សំ វ៉ាន់ដេត ៖ គ្មានអ្វីចម្លែកទេ ដែលចាញ់ក្រុមទ័ព ៥-១

2016-04-30 17:20:50
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក សំ វ៉ាន់ដេត គ្រូបង្វឹកក្រុមព្រះខ័នរាជស្វាយរៀង បានបង្ហោះនៅលើបណ្ដាញសង្គម Facebook របស់លោកថា វាគ្មានអ្វីប្លែកទេ នៅពេលដែលក្រុមរបស់លោកចាញ់ក្រសួងការពារជាតិ ៥-១ ហើយនេះគ្រាន់តែជាការបរាជ័យមួយដែលយើងទទួលយកការពិត ហើយនឹងធ្វើឱ្យបានល្អនៅប្រកួតបន្ត។

គ្មាននរណាស្មានដល់ដែលក្រុមខ្លាំងព្រះខ័នរាជស្វាយរៀងចាញ់ក្រុមក្រសួងការពារជាតិដោយលទ្ធផល ៥-១ នៅក្នុងដីខ្លួនឯង កាលពីល្ងាចម្សិលមិញនេះ។ ប៉ុន្តែវាបានកើតឡើងទៅហើយ ដោយក្រុមរបស់លោកទេព ឡុងរចនា ពិតជាធ្វើបានល្អមែន ដោយលេងសហការគ្នាបានសឹងតែគ្រប់តំបន់។

បរាជ័យប្រកួតដំបូងនេះដែរ លោក សំ វ៉ាន់ដេត គ្រូបង្វឹកស្វាយរៀងបានបង្ហាញអារម្មណ៍ដែរថា៖ “វាគ្មានអ្វីប្លែកទេ គ្រាន់តែជាការបរាជ័យមួយដែលយើងទទួលយកការពិត ហើយយើងនឹងធ្វើអោយបានល្អនៅប្រកួតបន្តទៀត។អរគុណពួកអ្នកដែលធ្វើអោយពួកយើងយល់ពីស្រមោលអាក្រក់ខ្លួនឯង។ សុំទោស បងប្អូនស្វាយរៀងខ្ញុំពិតជាធ្វើអោយបងប្អូនមិនសប្បាយចិត្ត”។

៥គ្រាប់របស់ក្រុមក្រសួងការពារជាតិកាលពីម្សិលមិញដែលធ្វើឱ្យអ្នកគាំទ្រក្រុមស្វាយរៀងស្ងាត់មាត់នោះ ធ្វើបានដោយកីឡាករ Kim Kyong Hon ២គ្រាប់ Cheo Myong Ho មួយគ្រាប់ កីឡាករ ភួង សុខសាណា ១គ្រាប់និងការធ្វើឱ្យចូលទីខ្លួនឯងរបស់ ណុប តុលា មួយគ្រាប់។ ខណៈដែលមួយគ្រាប់របស់ក្រុមស្វាយរៀងរកបានដោយ សំអឿន ពិដោរ៕ អត្ថបទ៖ មុន្នី រម្យ