្ទេរប្រាក់នេះ ដែលកាលពីឆ្នាំ ២០១០ ក្រុមហ៊ុនប្រភេទនេះ មានតែ១គត់ តែរហូតមកដល់បច្ចុប្បន្ន បានកើនឡើងរហូត ៩ ក្រុមហ៊ុនរួមបញ្ចូលទាំង លី ហួរ ផេរប៉្រូ ភីអិលស៊ី។
កាលពីល្ងាចមិញនេះ ក្រុមហ៊ុន លី ហួរ ផេរប៉្រូ ភីអិលស៊ី បានទទួលអាជ្ញាប័ណ្ណលេខ តតគ ២០-០១-១៦ នៅថ្ងៃទី២០ ខែមករា ឆ្នាំ២០១៦៕
អត្ថបទ៖ ធីតា