JCI ចតុមុខ រកឃើញមេដឹកនាំថ្មីដើម្បីបន្តការងារលើកកម្ពស់សង្គម
- 2014-10-24 16:51:18
- ចំនួនមតិ 0 | ចំនួនចែករំលែក 0
JCI ចតុមុខ រកឃើញមេដឹកនាំថ្មីដើម្បីបន្តការងារលើកកម្ពស់សង្គម
ចន្លោះមិនឃើញ
ការបើកសន្និបាតប្រចាំឆ្នាំ២០១៤អស់ជាច្រើនម៉ោង នៅទីបំផុត សភាយុវពាណិជ្ជករអន្តរជាតិកម្ពុជា (JCI Cambodia) សាខាចតុមុខ បានរកឃើញមេដឹកនាំថ្មី ចូលកាន់ការងារអាណត្តិថ្មីឆ្នាំ២០១៥ ក្រោយឆ្លងកាត់ការបោះឆ្នោតពីសមាជិកក្រុមប្រឹក្សាភិបាលថ្នាក់តំបន់របស់ខ្លួន និងថ្នាក់ជាតិផង។
អ្នកស្រី ជា សុខលាង អគ្គនាយក LYS Sovannaphum Group Co., Ltd បានជោគជ័យនៅការបោះឆ្នោតដោយការលើកដៃអនុម័តពីសមាជិកក្រុមប្រឹក្សាជាន់ខ្ពស់ ដើម្បីទទួលគ្រឿងឥស្សរិយយសពេញសិទ្ធ បន្តពីអ្នកស្រី ស៊្រាត មុំសុភា ដែលជាប្រធានអាណត្តិចាស់។
អ្នកស្រី ជា សុខលាង ទទួលឥស្សរិយយសឡើងកាន់តំណែងប្រធាន
ឈរលើចក្ខុវិស័យ ផ្ដល់ឱកាសអភិវឌ្ឍ និង អំណាចដល់យុវជន ដើម្បីបង្កើតកម្លាំងនៃការផ្លាស់ប្ដូរជាវិជ្ជមានដល់សង្គម សមាជិកក្រុមប្រឹក្សានៃ JCI ចតុមុខ ដែលបានបង្កើតគម្រោងប្រយោជន៍សហគមន៍និងសង្គម ជាច្រើនតាំងពីដើមឆ្នាំ២០១៤នេះ ក៏បានរុះរើថ្មីដូចគ្នា។ តំណែងនាយកផ្នែកធំៗ ប្រមាណ១០កន្លែងជាង សុទ្ធតែជ្រើសរើសដោយការលើកដៃសម្រេចពីសមាជិកជាន់ខ្ពស់ ដើម្បីសម្រេចយុវជនមានសក្ដានុពលកាន់កាប់។
អ្នកស្រី ស៊្រាត មុំសុភា ប្រធានអាណត្តិ២០១៤ ក្នុងពេលផ្ទេរតំណែង
លោក ឈាង សុភ័ក្រ ប្រធាន JCI កម្ពុជាថ្នាក់ជាតិដែល JCI ចតុមុខ ជ្រកក្រោមនោះ លើកឡើងទៅកាន់ប្រធានទើបជ្រើសរើសបានថា ការកាន់ការងារជាថ្នាក់ដឹកនាំ គឺត្រូវមានការសម្រេចចិត្តច្បាស់លាស់ និងឲ្យស្របបេសកកម្មរបស់ JCI កម្ពុជា និង JCI ពិភពលោក។ លោកថាមេដឹកនាំជាអ្នកកាច់ចង្កូត តែកាច់ទៅណា វាទៅហ្នឹង។
«ខ្ញុំធ្លាប់ឮនឹងត្រចៀក កាលគម្រោងដាំកូនឈើ គេថាដាំធ្វើអី បើគេកាប់ច្រើនសឹងអី? ប៉ុន្តែខ្ញុំមិនខ្វល់នឹងគេរិះគន់ទេ។ ខ្ញុំធ្វើមិនដើម្បីរាប់ថាមានអ្នកកាប់ឈើប៉ុន្មាននាក់ទេ តែខ្ញុំរាប់ថាមានអ្នកដាំប៉ុន្មាន? សំខាន់យើងត្រូវធ្វើតាមឧត្ដមគតិខ្លួនឯង ដើម្បីសង្គម»។ លោក ពន្យល់ពីភាពជាអ្នកដឹកនាំម្នាក់ដែលលោកមាន។
អ្នកស្រី ជា សុខលាង ដែលអាណត្តិមុនអ្នកស្រីដើរតួសំខាន់ជា អនុប្រធានប្រតិបត្តិ JCI ចតុមុខ នោះ ថាការឡើងកាន់ភារកិច្ចកំពូលរបស់អ្នកស្រីតែឯង មិនអាចធ្វើឲ្យមានការផ្លាស់ប្ដូរដល់សង្គមប្រសើរឡើងទេ បើគ្មានសមាជិកជាន់ខ្ពស់ដទៃ និងយុវជនផ្សេងៗ ដែលជាកម្លាំងស្នូលដ៏សំខាន់។ តែអ្នកស្រីបានប្ដេជ្ញាថាប្រឹងឲ្យអស់លទ្ធភាពដើម្បីនាំឲ្យការងាររបស់ JCI ចតុមុខ កាន់តែមានប្រយោជន៍សំខាន់ៗដល់សង្គមច្រើនឡើង។
នៅឆ្នាំ២០១៤នេះ JCI ចតុមុខ បានលេចមុខធ្លោបំផុតចំណោម JCI តំបន់ដទៃដូចជា JCI មេគង្គ និង JCI ភ្នំពេញ ដែលសុទ្ធជាមែកធាងរបស់ JCI កម្ពុជា ស្ថាប័នដែលមានទំនាក់ទំនងជាមួយ JCI ទូទាំងពិភពលោក។
JCI ចតុមុខ យ៉ាងហោចណាស់សម្រេចគម្រោងធំៗរបស់ខ្លួនមួយចំនួន ក្នុងកិច្ចលើកកម្ពស់ការងារសង្គម ការសម្រាលទុក្ខលំបាកសហគមន៍ក្រីក្រ និងការពង្រីកសក្ដានុពលយុវជនឆ្នើមកម្ពុជា។
គម្រោងដែលទទួលការចាប់អារម្មណ៍ខ្លាំងមានដូចជា ការរៀបចំ ការប្រកួតពិភាក្សាសាធារណៈនិងវោហារស័ព្ទ ដែលបាននាំក្រុមយុវជនឆ្នើមខ្មែរទៅឈ្នះពាន អាស៊ីប៉ាស៊ីហ្វិក នៅ ASPAC Asia Conference នៅជប៉ុន ជាវេទិកាប្រកួតថ្វីមាត់តានតឹងជាមួយបណ្ដាយុវជនពីប្រទេសអន្តរជាតិនានា។ គម្រោង Let's Plant គឺការដាំឈើរាប់ពានដើមនៅដែនទេសចរណ៍ខេត្តព្រះសីហនុ ពោរពេញដោយការគាំទ្រពីសាធារណៈជនទូទៅ ក្រោមកម្លាំងយុវជនជំនាន់ថ្មី។ គម្រោងបង្គន់អនាម័យដើម្បីសុខភាព ចែកដល់ពលរដ្ឋក្រក្រី រួមនឹងការចាប់ដៃជាមួយ JCI ជប៉ុន នាំគម្រោងពិនិត្យសុខភាពនិងមាត់ធ្មេញដល់កុមារតូចៗនៅជនបទជាដើម៕
អត្ថបទ៖ ប៉ែន សុផាន់ណា
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
