បញ្ហាធំៗដែលកើតឡើងក្រោយអង់គ្លេសចាកចេញពីអឺរ៉ុប
- 2016-06-25 21:04:30
- ចំនួនមតិ 0 | ចំនួនចែករំលែក 0
បញ្ហាធំៗដែលកើតឡើងក្រោយអង់គ្លេសចាកចេញពីអឺរ៉ុប
ចន្លោះមិនឃើញ
ប្រជាជនអង់គ្លេសប្រមាណ ៥២ភាគរយបានបោះឆ្នោតគាំទ្រឲ្យអង់គ្លេសចាកចេញពីអឺរ៉ុប។ ដំណើរការចាកចេញដែលហៅថា Brexit នេះនឹងធ្វើឲ្យបញ្ហាជាច្រើនកើតឡើងដូចជា៖
១. ការធ្លាក់ចុះនៃលុយផោន៖ ធនាគារអង់គ្លេសនិយាយថារូបិយវត្ថុធ្លាក់ចុះខ្លាំងក្រោយការបោះឆ្នោតនេះ។ ប្រាក់ផោនប្រាកដជារងផលប៉ះពាល់ដោយសារអង់គ្លេសពឹងផ្អែកលើការបណ្ដាក់ទុនពីបរទេសដើម្បីគាំទ្រសេដ្ឋកិច្ចរបស់ខ្លួន។
២. វិបត្តិទីផ្សារភាគហ៊ុន៖ អ្នកវិភាគបានឲ្យដឹងថាភាគហ៊ុនអង់គ្លេសអាចនឹងធ្លាក់ចុះដល់ ២៤% ដោយសារក្រុមអ្នកវិនិយោគមានការព្រួយបារម្ភអំពីការធ្វើជំនួញជាមួយសហភាពអឺរ៉ុប និងស្របពេលដែលក្រុមហ៊ុនធំៗត្រូវពិចារណាឡើងវិញអំពីការសហការរបស់ពួកគេជាមួយអង់គ្លេស។
៣. សេដ្ឋកិច្ចដើរថយក្រោយ៖ ធនាគារអង់គ្លេសនិងមូលនិធិរូបិយវត្ថុអន្តរជាតិ (IMF) និយាយថាលទ្ធផលប្រជាមតិនេះនឹងធ្វើឲ្យសេដ្ឋកិច្ចអង់គ្លេសដើរថយក្រោយ។ អ្នកជំនួញមួយចំនួននិយាយថាពួកគេនឹងពិចារណាឡើងវិញពីការវិនិយោគនៅអង់គ្លេសហើយដំណើរការដ៏រញ៉េរញ៉ៃនៃការចាកចេញរបស់អង់គ្លេសពីសហភាពអឺរ៉ុបនឹងធ្វើឲ្យស្ថានការណ៍កាន់តែលំបាក។
៤. អត្រាបាត់បង់ការងារ៖ ដំណើរការ Brexit នឹងអាចឲ្យការងារជាច្រើនសែនតំណែងត្រូវរង្គោះរង្គើ។ ការដើរថយក្រោយនៃសេដ្ឋកិច្ចនឹងធ្វើឲ្យអត្រាគ្មានការងារកើនឡើងខ្ពស់ ហើយធនាគារនិងក្រុមហ៊ុនធំៗមួយចំនួនក៏អាចនឹងត្រូវដោះដូរបុគ្គលិកទៅកាន់អាល្លឺម៉ង់ ឬបារាំងដើម្បីចៀសវាងការរំខាន់មុខជំនួញរបស់ពួកគេនៅអឺរ៉ុប។
៥. ការកើនឡើងពន្ធនិងបន្ថយការចំណាយ៖ រតនាគារអង់គ្លេសនិយាយថាភាពចលាចលនៃសេដ្ឋកិច្ចនឹងធ្វើឲ្យថវិការជាតិមានការខ្វះខាត ដែលគេនឹងត្រូវតំឡើងពន្ធ និងកាត់បន្ថយការចំណាយដើម្បីបំពេញចន្លោះខ្វះខាតនោះ។
ហេតុអ្វីពិភពលោកទាំងមូលត្រូវខ្វល់ខ្វាយពីរឿងនេះ?
អង់គ្លេសគឺជាមហាអំណាចសេដ្ឋកិច្ចទី៥ក្នុងពិភពលោក។ ការធ្លាក់ចុះសេដ្ឋកិច្ចនៃប្រទេសនេះនឹងមានការប៉ះពាល់ខ្លាំងលើការរីកចម្រើននៃពិភពលោក។
បញ្ហានេះនឹងធ្វើឲ្យមានភាពរំជើបរំជួលនៅអឺរ៉ុប ដែលកំពុងជួបបញ្ហាសេដ្ឋកិច្ចនិងអត្រាគ្មានការងារធ្វើខ្ពស់ ហើយនឹងត្រូវប្រឈមមុខនឹងវិបត្តិជនភៀសខ្លួនធំបំផុតចាប់តាំងពីសង្គ្រាមលោកលើកទីពីរ។
ការធ្លាក់ចុះនៃទីផ្សារភាគហ៊ុននឹងកើតឡើងមិនត្រឹមតែក្នុងតំបន់អឺរ៉ុប ប៉ុន្តែគឺជុំវិញសាកលលោក។ រយៈពេលតែមួយថ្ងៃទីផ្សារភាគហ៊ុនសាកលលោកបានខាតបង់អស់ ២,១ទ្រីលានដុល្លារ ដែលជាការគំរាមកំហែងធំមួយសម្រាប់សេដ្ឋកិច្ចពិភពលោក។ ភាគហ៊ុនអាមេរិកអាចនឹងរងផលប៉ះពាល់ដោយសារការរីកចម្រើនយឺតជាសាកល និងដំណើររាំងស្ទះរបស់ក្រុមហ៊ុនអាមេរិកនានានៅអឺរ៉ុប។
ក្រុមហ៊ុនធំៗជាច្រើនលើពិភពលោកមានទីស្នាក់ការរបស់ខ្លួននៅអង់គ្លេស សម្រាប់ទីផ្សារអឺរ៉ុបទាំងមូល។ ពួកគេអាចនឹងត្រូវបង្ខំចិត្តផ្លាស់ប្ដូរមនុស្ស និងដំណើរប្រតិបត្តិការទៅកាន់ប្រទេសអឺរ៉ុបដទៃទៀតដើម្បីងាយស្រួលប្រឡូកចូលក្នុងទីផ្សារទាំងនោះ។
ការចាកចេញរបស់អង់គ្លេសពីអឺរ៉ុបអាចនឹងបង្កឲ្យមានអស្ថេរភាពនយោបាយកាន់តែខ្លាំងនៅអង់គ្លេស និងអឺរ៉ុប។ នាយករដ្ឋមន្ត្រីអង់គ្លេស David Cameron បានប្រកាសលាលែងពីតំណែង ប្រទេសស្កុតឡែនអាចនឹងទាមទារឯករាជ្យពីអង់គ្លេសជាលើកទីពីរ ហើយក្រុមប្រឆាំងសហភាពអឺរ៉ុបនៅបណ្ដាប្រទេសផ្សេងៗទៀតនឹងមានកម្លាំងកាន់តែខ្លាំង ៕
ចុចអាន៖៥ចំណុចគួរដឹងពីការធ្វើប្រជាមតិបោះឆ្នោតរបស់អង់គ្លេសចាកចេញពី EU
ប្រែសម្រួល៖ វ៉ាន់ថន ប្រភព៖ cnn
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
