មាន សូនីតា ថាសិល្បៈបានបង្រៀននាងឲ្យស្គាល់អត្ថន័យពេញលេញនៃពាក្យ "ជីវិត"

2016-05-03 13:06:52
ចំនួនមតិ 0 | ចំនួនចែករំលែក 0

ចន្លោះមិនឃើញ

មាន សូនីតា កើតថ្ងៃទី១០ ខែកុម្ភៈ ឆ្នាំ ១៩៩០ មានបងប្អូនពីរនាក់ជាកូនពៅ មានដើមកំណើតមកពីខេត្ត កំពង់ចាម មុននឹងក្លាយជាតារាសម្ដែងល្បីឈ្មោះមួយរូបដូចសព្វថ្ងៃ ពីដើមឡើយ នាងគ្រាន់តែជាក្មេងស្រីម្នាក់ដែលមិនធ្លាប់គិត និងមិនធ្លាប់យល់អ្វីទៅជាអត្ថន័យពេញលេញរបស់ពាក្យថា "ជីវិត" ។

ប៉ុន្តែអ្វីៗចាប់ផ្ដើមផ្លាស់ប្ដូរបន្តិចម្ដងៗនៅពេលដែលនាងបានផ្លាស់ប្ដូរមករស់នៅទីក្រុងភ្នំពេញ ហើយកាន់តែប្រសើរជាងនេះទៀត នៅពេលដែលនាងបានបញ្ចប់ថ្នាក់កម្រិតឧត្ដមសិក្សា។

បើកទំព័រជីវិតក្នុងវិថីសិល្បៈ៖

នៅក្នុងឆ្នាំ ២០០៩ ដោយសារការស្រលាញ់ និងមានក្ដីស្រមៃជាអាជីពតារាសម្ដែង នីតា បានសម្រេចចិត្តដាក់ពាក្យចូលប្រឡងក្នុងកម្មវិធី Freshie Boys & Girls ជំនាន់ទី៨ ជាលទ្ធផល នីតា បានជាប់ចំណាត់ថ្នាក់លេខ៤ក្នុងចំណោមបេក្ខភាពរាប់ពាន់អ្នក។

បន្ទាប់ពីនោះ នីតា បានចុះកុងត្រាជាមួយ ក្រុមហ៊ុន កម្សាន្តក្នុងស្រុកមួយ រយៈពេលប្រមាណជា៣ឆ្នាំ អំឡុងពេលនោះដែរ នីតា ពុំទាន់មានឱកាសច្រើនតាមកញ្ចក់ទូរទស្សន៍នៅឡើយទេ។

ជីវិតពេញលេញក្នុងវិស័យសិល្បៈ៖

បន្ទាប់ពីចប់កុងត្រាជាមួយក្រុមហ៊ុនកម្សាន្តមួយនោះមក នីតា នៅតែពុំទាន់មានភាពលេចធ្លោ រហូតមកដល់ឆ្នាំ២០១២ ដែលនាងបានជួបជាមួយតារាចម្រៀង ម៉ុង ម៉ានិត (Manith Jupiter) ដែលកាលណោះ ម៉ានិតធ្វើការស្ម័គ្រចិត្តផ្នែកដឹកនាំសម្ដែងវីដេអូឲ្យផលិតកម្ម រ៉ក់ក្រោមការដឹកនាំរបស់អ្នកស្រី ពាន់ ភួងបុប្ផា ទើបនាងចាប់ផ្ដើមលេចធ្លោ។

ម៉ានិត បានជ្រើសរើស នីតា ដើម្បីចូលរួមសម្ដែងក្នុងវីដេអូចម្រៀងដែលខ្លួនបានដឹក។ ស្របពេលនោះដែរ ផលិតកម្មត្រូវការតួស្រីតម្រូវជាស្រីស្អាត សាច់ឈាមជាកូនអ្នកមាន និង រស់នៅបរទេស ទើប ម៉ានិត ណែនាំ នីតាទៅកាន់អ្នកដឹកនាំ។ រឿង "បេះដូងអ្នកការពារ" ជារឿងដំបូងដែលនាងបានសម្ដែង។ ចាប់ពីពេលនោះមក នីតា បានក្លាយជាទីចាប់អារម្មណ៍របស់ទស្សនិកជន។

ប្រវត្តិការសិក្សា៖

ពីថ្នាក់ទី១ដល់ថ្នាក់ទី១២សិក្សានៅខេត្តកំពង់ចាម និងបានបន្តការសិក្សាបរិញ្ញាបត្រផ្នែកធនាគារ និងហិរញ្ញវត្ថុនៅសាកលវិទ្យាល័យបៀលប្រាយ ដោយបានបញ្ចប់នៅឆ្នាំ ២០១៣។

ការងារសង្គម និងចលនាស្រលាញ់៖

កាលពីថ្ងៃទី ២៥ ខែមីនា ឆ្នាំ២០១៦ នីតា បានសហការជាមួយ ម៉ានិត បង្កើតចលនាមួយមានឈ្មោះថាចលនា "ស្រលាញ់សៀវភៅ" ដែលទឹកប្រាក់៦០% ពីចលនានេះនឹងត្រូវបរិច្ចាគទៅមន្ទីរពេទ្យគន្ធបុប្ផា និងកាលពីថ្ងៃទី១០ កុម្ភៈឆ្នាំ២០១៦ នីតា ក៏បានចុះទៅចែករំលែកនូវរបស់របរប្រើប្រាស់មួយចំនួនដល់កុមារចំនួន៦០០នាក់នៅខេត្តសៀមរាប។

ចំណែកឯចលនា "ស្រលាញ់" របស់នាងវិញត្រូវបានបង្កើតឡើងជាមួយភាពជឿជាក់មួយថា ក្ដីស្រលាញ់គឺជាអ្វីៗគ្រប់យ៉ាងដែលយើងត្រូវការនៅក្នុងជីវិតមិនថាបុគ្គលណានោះទេ។ ហើយចលនានេះដែរ ត្រូវបង្កើតឡើងក្នុងគោលបំណងជួយទៅដល់កុមារកំព្រាដែលគ្មានទីពឹង និងចែករំលែកក្ដីស្រលាញ់ដល់ពួកគេដោយការបង្ហាត់បង្រៀននូវអ្វីដែលខ្លួនមានដល់ពួកគេ ជាពិសេសចង់ឲ្យក្មេងៗទាំងអស់គិតថាពិភពលោកមួយនេះត្រជាក់ពិតមែនតែពួកគេមិនឯកានោះទេ។

រឿងរ៉ាវ២យ៉ាងមិនអាចបំភ្លេចបានក្នុងជីវិត៖

១. រយៈពេលបីឆ្នាំដែលនីតារស់នៅលើគំនរសំរាមស្ទឹងមានជ័យ ជាមួយក្រុមកុមារកំព្រានៅអង្គការ PIO នីតាប្រាប់ថា ទីនោះប្រៀបបីដូចជាស្ថាននរករបស់មនុស្សរស់ក្មេងៗទាំងនោះមិនដែលស្គាល់ទេ ពាក្យថាគេងបានគ្រប់គ្រាន់ ញ៉ាំគ្រប់គ្រាន់ ក្ដីអាណិតស្រលាញ់ ឬពាក្យថារៀនសូត្រនោះ។ ពីមួយថ្ងៃទៅមួយថ្ងៃ ពួកគេរស់នៅលើភ្នំសំរាមដែលសូម្បីតែកន្លែងគេងសមរម្យមួយគ្មាន ពេលញ៉ាំបាយត្រូវចងមុងញ៉ាំដើម្បីគេចពីសត្វរុយមកពីភ្នំសំរាម ពេលភ្លៀងមកម្ដងៗមេឃជាដំបូលសម្រាប់ពួកគេ។

២. ការចែកទានសប្បុរសធម៌ដល់កុមារគ្មានទីពឹងចំនួន៦០០នាក់នៅខេត្តសៀមរាបដែលត្រូវនឹងថ្ងៃកំណើតរបស់នាង (១០.០២.២០១៦)៕

រឿងរ៉ាវដែលសោកស្ដាយ២យ៉ាងក្នុងជីវិត៖

១. ការដែលនាងខិតខំគ្រប់បែបយ៉ាង ដើម្បីចែករំលែកនូវចំណេះដឹងដែលខ្លួនមានទាំងអស់ទៅដល់កុមារកំព្រានៅ PIO តែពួកគេហាក់បីដូចជាមិនបានទទួលនូវអ្វីដែលនាងបានចែករំលែកនោះទេ រហូតដល់នាងបានសិក្សាឲ្យកាន់តែស៊ីជម្រៅពីពួកគេ ទើបនាងយល់ថា ពួកគេមិនដូចក្មេងធម្មតាដែលចេញពីផ្ទះទៅរៀននោះទេ គឺគេត្រូវគិតពីបញ្ហាក្រពះជាចម្បង។

២. នាងស្ទើរតែបោះបង់ចោលការប្រកួត Freshie Boys & Girls ដោយសារតែនាងត្រូវក្រោកតាំងពីម៉ោង៣ឬ៤ទៀបភ្លឺដើម្បីហ្វឹកហាត់រហូតដល់ល្ងាច។

អំពីក្រមាខ្មែរ៖

នីតា នៅតែបញ្ជាក់ដដែលៗថា នាងមិនមែនជាមនុស្សទីមួយដែលបានយកក្រមាខ្មែរមកច្នៃជាសំលៀកបំពាក់នោះទេ។ តែកាលដែលនាងសម្រេចយកក្រមាមកច្នៃនោះ ដោយសារនាងចង់ឲ្យវារស់ជាថ្មី និងចង់បង្កើនការងារដល់បងប្អូនដែលប្រកបរបរត្បាញ ព្រោះថា មួយរយៈក្រោយនេះបងប្អូនដែលប្រកបអាជីវកម្មនេះ ចាប់ផ្ដើមបោះបង់វាបន្តិចម្ដងៗ ហើយម៉្យាងទៀតចង់ឲ្យប្រជាជនកម្ពុជាទាំងអស់គិតថា ការដែលប្រើប្រាស់ក្រមាវាមិនអាក្រក់ ឬអន់នោះទេតែវាបានបង្កប់នូវអត្ថន័យ និងអត្តសញ្ញាណរបស់ខ្មែរ។ ហើយរាល់ទឹកប្រាក់ចំណេញពីការលក់ក្រមាខ្មែរ ៥% នីតាបានបញ្ចូលទៅក្នុងមូលនិធិ "ស្រលាញ់" ដើម្បីជួយដល់កុមារកំព្រា។

សិល្បៈនៅតែជាផ្នែកធំមួយក្នុងជីវិតរបស់នីតា៖

សម្រាប់គម្រោងអនាគត នីតា មិនបោះបង់សិល្បៈនោះទេ រឹតតែខិតខំបន្ថែមរួមជាមួយការបង្កើតជំនួញដែលទាក់ទងនឹងសិល្បៈ ព្រោះថាការងារសិល្បៈ បានបង្រៀននាងច្រើនអំពីពាក្យថា ជីវិត និងនាំនាងទៅរកអ្វីដែលថ្មី។

សារពី មាន សូនីតា ទៅកាន់យុវវ័យចង់ក្លាយខ្លួនជាតារាសម្ដែង៖

នីតា ប្រាប់ថា "ក្រៅពីទេពកោសល្យពីកំណើត ការអប់រំជាមូលដ្ឋានចម្បងដើម្បីក្លាយជាអ្នកសម្ដែងដ៏ជោគជ័យ" សម្រាប់យុវវ័យជំនាន់ក្រោយដែលមានក្ដីសុបិនចង់ក្លាយជាអ្នកសម្ដែងជោគជ័យនោះ កត្តាទីមួយដែលសំខាន់ សូមកុំបោះបង់ការសិក្សាជាដាច់ខាត ព្រោះការអប់រំអាចនាំយើងឲ្យក្លាយជាធនធានមនុស្សដែលមានឥទ្ធិពលនៅក្នុងសង្គម។ ហើយមួយទៀត ត្រូវចេះអោនលំទោនគោរពអ្នកដ៏ទៃ គោរពការងារ គោរពពេលវេលា ដើម្បីរក្សាតម្លៃខ្លួន និងទទួលជោគជ័យក្នុងការងារ៕

អត្ថបទ៖ SAMEDY

ប្រភព៖ Sabay Magz, One Mission