គម្រោងបង្ហោះផ្កាយរណបប្រទេសកម្ពុជា ទៅមិនទាន់រួច

2016-03-22 16:30:00
ចំនួនមតិ 0 | ចំនួនចែករំលែក 0

ចន្លោះមិនឃើញ

គម្រោងការបង្ហោះផ្កាយរណបរបស់ប្រទេសកម្ពុជា ដែលគ្រោងជាយូរឆ្នាំមកហើយតែនៅមិនទាន់អាចទៅរួចនោះ អាចត្រូវការពេលវេលាយូរបន្ថែមទៀត ដោយសារគម្រោងនេះត្រូវការទុនវិនិយោគច្រើនរួមទាំងធនធានមនុស្សចាំបាច់ ដើម្បីឲ្យការងារអាចឈានទៅសម្រេចគោលដៅ។

លោក សុខ ពុទ្ធិវុធ ប្រធានសហព័ន្ធព័ត៌មានវិទ្យា និងទូរគមនាគមន៍ (ICT Federation) បានលើកឡើងនាឱកាសចូលរួមក្នុងព្រឹត្តិការណ៍ Inno Tech ថ្មីៗនេះថា កម្ពុជានៅមិនទាន់អាចទៅរួចទេបើទោះបីប៉ុន្មានឆ្នាំមុនរដ្ឋាភិបាលកម្ពុជា ធ្លាប់បានចាប់ដៃគូជាមួយវិស័យឯកជនដើម្បីជំរុញគម្រោងការបង្ហោះផ្កាយរណបលើកដំបូងសម្រាប់បម្រើដល់វិស័យទូរគមមនាគមន៍។

លោកថា មានកត្តាជាច្រើនដែលនាំរាំងស្ទះដល់គម្រោងនេះដូចជាការចំណាយវិនិយោគដែលមានទំហំធំធេងពេក និងណាមួយធនធានមនុស្សនៅមានកម្រិត។

លោកគិតថា រដ្ឋាភិបាលកម្ពុជាអាចនឹងពិចារណាឡើងវិញលើការបន្តគម្រោងបង្ហោះផ្កាយរណប ដើម្បីបញ្ជាក់ពីស្វ័យភាព កិត្យានុភាព និងភាពរីកចម្រើនផ្នែកបច្ចេកវិទ្យាទូរគមនាគមន៍ នៅពេលប្រទេសកម្ពុជាបច្ចុប្បន្ននៅតែបន្តពឹងផ្អែកការប្រើប្រាស់ផ្កាយរណបប្រទេសជិតខាង ដើម្បីបម្រើការងារក្នុងវិស័យទូរគមនាគមន៍របស់ខ្លួន។

កាលពីឆ្នាំ ២០១១ រដ្ឋាភិបាលកម្ពុជាបានបង្ហាញពីគម្រោងបង្ហោះផ្កាយរណប ដោយមានការសហការពីដៃគូឯកជន។ ការអនុវត្តការងារនេះត្រូវប៉ាន់ប្រមាណថានឹងចំណាយទឹកប្រាក់ប្រមាណពី ២៥០ ទៅ ៣៥០ លានដុល្លារអាមេរិក។ គេសង្ឃឹមថា ផ្កាយរណបកម្ពុជាលើកដំបូងដែលមានឈ្មោះថា Cambodian Satellite 1 នឹងអាចបាញ់បង្ហោះក្នុងតារាវិថីក្នុងឆ្នាំ ២០១៣។ យ៉ាងណាគម្រោងនេះនៅស្រពេចស្រពិលនិងជាប់គាំងមកទល់ពេលនេះ៕

ចុចអាន៖ លោកចោរនឹងអស់លក្ខណ៍ បើម្ចាស់ម៉ូតូប្រើឧបករណ៍តាមដានទីតាំងនេះ

អត្ថបទ៖ ប៊ុណ្ណារ៉ា