Keyboard កុំព្យូទ័របោះបង់ចោល ក្លាយជាឧបករណ៍រៀនភាសាអង់គ្លេស សម្រាប់ក្មេងក្រីក្រ

2016-06-13 18:43:00
ចំនួនមតិ 0 | ចំនួនចែករំលែក 0

ចន្លោះមិនឃើញ

Keyboard កុំព្យូទ័រដែលគ្រប់គ្នាបោះបង់ចោលនិងគិតថាលែងមានប្រយោជន៍ ក្លាយជាឧបករណ៍សិក្សាភាសាអង់គ្លេសយ៉ាងរីករាយសម្រាប់ក្មេងៗក្រីក្រនៅក្នុងសាលាដូង សង្កាត់កោះដាច់ ភ្នំពេញ។

លោក អ៊ុក វណ្ណដេ គ្រូបង្រៀននៅសាលាដូង បានខិតខំអំពាវនាវនិងប្រមូលក្តារចុចកុំព្យូទ័រខូចបោះចោល ឲ្យបាន ៥០ គ្រឿង យកមកទុកជាសម្ភារៈសម្រាប់ក្មេងៗរៀនភាសាអង់គ្លេស។

លោកថា ដំបូង អំពាវនាវប្រមូលក្តារចុចឲ្យបានតែ ៥០បន្ទះប៉ុណ្ណោះ តែមកទល់ពេលបានទទួលរហូតដល់ ៣៦០ លើសចំនួនកំណត់ទៅទៀត ដោយសារបងប្អូនពលរដ្ឋខ្មែរទាំងអស់ចូលរួមចែករំលែកក្តារចុចខូចប្រើលែងកើត ដើម្បីទុកឲ្យក្មេងៗក្រីក្ររៀននៅសាលាដូងរបស់លោក។

លោក អ៊ុក វណ្ណដេ គ្រូបង្រៀនក្មេងក្រីក្រសាលាដូង

ក្មេងៗក្រីក្រទាំងអស់អាចរៀនភាសាអង់គ្លេស លេខ និងសញ្ញាមួយចំនួនតាមរយៈក្តារចុច។ ចំណែកឯផ្នែកខាងក្រោយនៃ Keyboard លោក វណ្ណដេ ថា ក្មេងៗអាចប្រើជាក្តារសម្រាប់សរសេរ ដោយសារលោកគ្មានលទ្ធភាពទិញសម្ភារៈដល់ពួកគេ។

យ៉ាងណា វណ្ណដេ ថាលោកនៅតែ ទទួលយកក្តារចុចខូច ដែលបងប្អូនចង់បរិច្ចាគ ដើម្បីបានចំនួនច្រើនល្មមអាចធ្វើជញ្ជាំងសាលា៕