មុនមានថ្ងៃនេះ Messi ធ្លាប់ឆ្លងកាត់រឿងរ៉ាវជីវិតបែបណាខ្លះ?

2014-09-18 21:48:59
ចំនួនមតិ 0 | ចំនួនចែករំលែក 0

ចន្លោះមិនឃើញ

មុនល្បីឈ្មោះដល់កំពូលដូចសព្វថ្ងៃ Lionel Messi ធ្លាប់ឆ្លងកាត់រឿងរ៉ាវជាច្រើន។ ក្រដាសមួយសន្លឹកខាងក្រោមនេះ គឺជាអ្នកផ្លាស់ប្ដូរជីវិតរបស់ Messi ឲ្យប្រែក្លាយពីក្មេងមានជំងឺជាប់នឹងខ្លួន ទៅជាបុគ្គលជោគជ័យមួយក្នុងលោក។ វាជាក្រដាសកិច្ចសន្យាដំបូង ដែលកុមារា Lionel Andres Messi ចុះហត្ថលេខាលេងនៅក្លិបយក្សរបស់អេស្ប៉ាញ FC Barcelona។

មុនឈានទៅដល់ការចុះហត្ថលេខាដែលមានបែបបទត្រឹមត្រូវបែបនេះ Messi បានឆ្លងកាត់រឿងរ៉ាវមួយចំនួនគួរឲ្យកត់សម្គាល់ ដែលមានដូចខាងក្រោម៖

អាយុ ៥ឆ្នាំ Messi បានចាប់ផ្ដើមលេងឲ្យក្រុមក្នុងតំបន់ដែលខ្លួនរស់នៅ គឺក្រុម Grandoli ដែលបង្ហាត់ដោយឪពុករបស់ខ្លួនផ្ទាល់ (Jorge Horácio Messi)។

ភាពលេចធ្លោក្នុងក្រុម បានធ្វើឲ្យកុមារាមាឌតូចល្អិតនេះ អាចផ្លាស់ទៅលេងនៅក្រុមល្បីគួរសម គឺ Newell’s Old Boys ស្ថិតក្នុងទីក្រុង Rosario ក្នុងវ័យត្រឹម៨ឆ្នាំ។

ក្រុមល្បីរបស់អាហ្សង់ទីន River Plate បានចាប់អារម្មណ៍ចង់បាន Messi ដែរ នៅពេលដែលគេមានអាយុ១១ឆ្នាំ ប៉ុន្តែបានដកចិត្តចេញវិញ ដោយសារពេលនោះ រូបគេមានជំងឺអ័រម៉ូនមិនលូតលាស់។ ការសម្រេចមិនយក Messi គឺដោយសារក្លិបនេះមិនចង់ចំណាយលុយ ៩០០ដុល្លារក្នុងមួយខែសម្រាប់ថ្លៃព្យាបាល។

ចៃដន្យល្អ ប្រធានផ្នែកកីឡារបស់ Barcelona បានដឹងពីសមត្ថភាពរបស់ Messi ក៏បានអនញ្ញាតិឲ្យឪពុក Messi នាំកូនប្រុសរបស់ខ្លួនទៅសាកល្បងសមត្ថភាពដល់អេស្ប៉ាញ។ ក្រោយបង្ហាញសមត្ថភាពរួចរាល់ហើយ ក្លិបអ្នកមានបុណ្យបានទទួលយក ប៉ុន្តែកិច្ចសន្យាដំបូងនាពេលនោះ គឺមិនមែនមួយសន្លឹកខាងលើនេះទេ គឺគ្រាន់តែសរសេរនៅលើក្រដាសអនាម័យមួយប៉ុណ្ណោះ។ កិច្ចសន្យាដែលធ្វើឲ្យកុមារា Messi ត្រូវផ្លាស់ទៅអេស្ប៉ាញជាអចិន្ត្រៃយ៍នោះ ក៏មានន័យថា Barca ត្រូវផ្ដល់ប្រាក់ដើម្បីព្យាបាលជំងឺទាំងស្រុងផងដែរ។

Messi ជាមួយមិត្តស្រី និងកូនប្រុស

បន្ទាប់ពីនោះមក Messi បានលេចមុខក្នុងឈុតយុវជនរបស់ Barcelona និងបានស៊ុតបញ្ចូលទីជាច្រើនគ្រាប់ ពីឆ្នាំ២០០០ ដល់២០០៣។ ចន្លោះពេលនោះហើយដែល Messi ចុះហត្ថលេខាលើកិច្ចសន្យាលើកដំបូងរបស់ខ្លួននៅក្លិបដ៏ល្បីនោះ ដូចប្រិយមិត្តបានឃើញក្នុងរូបភាពស្រាប់។ យ៉ាងណាក្ដី នៅពេលដែលក្លិបនេះជួបបញ្ហាហិរញ្ញវត្ថុនាឆ្នាំ២០០៣ Messi បានស្ថិតក្នុងបញ្ជីដែលត្រូវជម្រុះចេញពីក្លិប ប៉ុន្តែគ្រូក្នុងឈុតយុវជនបានទទូចសុំឲ្យក្លិបរក្សាទុកវិញ (Cesc Fabregas ត្រូវជម្រុះចេញនាពេលនោះ)។

នៅថ្ងៃទី១៦ ខែតុលា ឆ្នាំ២០០៤ គ្រូបង្វឹកក្រុមឈុតធំ Frank Rijkaard បានដាក់ឲ្យ Messi លេងក្នុងជំនួបរវាង Barcelona និង Espanyol ដែលធ្វើឲ្យខ្សែប្រយុទ្ធរូបនេះ ក្លាយជាកីឡាករក្មេងជាងគេបំផុតប្រចាំប្រវត្តិសាស្រ្ដក្លិប Barcelona (១៧ឆ្នាំ ១១៤ថ្ងៃ) ដែលអាចចូលលេងនៅក្របខណ្ឌកំពូលអេស្ប៉ាញ La Liga (កំណត់ត្រានេះត្រូវបានបំបែកដោយ Bojan Krkić នៅឆ្នាំ២០០៧)។

បច្ចុប្បន្ន Messi ជាម្ចាស់កំណត់ត្រាកីឡាករស៊ុតចូលច្រើនជាងគេក្នុងក្លិបតែមួយប្រចាំអេស្ប៉ាញ ជាកីឡាករស៊ុតចូលច្រើនបំផុតលំដាប់ទី២ក្នុងប្រវត្តិសាស្រ្ដ La Liga និងជាម្ចាស់កំណត់ត្រា និងពានរង្វាន់ជាច្រើនទៀត បូករួមទាំងពាន FIFA Ballon d’Or ចំនួន៤ផងដែរ។

កាលពីថ្ងៃពុធ ទី១៧ កញ្ញាម្សិលមិញនេះ Barcelona ក៏បានបង្ហោះរូបថតមួយសន្លឹករបស់ Messi កាលពីកុមារភាព ដើម្បីអបអរខួបលើកទី១៤ នៃការមកដល់របស់កីឡាករ ២៧ឆ្នាំនេះផងដែរ (រូបខាងក្រោម)។