ក្រោយ​ពាក្យ​ប្រកាស​ឲ្យ​​ប្រជាជន​មើល​រឿង​ភាគ​កូរ៉េ "Descendants of the Sun” របស់​នាយករដ្ឋមន្ត្រី​ថៃ ពេល​នេះ​ប្រធានាធិបតី​កូរ៉េ​បាន​ចេញ​មុខ​សរសើរ​ភាពយន្ត​ភាគ​របស់​ប្រទេស​ខ្លួន​ម្ដង។

បណ្ដាញ​ព័ត៌មាន Yonhap របស់​ប្រទេស​កូរ៉េ​បាន​រាយការណ៍​ថា កាល​ពី​ថ្ងៃ​ទី ២១ ខែ​មីនា​មុន​នេះ ក្នុង​កិច្ច​ប្រជុំ​មួយ​នៅ Blue House ទីស្នាក់ការ​របស់​ប្រធានាធិបតី​នោះ លោក​ស្រី Park Geun Hye ប្រមុខ​រដ្ឋ​របស់​ប្រទេស​កូរ៉េ​ខាង​ត្បូង​បាន​លើក​ពាក្យ​សរសើរ​ដល់​កំពូល​រឿង​ភាគ "Descendants of the Sun” ដោយ​សារ​តែ​រឿង​នេះ​ជះ​ឥទ្ធិពល​វិជ្ជមាន​ដល់​វិស័យ​ទេសចរណ៍​ក្នុង​ប្រទេស។

ប្រធានាធិបតីកូរ៉េ Park Geun Hye

“ភាពយន្ត​មួយ​ដែល​មាន​ខ្លឹមសារ​ល្អ​មិន​ត្រឹម​តែ​នាំ​មក​នូវ​ផល​ចំណេញ​ខាង​ប្រាក់​កាស​នោះ​ទេ តែ​វាយ​ក៏​អាច​ផ្សព្វផ្សាយ​វប្បធម៌​និង​​​វិស័យ​ទេសចរណ៍​ផង​ដែរ"។ ប្រធានាធិបតី​កូរ៉េ​មាន​ប្រសាសន៍​។

“Descendants of The Sun” គឺ​ជា​រឿង​ភាគ​កូរ៉េ​ទី​​១​ដែល​ត្រូវ​បាន​ចាក់​ផ្សាយ​ក្នុង​ពេល​តែ​១​នៅ​ទាំង​ចិន​និង​កូរ៉េ។ នៅ​លើ​គេហទំព័រ Iqiyi អ្នក​ចែក​ចាយ​ផ្ដាច់​មុខ​របស់​​រឿង​នេះ​នៅ​ចិន​ ​បាន​ទាក់​ទាញ​​ចំនួន​អ្នក​មើល​បាន ១ពាន់​លាន​ដង​ហើយ​គិត​ត្រឹម​ភាគ​ទី​៨។ មក​ដល់​ពេល​បច្ចុប្បន្ន រឿង​​មាន​ប្រវែង​១៦​ភាគ​នេះ បាន​លក់​​សិទ្ធិ​​ចាក់​ផ្សាយ​ចេញ​​ទៅ​ក្រៅ​ចំនួន​ ១៩​ប្រទេស​ហើយ ដោយ​ក្នុង​នោះ​មាន​ប្រទេស​ជា​ច្រើន​ដែល​ស្ថិត​នៅ​​ក្រៅ​តំបន់​អាស៊ី​ដូច​ជា អាល្លឺម៉ង់ អ៊ីតាលី បារាំង​និង អង់គ្លេស។ ជាមួយ​នឹង​ជោគជ័យ​ហួស​ពី​ការ​រំពឹង​ទុក​នេះ ផលិតករ​ប្រទេស​ចិន​ក៏​​កំពុង​តែ​មាន​គម្រោង​​ផលិត​រឿង​នេះ​ឡើង​វិញ​ផង​ដែរ​៕

ចុចអាន៖នាយក​រដ្ឋ​មន្ត្រី​ថៃ ប្រាប់​​ប្រជាជន​ឲ្យ​មើល​រឿង​ភាគ​កូរ៉េ “Descendants of the Sun”

ប្រែ​សម្រួល៖ សុវណ្ណផៃ ប្រភព៖kenh14