ម្ដាយអរចង់ហូរទឹកភ្នែក ពេលកូនប្រុសជាប់លេខ១ មេដាយមាសរូបវិទ្យា

2016-05-04 18:16:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងចំណោមសិស្សរាប់ម៉ឺននាក់ លឹម ធាងឡាយ បានឆ្លងកាត់ការប្រលងជម្រុះជាច្រើនដង រហូតក្លាយជាសិស្សពូកែលេខ១ ទូទាំងប្រទេសផ្នែករូបវិទ្យាថ្នាក់ទី៩ និងស្ថិតក្នុងចំណោមសិស្ស ៤នាក់គត់នៅខេត្តព្រៃវែង ដែលជាប់ចំណាត់ថ្នាក់សិស្សពូកែនៅឆ្នាំ២០១៦។ លទ្ធផលនេះបានធ្វើឲ្យអ្នកស្រី ឆាយ សៀកលី ជាម្ដាយមានមោទនភាព និងរំភើបស្ទើរស្រក់ទឹកភ្នែក។

“ខ្ញុំអរ... អរមែនទែន សប្បាយ និយាយឡើងចង់ហូរទឹកភ្នែក"។ នេះជាការរៀបរាប់អារម្មណ៍របស់អ្នកស្រី ឆាយ សៀកលី ទាំងទឹកមុខញញឹមញញែមបិទមាត់មិនជិត។ អ្នកស្រីបានបន្តទៀតថា ក្នុងនាមជាម្ដាយ ពិតជាមានមោទនភាពខ្លាំងណាស់ ដោយសារឃើញអ្នកជិតខាង និងបងប្អូនសរសើរកូនប្រុសគ្រប់គ្នា។

អ្នកម្ដាយកូន២ រូបនេះ បានបញ្ជាក់ថា ទម្លាប់កូនប្រុសគឺប្រឹងរៀនសូត្រ លម្ហែកាយខ្លះ ហើយក៏ឆ្លៀតជួយការងារផ្ទះផងដែរ។ អ្វីដែលជាអំណោយផលពីធម្មជាតិ គឺ ធាងឡាយ មានខួរក្បាលល្អឆាប់ចេះឆាប់ចាំផ្នែករូបវិទ្យា បូករួមទាំងការប្រឹងប្រែងរហូតដល់ជាប់លេខ១ ទទួលបានមេដាយមាសពេលនេះ៕