សង្ក្រាន្ត ភូមិយើង ទទួលការគាំទ្រខ្លាំងហួសពីការរំពឹងទុក

2016-04-11 21:55:55
ចំនួនមតិ 0 | ចំនួនចែករំលែក 0

ចន្លោះមិនឃើញ

កម្មវិធីសង្ក្រាន្តភូមិយើង ដែលប្រព្រឹត្តទៅនៅក្នុងវិទ្យាល័យព្រះមុនីវង្ស នាក្រុងបាត់ដំបង បានបញ្ចប់ទៅហើយ កាលពីម្សិលមិញ បន្ទាប់ពីបានដំណើរការអស់រយៈពេលមួយថ្ងៃចាប់ពីម៉ោង ៨ ព្រឹករហូតដល់ម៉ោង៨យប់។ កម្មវិធីសង្ក្រាន្ត ភូមិយើង គឺទទួលបានជោគជ័យ ដោយមានអ្នកចូលរួមប្រមាណជា ៥ ០០០ នាក់ ដែលលើសពីការរំពឹកទុក។ នេះបើតាម ស្ថាបនិក នៃកម្មវិធីសង្ក្រាន្ត ភូមិយើង ប្រាប់ឲ្យដឹង។

កញ្ញា កែម ច័ន្ទបុប្ផា ជាស្ថាបនិក នៃកម្មវិធីសង្ក្រាន្តភូមិយើង បានថ្លែងប្រាប់ Sabayថា ក្រុមការងារមិននឹកស្មានថា មានមនុស្សមកចូលរួមក្នុងវិធីនេះដល់រាប់ពាន់នាក់បែបនេះទេ ហើយក្រុមការងារមានអារម្មណ៍សប្បាយរីករាយខ្លាំងណាស់ដែលបងប្អូនយុវជននៅក្នុងខេត្តបាត់ដំបងបានមកចូលរួមក្នុងកម្មវិធីយើងយ៉ាងច្រើនកុះករបែបនេះ ដែលជាការចូលរួមចំណែកជួយជ្រោមជ្រែងយ៉ាងច្រើនដល់គោលបំណងដើមរបស់កម្មវិធីយើង។

"ខ្ញុំសូមអរគុណផងដែរ ដល់ក្រុមការងារសង្ក្រាន្តភូមិយើងដែលបានចំណាយពេលវេលាផ្ទាល់ខ្លួនជាច្រើនដើម្បីបង្កើតកម្មវិធីនេះឡើង ហើយដំណើរប្រព្រឹត្តិទៅរបស់កម្មវិធីពីម្សិលមិញនេះជាសក្ខីភាពបង្ហាញថា ការខិតខំប្រឹងប្រែងអស់រយៈពេលជិតកន្លះឆ្នាំរបស់យើងបានទទួលជោគជ័យហើយ"។ កញ្ញា កែម ច័ន្ទបុប្ផា និយាយ។

ជុំវិញព្រឹត្តិការណ៍សង្ក្រាន្តភូមិយើងនេះ កញ្ញា ហាស់ សុភា តំណាងក្រុមលក់របស់ថ្នាក់១២Mនៅក្នុងកម្មវិធីបានឲ្យដឹងថា ថ្នាក់របស់កញ្ញាបានទទួលការអនុញ្ញាតអោយចូលរួមលក់ ប្រហិត សារាយ ដូង និងទឹកសុទ្ធ។ ដំបូងមិត្តរួមថ្នាក់របស់កញ្ញាបានត្រៀមរបស់សម្រាប់លក់តិចតួចប៉ុណ្ណោះព្រោះគិតថា មានអ្នកចូលរួមមិនច្រើនប៉ុន្មាននោះទេ។ ផ្ទុយពីគិតនេះ រយៈពេលតែមួយម៉ោងប៉ុណ្ណោះ ដូង ប្រហិតត្រូវលក់ដាច់គ្មានសល់ ហើយមិត្តរួមថ្នាក់របស់កញ្ញាត្រូវចេញទៅទិញបន្ថែមមកទៀត ជាច្រើនលើកច្រើនសា ហើយនៅតែបន្តលក់ដាច់ទៀត។

គួរបញ្ជាក់ផងដែរថា កម្មវិធីសង្ក្រាន្តភូមិយើងត្រូវបានរៀបចំឡើងដោយអតីតយុវសិស្ស និងយុវសិស្ស នៃវិទ្យាល័យព្រះមុនីវង្សក្នុងគោលបំណងរៃអង្គាសថវិកាដើម្បីយកទៅជួយរៀបចំជាបណ្ណាល័យមួយនៅសាលាបឋមសិក្សាជ្រោយស្នានៅស្រុកបវិលខេត្តបាត់ដំបង និង ដើម្បីទទួលឆ្នាំថ្មីផងដែរ៕