ប្រាក់រៀល ផ្ដល់ប្រយោជន៍អ្វីខ្លះដល់កម្ពុជា?

2016-03-18 19:17:23
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃ ២០ មីនា ខាងមុខនេះ ធនាគារជាតិនៃកម្ពុជា នឹងរៀបចំទិវាអបអរសាទរ ការដាក់ឱ្យចរាចរ ប្រាក់រៀលឡើងវិញ លើកទី ៣៦ ក្នុងគោលបំណងរំឭកខួប និង ដើម្បីបង្ហាញការគាំទ្រ លើកទឹកចិត្តឱ្យវិស័យឯកជន បង្កើនការប្រើប្រាស់ប្រាក់រៀល នៅក្នុងប្រតិបត្តិការអាជីវកម្មរបស់ខ្លួន ដោយស្មារតីស្ម័គ្រចិត្ត។ ការប្រើប្រាស់ប្រាក់រៀល ផ្ដល់ប្រយោជន៍អ្វីខ្លះដល់កម្ពុជា?

កម្ពុជានា ពេលបច្ចុប្បន្ន បានអនុវត្តវិធីដោះដូរ ដោយប្រើរូបិយប័ណ្ណបរទេសលាយឡំគ្នាច្រើនជាងប្រាក់រៀល ដែលបានធ្វើឱ្យប៉ះពាល់ដល់ផ្នែកសេដ្ឋកិច្ចកម្ពុជា។ ដូច្នេះការប្រើប្រាស់ប្រាក់រៀល មិនត្រឹមតែជួយផ្នែកសេដ្ឋកិច្ចប៉ុណ្ណោះទេ ថែមទាំងជួយពង្រឹងអត្តសញ្ញាណជាតិ មោទនភាពជាតិ និងអធិបតេយ្យសេដ្ឋកិច្ច។ ការរក្សាអត្តសញ្ញាណជាតិ ជាកាតព្វកិច្ចមូលដ្ឋានរបស់ស្ថាប័នរដ្ឋ និងប្រជាពលរដ្ឋខ្មែរគ្រប់រូប ដើម្បីលើកស្ទួយកេរ្តិ៍មរតក និងកិត្តិនាមរបស់កម្ពុជាលើឆាកអន្តរជាតិ។ មិនតែប៉ុណ្ណោះ ប្រាក់រៀល បានដើរតួនាទីជាឧបករណ៍គោលនយោបាយសេដ្ឋកិច្ច ហិរញ្ញវត្ថុសំខាន់មួយក្នុងការពង្រឹងភាពរឹងមាំ និងការអភិវឌ្ឍសេដ្ឋកិច្ច កាត់បន្ថយភាពក្រីក្រ និងសំដៅរួមចំណែករក្សាស្ថិរភាពម៉ាក្រូសេដ្ឋកិច្ច និងហិរញ្ញវត្ថុ។

អ្វីខាងលើ ជាការលើកឡើងរបស់ លោក ហ៊ន់ សុរចនា ប្រធានប្រតិបត្តិនៃគ្រឹះស្ថានហិរញ្ញវត្ថុ ព្រីនស៍ ហ្វាយនែន ក្នុងសន្និសីទសារព័ត៌មានស្ដីអំពី "ព្រីនស៍ ហ្វាយនែន ភីអិលស៊ី ក្នុងការចូលរួមលើកកម្ពស់ប្រាក់រៀលខ្មែរ" កាលពីព្រឹកមិញនេះ។

គ្រឹះស្ថានហិរញ្ញវត្ថុ ដែលមានអាយុជិត ៧ ខែក្នុងវិស័យ MFI នៅកម្ពុជារបស់ លោក ហ៊ន់ សុរចនា បានប្រកាសប្រើប្រាស់ប្រាក់រៀល ចាប់ពីពេលនេះទៅហើយ ដោយផ្ដល់ប្រាក់បៀវត្សរ៍ជាប្រាក់រៀល ដល់បុគ្គលិកគ្រប់ជាន់ថ្នាក់ និងរាល់ការចំណាយទូទាត់ផ្នែករដ្ឋបាល និងលំហូរសាច់ប្រាក់ផ្ទៃក្នុងរបស់គ្រឹះស្ថាន ដើម្បីលើកកម្ពស់ប្រាក់រៀលខ្មែរ។

លោកថ្លែងថា៖ "នៅប្រទេសភាគច្រើនដែលមានមោទនភាព នៃភាពរុងរឿងរបស់ជាតិខ្លួន ដោយសារប្រជាជនភាគច្រើន ចូលចិត្តចាយប្រាក់ដែលឆ្លុះបញ្ចាំងពីប្រវត្តិសាស្ត្រ និងតម្លៃរបស់ខ្លួន។ ប្រាក់រៀលមិនត្រឹមតែសម្រាប់ដោះដូរផ្នែកសេដ្ឋកិច្ចប៉ុណ្ណោះទេ វាជាអត្តសញ្ញាណជាតិខ្មែរ និងជាឧបករណ៍សម្រាប់លើកស្ទួយសេដ្ឋកិច្ចជាតិ បង្កប់នូវសិល្បៈយ៉ាងរស់រវើក។ ជាការស្នើ របស់ខ្ញុំផ្ទាល់សម្រាប់ប្រជាជនទូទៅ ខ្ញុំសង្ឃឹមថា ក្នុងចំណោមក្រដាសប្រាក់ ដែលបងប្អូនប្រជាពលរដ្ឋមាន ប្រាក់រៀលខ្មែរនៅតែជាអាទិភាពមុខគេ ក្នុងការចាយវាយរបស់លោកអ្នកជានិច្ច"។

បើងាកមកការកម្ចីប្រាក់វិញ ប្រធានប្រតិបត្តិរូបនេះ បានបញ្ជាក់ថា ការខ្ចីប្រាក់រៀលក្នុងគ្រឹះស្ថានរបស់លោក គឺមានតិចបំផុត បើធៀបនឹងប្រាក់ដុល្លារ ប៉ុន្តែ យ៉ាងណាលោកលើកទឹកចិត្តដល់អតិថិជន ក្នុងការខ្ចីប្រាក់រៀល ដើម្បីលើកកម្ពស់សេដ្ឋកិច្ច អត្តសញ្ញាណ តម្លៃ និង មុខមាត់ជាតិ។

ប្រាក់រៀលខ្មែរបានកើតដំបូងក្នុងឆ្នាំ ១៩៥៦ បន្ទាប់ពីកម្ពុជា រួចផុតពីអាណានិគមនិយមបារាំង គឺជំនួសដោយការប្រើប្រាស់ក្រដាសប្រាក់ឥណ្ឌូចិន កម្ពុជា វៀតណាម ឡាវ៕

សូមចុចអាន៖ ការផ្លាស់ប្ដូរផ្នត់គំនិត ជារឿងសំខាន់ ធ្វើឲ្យ “ប្រាក់រៀល” មានតម្លៃ

អត្ថបទ៖ អ៊ុំ សុភក្តិ 