កញ្ចក់ Gorilla ជំនាន់ថ្មីទោះធ្លាក់ពីកម្ពស់ ១,៦ ម៉ែត្រ ក៏មិនបែកប្រេះ

2016-07-21 14:24:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Corning ទើបបង្ហាញកញ្ចក់ជំនាន់ថ្មីម៉ូដែល Gorilla Glass 5 សម្រាប់បំពាក់លើទូរសព្ទ ដោយមានភាពរឹងមាំជាងមុន ទោះធ្លាក់ពីកម្ពស់ ១,៦ ម៉ែត្រ ក៏គ្មានបញ្ហា។

តាមការសិក្សាថ្មីនេះរបស់ Corning បានបង្ហាញថាអ្នកប្រើទូរសព្ទលើសពី ៨៥% តែងធ្លាក់ទូរសព្ទយ៉ាងហោចណាស់មួយដង ក្នុងមួយឆ្នាំ។ ក្នុងនោះ ៥៥% ផ្សេងទៀតធ្លាក់ទូរសព្ទ បីដង ឬ លើសពីបីដង ក្នុងមួយឆ្នាំ។ ការសិក្សាដដែលបង្ហាញថា ៦០% នៃអ្នកប្រើប្រាស់ទូរសព្ទ គឺធ្លាក់ទូរសព្ទពីកម្ពស់ស្មា និង ចង្កេះ ដែលអាចសន្និដ្ឋានបានថាកើតឡើងនៅពេលពួកគេដកទូរសព្ទចេញពីហោប៉ៅនិងពេលថតរូប។

ផ្អែកតាមការសិក្សាខាងលើនេះទើបក្រុមហ៊ុន Corning ព្យាយាមបង្កើតកញ្ចក់អេក្រង់ជំនាន់ថ្មី Gorilla Glass 5 ដែលអាចនឹងដោះស្រាយបញ្ហានៃការសិក្សាខាងលើបាន។ តាមការធ្វើតេស្តសាកល្បងបង្ហាញថាមានភាគរយប្រមាណ ៨០% ដែលកញ្ចក់ Gorilla Glass 5 អាចទ្រាំទ្រនឹងការធ្លាក់ទៅលើផ្ទៃរឹង ពីកម្ពស់ ១,៦ ម៉ែត្របាន។ Gorilla Glass 5 រំពឹងថានឹងត្រូវគេយកទៅប្រើប្រាស់ក្នុងការផលិតទូរសព្ទចាប់ពីចុងឆ្នាំ ២០១៦ នេះ៕

ចុចអាន៖ ពីក្នុង Data Center ដ៏ធំមហិមារបស់ក្រុមហ៊ុន Facebook

ប្រែសម្រួល៖ ហៃ សុខហេង ប្រភព៖ PhoneArena