រឿងខ្លីតែបង្កប់ន័យជ្រៅពី "ការស្អប់"

2016-06-18 13:08:58
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រូកម្រិតមត្តេយ្យម្នាក់ បានសម្រេចចិត្តលេងហ្គេមក្នុងថ្នាក់ ដោយប្រាប់ឲ្យកូនសិស្សទាំងអស់យកថង់ប្លាស្ទិកច្រកមើមដំឡូង។ ដំឡូងនីមួយៗ ត្រូវសរសេរឈ្មោះមនុស្សណា ដែលកូនសិស្សស្អប់ ដូច្នេះចំនួនដំឡូងក្នុងថង់មានច្រើន ឬតិចអាស្រ័យទៅលើសិស្សណា ដែលស្អប់គេតិច ឬច្រើននាក់ដែរ។

ថ្ងៃលេងមកដល់ សិស្សទាំងអស់បានយួរដំឡូងដោយមានឆ្លាក់ឈ្មោះមនុស្សដែលខ្លួនស្អប់មកជាមួយតាមការគ្រោងទុក។ សិស្សខ្លះមានដំឡូង ២មើម ខ្លះ ៣មើម និងខ្លះទៀតដល់ទៅ ៥មើម។ បន្ទាប់មក គ្រូបានឲ្យពួកគេយួរដំឡូងទាំងនោះទៅតាមខ្លួនជានិច្ច ទោះទៅទីណាក៏ដោយ និងរយៈពេលមួយសប្ដាហ៍។

ច្រើនថ្ងៃកន្លងផុតទៅ កូនសិស្សចាប់ផ្ដើមត្អូញត្អែរ ដោយសារដំឡូងរលួយ ភាយក្លិនស្អុយតាមខ្លួន។ ក្រៅពីនេះ អ្នកដែលមានដំឡូង ៥មើម ត្រូវយួរធ្ងន់ និងក្លិនស្អុយកាន់តែខ្លាំង។ ក្រោយរយៈពេល ១សប្ដាហ៍កន្លងទៅ កូនសិស្សបានធូរក្នុងចិត្ត ព្រោះហ្គេមដល់ថ្ងៃបញ្ចប់។

គ្រួសួរថា "តើទាំងអស់គ្នាមានអារម្មណ៍ដូចម្ដេច ពេលកំពុងយួរដំឡូងរយៈពេល ១សប្ដាហ៍"? កូនសិស្សបានបញ្ចេញអារម្មណ៍ស្រងាកចិត្ត និងចាប់ផ្ដើមត្អូញពីបញ្ហាដែលពួកគេជួបប្រទះគឺធុំក្លិនស្អុយជាប់ខ្លួន ពេលពួកគេដើរទៅណាមកណា។

បន្ទាប់មក គ្រូបានប្រាប់ថាហ្គេមនេះ មានអត្ថន័យបង្កប់របស់វាគឺ "វាដូចជាស្ថានភាពជាក់ស្ដែងអីចឹង នៅពេលអ្នកស្អប់នរណាម្នាក់ទុកក្នុងចិត្ត។ ការស្អប់ នឹងធ្វើឲ្យអារម្មណ៍របស់យើងមិនល្អ ពុំស្រស់ស្រាយ ហើយអ្នកត្រូវនាំវាតាមខ្លួនទៅគ្រប់ទីកន្លែងដូច្នោះដែរ។ ប្រសិនបើយើងមិនអាចអត់ទ្រាំក្លិនដំឡូងរលួយរយៈពេល ១សប្ដាហ៍បាន យើងសាកស្រមៃមើលថា តើវានឹងទៅជាយ៉ាងម៉េច បើយើងស្អប់គេពេញមួយជីវិតនោះ?"

តម្លៃអប់រំរឿង៖

សូមបោះបង់ចោល ការស្អប់នរណាពីក្នុងចិត្តឲ្យអស់ ដូច្នេះយើងនឹងមិនរែកបន្ទុកនេះក្នុងជីវិតទេ។ ការអត់ឱនចំពោះអ្នកដទៃ គឺជាសេចក្ដីថ្លៃថ្នូរបំផុត។ ការស្អប់ ការគិតមិនល្អ ការទើសទាល់ ចំពោះអ្នកដទៃ នឹងមិនអាចឲ្យអ្នករស់នៅបានសុខស្រួលឡើយ។ ព្យាយាមចងចាំ និងគិតអ្វីល្អៗ ចំពោះមនុស្សជុំវិញខ្លួន ទើបរស់នៅបានស្ងប់ និងមិនជួបបញ្ហាថ្ងៃក្រោយ៕