កុំកុំ ត្រូវទិញធានារ៉ាប់រងនៅពេលសម្ដែងជាមួយ Mike Tyson

2016-03-04 13:05:45
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅក្នុងកម្មវិធីផ្សព្វផ្សាយភាពយន្ត "Ip Man 3” ដែលនឹងត្រូវដាក់បញ្ចាំងនៅចិនដីគោកនាពេលខាងមុខ តារាសម្ដែង Donnie Yen បានចែករំលែកពីសម្ពាធនៅពេលធ្វើការរួមគ្នាជាមួយអ្នកប្រដាល់ Mike Tyson។

នៅក្នុងកម្មវិធីថ្ងៃទី០១ ខែមីនាមុននេះនៅទីក្រុងប៉េកាំង តារាសម្ដែង Donnie Yen និងអ្នកប្រដាល់ទម្ងន់ធ្ងន់ Mike Tyson បានជួបមុខគ្នាសាជាថ្មីដើម្បីផ្សព្វផ្សាយភាពយន្ត "Ip Man 3”។ កំពូលតារាក្បាច់គុន កុំកុំ បានបង្ហើបពីរឿងខ្លួនត្រូវទិញធានារ៉ាប់រងនៅពេលត្រូវថតរឿងជាមួយ Mike Tyson។ តារាសម្ដែងអាយុ ៥២ ឆ្នាំបានបញ្ជាក់យ៉ាងច្បាស់ថាលោកពិតជារងសម្ពាធខ្លាំងណាស់នៅពេលមិត្តរួមការងារគឺជាអ្នកប្រដាល់ទម្ងន់ធ្ងន់លំដាប់ពិភពលោក។

“អ្នកណាក៏ដឹងដែរថាគាត់គឺជាជយលាភីពិភពលោកដែរ។ នៅពេលត្រូវសម្ដែងមួយទល់មួយជាមួយ Mike ខ្ញុំតែងតែត្រៀមដៃទាំង២ដើម្បីរងជានិច្ច។ សួរថាខ្ញុំមានខ្លាចរងរបួសឬអត់? ប្រាកដជាមានហើយ រឿងទី១ដែលខ្ញុំធ្វើមុនគេក្រោយពេលសម្រេចចិត្តថតរឿង "Ip Man 3” នោះគឺទិញធានារ៉ាប់រង។ ក្រោយមកខ្ញុំបានពិភាក្សាជាមួយអ្នកដឹកនាំក្បាច់គុនពីឈុតឆាករបស់ខ្ញុំ ធ្វើយ៉ាងម៉េចកុំឲ្យខ្ញុំត្រូវរងរបួស។ បើទោះបីជាគាត់ជាជយលាភីលេខ១ក៏ពិតមែនតែគាត់មិនទាន់មានបទពិសោធន៍សម្ដែងច្រើននោះទេ នេះគឺជារឿងគួរឲ្យភ័យខ្លាច។ ខ្ញុំខ្លាចក្រែងតែគាត់ភ្លេចថានេះជាការសម្ដែងហើយវាយខ្ញុំមែនទែន"។ កុំកុំរំឭកឡើងវិញ។