ប្រកបរបរលក់ម្ជូរ១កញ្ច្រែង រកប្រាក់ចិញ្ចឹមកូន ៨នាក់

2016-05-10 18:23:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ព្រលឹមស្រាងៗចេញដំណើរពីផ្ទះ ពីរនាក់ប្ដី ប្រពន្ធ ចាំជិះរ៉ឺម៉កសំដៅមកផ្សារតាកែវ ដើម្បីលក់ម្ជូរស្វាយត្រាំ ម្កាក់ ប៉ិកគក់ និងត្របែក ដោយរំពឹងថា បានប្រាក់ចំណេញ ដើម្បីចិញ្ចឹមកូន ៨នាក់។ នេះជាការរៀបរាប់របស់អ្នកស្រី វែន លក្ខណា ដែលមានទីលំនៅភូមិខ្វាវ ឃុំសំរោង ស្រុកសំរោង ខេត្ត តាកែវ។

និយាយពីដើមទុនចំណាយក្នុងមុខរបរនេះ គឺមួយថ្ងៃទិញស្វាយខ្ចី ១០គីឡូក្រាម ប៉ិកគក់ ៣គីឡូក្រាម ក្រពីងរាជ ៥គីឡូក្រាម និងត្របែក ៣គីឡូក្រាម សរុបអស់ប្រាក់ ៦០ ០០០រៀល។

"ម្ជូរទាំងអស់ទិញនៅផ្សារយើងហ្នឹងលើកលែងតែស្វាយទិញមកពីភូមិ។ លាងទឹកអោយស្អាតចិតស្ដើងៗដាក់លើថាសរួចលាយអំបិលម៉ដ្ឋ ជាមួយដុំខ្នររោយពីលើកំពីងរាជ ចំណែកស្វាយស្រុះទឹកក្តៅមួយសន្ទុះអោយវាអន់ជូរបន្តិច”។ លក្ខិណា រៀបរាប់។

បន្ទាប់ពីផ្សំគ្រឿងគ្រប់មុខហើយ គាត់ចាប់ផ្តើមរុញរទេះដើរលក់តាមកន្លុកកន្លៀតក្នុងផ្សារចាប់តាំងពីកន្លែងលក់មាសរហូតដល់កន្លែងលក់សាច់ជ្រូកជាដើម។ "លក់រហូតដល់ម៉ោង ៣ទៅម៉ោង ៤ល្ងាចទើបអស់ ថ្ងៃខ្លះក៏សល់អញ្ចឹងទៅតែយូរៗម្តងទេអូន”។ លក្ខិណា បន្ថែម។

រីឯប្រាក់ចំណេញវិញ អ្នកស្រី លក្ខិណា ប្រាប់ថា មួយថ្ងៃអាចបាន ២០ ០០០៛ ទៅ៣០ ០០០៛ តែមិនអាចបំបាត់ភាពខ្វះខាតក្នុងគ្រួសារបានទេ គឺប្រាក់ទាំងនេះត្រូវយកទៅទិញម្ហូប និងអង្ករចិញ្ចឹមកូន ៨នាក់ ដែលកូនស្រីច្បងមានអាយុ ១៧ឆ្នាំ ឈប់រៀនថ្នាក់ទី ៣ ចំណែកកូនតូចៗកំពុងរៀនថ្នាក់ទី២។

លោក ណន់ ផល ជាស្វាមីអ្នកស្រី លក្ខិណា បានប្រាប់ឲ្យដឹងដែរថា៖ “ថ្ងៃណាជិះ រ៉ីម៉កមិនទាន់ ខ្ញុំជួលម៉ូតូបងជីដូនមួយ ដោយមួយថ្ងៃថ្លៃ ៥ ០០០៛ ខ្ញុំត្រូវនៅជួយលក់ប្រពន្ធរហូតដល់ល្ងាចដែរ"។

អ្នកស្រី លក្ខិណា បានប្រាប់ពីការលំបាកថា មុខរបរនេះរកមួយថ្ងៃហូប ១ថ្ងៃ ប៉ុណ្ណោះ ដោយត្រូវទិញអង្ករ ១ ថ្ងៃ ៤គីឡូកន្លះ (១៦កំប៉ុង) រួមទាំងម្ហូបផងអស់ប្រាក់ប្រមាណជា ២ម៉ីនរៀល។

"ទោះមានជីវភាពក្រលំបាកមែន តែយើងពីរនាក់ប្ដីប្រពន្ធស្រលាញ់គ្នាណាស់មិនដែលឈ្លោះប្រកែកគ្នាទេ ថាមិនត្រូវអាចមានកូនថែមទៀតផងក៏ថាបាន ព្រោះប្ដីប្រពន្ធខ្ញុំនៅក្មេងៗដែរ (សើច)។ គាត់ (ប្តី) សូម្បីតែបារី ស្រាក៏មិនចេះផង”។ អ្នកស្រី លក្ខិណា និយាយ។

រំលឹកពីការប្រកបរបរនេះវិញ អ្នកលក់ម្ជូរ ខាងលើនិយាយថា គាត់ធ្លាប់ទៅរកស៊ីនៅភ្នំពេញអស់រយៈពេល ១៧ ឆ្នាំ ហើយ គឺតាំងពីកូនស្រីច្បងអាយុទើប ១ឆ្នាំ។ ដោយសារជួលផ្ទះគេថ្លៃហើយកូនៗ ក៏ពុំបានរៀនសូត្រម្យ៉ាងទៀតនឹកចង់មកនៅស្រុកវិញផងក៏នាំក្រុមគ្រួសារមករស់នៅស្រុកភូមិកំណើតវិញទៅ។

ប្រិយមិត្តណាខ្លះស្គាល់ឆាកជីវិតបែបនេះ?

អត្ថបទ និង រូបភាព៖ ជិន វេន