បុរសលក់មីសាច់ដុំ៦កង់ ធ្វើឲ្យផ្អើលអស់បណ្ដាញសង្គម

2016-03-17 22:04:49
ចំនួនមតិ 0 | ចំនួនចែករំលែក 0

ចន្លោះមិនឃើញ

នារីៗជាច្រើនបានមកហាងលក់មីនេះក្នុងបំណងគយគន់ម្ចាស់ហាងរូបសង្ហាដូចតារាភាពយន្តម្នាក់នេះ។

ថ្មីៗនេះ អ្នកប្រើប្រាស់បណ្ដាញសង្គមថៃបាននាំគ្នាចែករំលែករូបភាពរបស់ម្ចាស់ហាងមីមួយដែលមានរូបសម្បត្តិដូចតារាម៉ូដែលជាបន្តបន្ទាប់។ តាមព័ត៌មានដែលគេចែករំលែក ម្ចាស់ហាងមីដែលកំពុងល្បីកក្រើកនេះមានឈ្មោះថា Kritsada Saekwang អាយុ ៣០ឆ្នាំ គឺជាមេចុងភៅរបស់ហាងមី យីហោ Jad Noodles នៅទីក្រុង Rangsit ខេត្ត Pathum Thani ភាគកណ្ដាលប្រទេសថៃ។

តាមពិតទៅ Kritsada គឺជាគ្រូបង្វឹកកាយសម្ព័ន្ធមួយរូបនៅសាកលវិទ្យាល័យ Rangsit។ ក្រៅពីពេលបង្រៀននិងលក់មី បុរសសង្ហារូបនេះក៏ជាតារាម៉ូដែលមិនអាជីពម្នាក់ផងដែរ។ គំនិតបើកហាងមីនេះបានផុសឡើងក្នុងក្បាលរបស់ Kritsada នៅពេលលោកបានបងប្រុសបង្រៀនរបៀបធ្វើទឹកស៊ុបមីតុំយ៉ាំដ៏ឈ្ងុយឆ្ងាញ់ប្រចាំត្រកូល។ ក្រោយពេលគិតគូរមួយរយៈ Kritsada បានសម្រេចចិត្តចូលហ៊ុនជាមួយមិត្តភ័ក្ដិខ្លួន២នាក់ទៀតដើម្បីបើកហាងមីនេះ។

ដោយសារតែមានរូបសម្បត្តិស្រស់សង្ហាគួបផ្សំជាមួយរាងកាយទាក់ទាញ ហាងមី Jad Noodles របស់ Kritsada ទទួលបានប្រជាប្រិយយ៉ាងខ្លាំងពីអ្នកនៅក្នុងតំបន់ ជាពិសេសគឺមិត្តៗនារីតែម្ដង។ គួរបញ្ជាក់ផងដែរថា មិនមែនមានតែម្ចាស់ហាងទេដែលមានរាងសាច់ដុំ៦កង់បែបនេះ បុគ្គលិកដទៃទៀតនៅក្នុងហាងក៏មានរាងមិនចាញ់មេចុងភៅប៉ុន្មានដែរ។ ដោយសារតែល្បីឈ្មោះនៅលើអ៊ីនធឺណិតខ្លាំងពេក Kritsada និងក្រុមមិត្តភ័ក្ដិរបស់ខ្លួនក៏ត្រូវបានប៉ុស្តិ៍ទូរទស្សន៍អញ្ជើញឲ្យចូលរួមក្នុងកម្មវិធីរបស់ពួកគេផងដែរ៕