ឡើងចំណោតថ្មភ្នំបានពាក់កណ្ដាលសុំមិត្តស្រីរៀបការបានសម្រេច

2016-04-26 16:48:23
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីចុងសប្ដាហ៍កន្លងទៅ គូស្នេហ៍មួយគូបានទៅដើរកម្សាន្តនៅឧទ្យានជាតិ Zhangjiajie ស្ថិតក្នុងខេត្តHunan ប្រទេសចិន និងបានចែករំលែករូបថតរបស់ពួកគេលើបណ្ដាញអ៊ីនធឺណិត។ អំឡុងពេលដើរកម្សាន្តបុរសជាសង្សារបានធ្វើឲ្យមិត្តស្រីរបស់ខ្លួនភ្ញាក់ផ្អើលខ្លាំង។

តាមសារព័ត៌មានចិន Sina បានឲ្យដឹងថា អំឡុងពេលគូសង្សារខាងលើនាំគ្នាតោងឡើងលើចំណោតថ្មភ្នំ បុរសជាសង្សារបានឈប់ពាក់កណ្ដាលផ្លូវរួចបានបង្ហើបសំណួរសុំមិត្តស្រីរបស់ខ្លួនរៀបការ។ ចំណែកខាងនារីជាសង្សារបានឆ្លើយ "ចាស" យល់ព្រម។

នារីជាសង្សារបានប្រាប់សារព័ត៌មានថានាងបានដឹងមុន និងពុំសូវជាមានការភ្ញាក់ផ្អើលព្រោះបានឃើញជាងថតរូប និងបានឃើញបុរសជាសង្សាររបស់នាងបានរៀបចំរ៉ូបឈុតរៀបការមុនទៅដើរកម្សាន្ត។ យ៉ាងណាក្ដី ផែនការស្នើសុំមិត្តស្រីរៀបការរបស់គូស្នេហ៍នោះបានធ្វើឲ្យមនុស្សជាច្រើនសរសើរក៏ដូចជារិះគន់ផងដែរ។

មតិមួយចំនួនបាននិយាយថាសំណើសុំរៀបការរបស់ពួកគេពិតជារ៉ូមែនទិក និងផ្សងព្រេង ចំណែកមតិខ្លះទៀតបានលើកឡើងការធ្វើបែបនោះអាចបង្កឲ្យមានគ្រោះថ្នាក់ ឬគ្រាន់តែជាការបង្ហាញទាក់ទាញឲ្យអ្នកទេសចរទៅទស្សនាឧទ្យានជាតិប៉ុណ្ណោះ។

គួរបញ្ជាក់ផងដែរ ទំនោរនៃការស្នើសុំរៀបការតាមទីសាធារណៈលក្ខណៈប្លែកបានកើតឡើងក្នុងស្រទាប់ប្រជាពលរដ្ឋចិនជាពិសេសគូស្នេហ៍យុវវ័យ ដែលទាក់ទាញចំណាប់អារម្មណ៍ពីមនុស្សជាច្រើន៕