​ជាទូទៅ តម្លៃ​នៃ​ផ្កាយរណប​នានា​គឺ​​អាច​​ដល់​ទៅ​ខ្ទង់​រាប់​លាន​ដុល្លារ​ឯណោះ​​ ​ប៉ុន្តែ​កាល​ពី​ថ្មី​ៗ​នេះ​មាន​និស្សិត​ផ្នែក​វិទ្យាសាស្ត្រ​មួយ​ក្រុម​មក​ពី​សាកលវិទ្យាល័យ​ ​Arizona​ ​បាន​ប្រកាស​ថា​ពួក​គេ​អាច​ផលិត​នូវ​ផ្កាយ​រណប​មួយ​ប្រភេទ​ដែល​មាន​ទំហំ​តូច​ ​ហើយ​ថែម​ទាំង​មាន​តម្លៃ​ទាប​ផង​ដែរ​។​

 

  ​ផ្កាយ​រណប​របស់​ពួក​គេ​នោះ​ ជា​ផ្កាយរណប​ប្រភេទ​បង្កើត​ដែន​ទំនាក់​ទំនង​ ​ដូច​ជា​ការ​ឆ្លើយ​ឆ្លង​ប្រព័ន្ធ​ទូរសព្ទ​ ​និង​បង្កើត​សេវា​អ៊ីនធឺណិត​។​ ​​មាន​ឈ្មោះ​ ​ថា SunCube FemtoSat​ ​ផ្កាយ​រណប​នេះ ​​មាន​រាង​ជា​ប្រអប់​បួន​ជ្រុង​ ​ហើយ​មាន​ទំហំ​តែ​ ​៣សង់ទីម៉ែត្រ​ ​និង​ទម្ងន់​តែ​ ​៣៥ក្រាម​តែ​ប៉ុណ្ណោះ​។​     ពួក​គេ​បាន​បង្ហាញ​ឲ្យ​ដឹង​ផង​ដែរ​ថា​ ​មនុស្ស​គ្រប់​គ្នា​អាច​ក្លាយ​ជា​ម្ចាស់​នៃ​ ​FemoSat​ ​ដោយ​ចំណាយ​ប្រាក់​ចន្លោះ​ពី​ ​១ពាន់​ ​ទៅ​៣ពាន់ដុល្លារ​។​ ​តម្លៃ​នេះ​គឺ​គិត​រួច​ជា​ស្រេច​ជា​មួយ​ការ​បាញ់បង្ហោះ​ផ្កាយរណប​នោះ​ទៅ​អវកាស​។ សម្រាប់​ផ្កាយរណបតម្លៃ​ ​១ពាន់ដុល្លារ​ ​គឺ​ត្រូវ​ស្ថិត​នៅ​ក្រោម​ដែន​គ្រប់​គ្រង​នៃ​ស្ថានីយ​ផ្កាយ​រណប​អន្តរជាតិ​ ​និង​តម្លៃ​ ​៣ពាន់​ដុល្លារ​ ​គឺ​អាច​ចេញ​ពី​ដែន​គ្រប់​គ្រង​នៃ​ស្ថានីយ​ផ្កាយ​រណប​អន្តរជាតិ​៕​   អាន​បន្ត​ ​៖​ iPad Pro ផលិត​ពី​អាលុយមីញ៉ូម​លឿង​ រំពឹង​ថា​នឹង​ដេញ​ថ្លៃ​បាន​​ដល់​ ២​ម៉ឺន​ដុល្លារ   ប្រែ​សម្រួល​ ​៖​ ​រដ្ឋ​ ប្រភព​ ​៖​ iflscience