Rolls-Royce, 2014 BMW X5 , Jaguar XJ, Audi Q7 អង្រួនទីផ្សារខ្មែរ

2014-10-24 22:48:22
ចំនួនមតិ 0 | ចំនួនចែករំលែក 0

ចន្លោះមិនឃើញ

រថយន្តទំនើបៗ Rolls-Royce, 2014 BMW X5 , Jaguar XJ, និង Audi Q7 កំពុងវាយលុកទីផ្សារនៅកម្ពុជា។

គេហទំព័រ Telegraph បានសរសេរចំណងជើងអត្ថបទធំៗថា «Rolls-Royce បើក Showroom ថ្មីនៅប្រទេសដ៏ក្រីក្របំផុតមួយលើលោក គឺ កម្ពុជា»។ ទោះបីជាបែបណា កាលពាក់កណ្ដាលឆ្នាំ២០១៤ ក្រុមហ៊ុន Rolls-Royce បានកំណត់គោលដៅសម្រាប់លក់រថយន្ត Rolls Royce គឺចំពោះទីផ្សារអតិថិជនជាអ្នកជំនួញធំៗ និងក្រុមអ្នកមានទ្រព្យសម្បត្តិស្ដុកស្ដម្ភនៅកម្ពុជា។ រថយន្ត Rolls Royce តម្លៃលក់ចាប់ផ្ដើមពី ៤៥ ម៉ឺនដុល្លារ និងអាចឈានដល់ ១ លាន ឬ ២ លានដុល្លារតាមការកុម្ម៉ង់បន្ថែមពីអតិថិជន។

បើងាកមកកាន់ក្រុមហ៊ុន BMW វិញក៏មិនណយដែរ។ 2014 BMW X5 រថយន្តប្រណិតរបស់ក្រុមហ៊ុន BMW ដែលទើបនាំចូលស្រុកខ្មែរជាងមួយខែលក់ចេញអស់ជាង ២០ គ្រឿងនៅទីផ្សារកម្ពុជា។ នេះបើតាមការអះអាងរបស់នាយកគ្រប់គ្រងក្រុមហ៊ុន Premium Auto។ 2014 BMW X5 ត្រូវបានបង្ហើបឲ្យដឹងថា មួយគ្រឿងលក់ក្នុងតម្លៃជាង ១៤ ម៉ឺនដុល្លារ។

រីឯ ក្រុមហ៊ុន RMA រឹតតែអង្រួនដល់ទីផ្សារដោះដូររថយន្តនៅកម្ពុជាទៀត។ ស្វាគមន៍ទីផ្សារថ្មីថ្មោងកាលខែកុម្ភៈ ដើមឆ្នាំ២០១៤ RMA បានបង្ហាញរថយន្តធុនប្រណិតលំដាប់ខ្ពស់ Jaguar XJ ដែលជាស៊េរីដំបូង សម្រាប់អ្នកប្រើប្រាស់នៅស្រុកខ្មែរ។ ចំណែកតម្លៃវិញអាចរកទិញបានសម្រាប់អ្នកមធ្យមរហូតដល់អ្នកមានស្ដុកស្ដម្ភប្រហែលចន្លោះពី ៧ម៉ឺនដុល្លារ ដល់ជិត២០ម៉ឺនដុល្លារ។

ដោយឡែក ក្រុមហ៊ុនផលិតរថយន្តខ្នាតយក្ស Audi អាល្លឺម៉ង់បានបង្ហាញរថយន្តស៊េរីថ្មីមួយទៀតកាលខែ កញ្ញា ថ្មីៗនេះគឺ Audi Q7 ម៉ូដែលឆ្នាំ ២០១៤។ ម៉ូដែលនេះក៏មានវត្តមានជាផ្លូវការនៅកម្ពុជា និងការបំពាក់បច្ចេកវិទ្យាថ្មីៗដែលមិនអាចមើលរំលងបាន។ ម៉ូដែល Audi Q7 មានតម្លៃខ្ទង់ ១០ ម៉ឺនដុល្លារគិតទាំងពន្ធនាំចូល៕