គ្រូ U16 វៀតណាម សរសើរសមត្ថភាពកីឡាករកម្ពុជា ២នាក់មិនដាច់ពីមាត់

2016-07-22 16:51:25
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Dinh The Nam គ្រូបង្វឹកក្រុមយុវជនវៀតណាម បានសរសើរពីទម្រង់លេងរបស់កីឡាករកម្ពុជា២នាក់គឺ ម៉ៅ ពិសិដ្ឋ និង ទៀត គឹមហេង ក្រោយបញ្ចប់ការប្រកួតដែលក្រុមរបស់លោកយកឈ្នះយុវជនកម្ពុជា ១-០ នៃការប្រកួតពានរង្វាន់ AFF Smart U-16 Championship 2016 វគ្គពាក់កណ្ដាលផ្ដាច់ព្រ័ត្រកាលពីយប់មិញនេះ។

គ្រូបង្វឹកមានសញ្ជាតិវៀតណាមរួបនេះ បានឲ្យដឹងថា លោកមើលឃើញយុវជនរបស់កម្ពុជាចំនួនពីរនាក់ ដែលយល់ថា ពួកគេមានសមត្ថភាពខ្ពស់ នឹងពិតជាធ្វើបានល្អកាលពីយប់មិញនេះ។ ម្នាក់ពាក់លេខ១៤ ( ម៉ៅ ពិសិដ្ឋ) និងម្នាក់ទៀតពាក់លេខ ២៣ (ទៀត គឹមហេង) ក្រៅពីកីឡាករទាំងពីរនេះ គ្រប់គ្នាលើទីលានពិតជាសហការគ្នាបានល្អផងដែរ។

Dinh The Nam បន្ថែមថា កីឡាករទាំងពីរនាក់នេះ មានសមត្ថភាពបោះបាល់ឲ្យមិត្តរួមក្រុម និងអូសបាល់បានល្អ។ អនាគតវិស័យបាល់ទាត់នៅកម្ពុជា នឹងខ្លាំង ដោយសារថ្នាលយុវជនខ្លាំង និងមានអ្នកគាំទ្រពោរពេញដោយចិត្តស្រលាញ់បាល់ទាត់ដូចនេះ។ ចំណែកជំនួបយុវជនថៃ ប្រសិនបើយុវជនកម្ពុជាចង់ឈ្នះ ដណ្ដើមលេខ៣បាន លុះត្រាតែប្រើវិធីការពារដើម្បីវាយបក។

ទៀត គឹមហេង(លេខ ២៣) ជាកីឡាករមានដើមកំណើតមកខេត្តព្រះសីហនុ និងជាយុវជនជម្រើសជាតិកម្ពុជា ដែលប្រមូលផ្ដុំហ្វឹកហាត់នៅមជ្ឈមណ្ឌលជាតិបាទីខេត្តតាកែវ។ ចំណែក ម៉ៅ ពិសិដ្ឋ (ពាក់លេខ ១៤ )ជាយុវជនរបស់ក្លឹបបាល់ទាត់ភ្នំពេញក្រោន ដែលត្រូវបានលោក Inoue Kazunori កោះហៅឲ្យចូលជម្រើសជាតិ។