មានព័ត៌មានផលិតកម្មធំមួយ កំពុងព្យាយាមអូសទាញ G-Devith

2016-05-04 16:20:50
ចំនួនមតិ 0 | ចំនួនចែករំលែក 0

ចន្លោះមិនឃើញ

មានប្រភពច្បាស់ការមួយបង្ហើបមកកាន់ Sabay ថា ងួន ចាន់ដេវីត កំពុងចរចាជាមួយផលិតកម្មធំក្នុងស្រុកមួយ ដោយពួកគេហ៊ានឲ្យតម្លៃខ្លួនខ្ពស់ចំពោះតារាចម្រៀង Original Song រូបនេះទៀតផង។

ប្រភពដដែល មិនបានបញ្ចេញតួលេខពិតប្រាកដជុំវិញការចរចានៃភាគីទាំងពីរទេ ប៉ុន្តែគេបានអះអាងថា ជាខ្ទង់ចំណាយមួយខ្ពស់ ដែលល្មមអាចឲ្យម្ចាស់បទ "រាំញីកែងជើង" ពិចារណាលើផលិតកម្មនោះបាន ព្រោះពួកគេចង់បាន ដេវីត ខ្លាំង។

ពាក់ព័ន្ធបញ្ហានេះ សាមីខ្លួន បានអះអាងថា ពិតជាមានគេទាក់ទងមកលោកមែន តែលោកសុំរក្សាសិទ្ធិចំពោះអត្តសញ្ញាណផលិតកម្ម។ លោកថា តាមពិត ភាគីម្ខាងនោះ បានព្យាយាមទាក់ទងលោកយូរហើយ ហើយបច្ចុប្បន្នលោកក៏កំពុងតែពិចារណាលើរឿងនេះដែរ។ “គេទាក់ទងខ្ញុំយូរដែរហើយបង ហើយអារឿងទទួលសំណើហ្នឹងខ្ញុំកំពុងពិចារណាដែរ!"។ ដេវីត ថ្លែង។

ដេវីត កំពុងពិចារណាលើបញ្ហានេះ ដោយលោកសំអាងថា មនុស្សគ្រប់គ្នា ត្រូវការរីកចម្រើនទាំងផ្នែកសមត្ថភាព និងសេដ្ឋកិច្ច។ ម្ចាស់បទ "រាំពាក់ម៉ាស់" ថ្លែង ៖ "តាមធម្មតាមនុស្សយើងធ្វើការ ក៏ដើម្បីផលប្រយោជន៍ខ្លះដែរ តែមិនទាំងអស់ទេ តែការលើកទឹកចិត្តក៏ពិសេសដែរ បើគេអោយតម្លៃខ្ពស់ជាង...ខ្ញុំមិនទាន់ហ៊ានច្បាស់ដែរបង"។

ទាក់ទងនឹងផលិតកម្មហង្សមាសដែលលោកកំពុងជ្រកកោនវិញ ដេវីត ប្រាប់ថា លោកមិនមានកុងត្រាអ្វីឡើយ ដូច្នេះហើយ ប្រសិនបើលោកត្រូវចាកចេញមែននោះ គឺមិនមានចំណងអ្វីទាក់ទិនឡើយ ។

ដេវីត ធ្លាប់បង្ហើបថាចង់ចាកចេញពីហង្សមាសដែរ កាលពីប៉ុន្មានខែមុន បន្ទាប់ពីដៃគូចម្រៀងរបស់លោក គឺតារាចម្រៀង ពេជ្រ សោភា បានប្រកាសលើបណ្ដាញសង្គមថា នាងនឹងចាកចេញពីផលិតកម្មធំមួយនេះ ក្រោយចប់កម្មវិធី The Voice Cambodia រដូវកាលទី២៕

អត្ថបទ៖ ថា ម៉ាលីដា