ម្ចាស់ពុម្ពអក្សរខ្មែរម្នាក់ប្រាប់គន្លឹះបង្កើតពុម្ពអក្សរថ្មីៗដោយខ្លួនឯង

2016-07-27 23:58:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោមហេតុផលចំណូលចិត្ត និងចង់ចួលរួមលើកស្ទួយការប្រើប្រាស់អក្សរខ្មែរឲ្យកាន់តែផុសផុលសម្បូរបែប លោក ម៉ៅ ពិសិដ្ឋ បានលះបង់ពេលវេលាផ្ទាល់ខ្លួនជាច្រើនដើម្បីច្នៃប្រឌិតបង្កើតពុម្ពអក្សរខ្មែរយូនីកូដថ្មីៗមួយចំនួន។

អតីតមន្ត្រីផ្នែកទំនាក់ទំនងនៃអង្គការក្រៅរដ្ឋាភិបាលដែលបានបង្កើតពុម្ពអក្សរខ្មែរឲ្យប្រើប្រាស់ជាសាធារណៈរូបនេះបានប្រាប់ពីគន្លឹះនៃការបង្កើតពុម្ពអក្សរខ្មែរយូនីកូដ ជាមួយក្រុមការងារ Sabay ខាងក្រោមនេះ៖ 1.ហេតុអ្វីបានជាលោកនឹកចង់បង្កើតពុម្ពអក្សរខ្មែរ? បង្កើតនៅឆ្នាំណា ? ខ្ញុំចាប់ផ្តើមរៀនបង្កើតពុម្ពអក្សរតាំងពីឆ្នាំ ២០០៦ មកម្ល៉េះតែពេលនោះខ្ញុំធ្វើតែពុម្ពអក្សរឡាតាំង និង Limon ប៉ុណ្ណោះ ហើយក៏មិនបានចែកចាយឲ្យបានទូលំទូលាយដូចពុម្ពក្រោយៗព្រោះពេលនោះការប្រើអ៊ីនធ័រណិតនៅមានកម្រិតនៅឡើយ។ ដល់ឆ្នាំ២០១០ទើបខ្ញុំចាប់ផ្តើមបង្កើតពុម្ពខ្មែរយូនីកូដ ដោយសារតែខ្ញុំចូលចិត្តរបៀបវាយអក្សរថ្មីនេះ ម្យ៉ាងវិញទៀតពុម្ពអក្សរមានស្រាប់ នៅខ្វះតួអក្សរឡាតាំងដែលស៊ីគ្នានឹងទម្រង់អក្សរខ្មែរកំពុងប្រើហើយក៏មានពុម្ពខ្លះរហូតគ្មានតួអក្សរឡាតាំងទៀតផង ហេតុផលមួយទៀតគឺខ្ញុំនៅតែស្រឡាញ់ពុម្ពអក្សរ Limon ឬ ABC មួយចំនួន ដូច្នេះខ្ញុំចង់ឲ្យវាក្លាយជាពុម្ពខ្មែរយូនីកូដ ដើម្បីអាចវាយតាមរបៀបខ្មែរយូនីកូដដែរ។ 2.តើការបង្កើតពុម្ពអក្សរខ្មែរពិបាកដែរទេ ? ត្រូវការធនធានអ្វីខ្លះ? ចំណុចពិបាកមួយគឺពុម្ពអក្សរយូនីកូដមានតួអក្សរ (Glyph)ច្រើនជាង Legacy (Limon ឬ ABC) រហូតដល់ខ្ទង់ពាន់អាស្រ័យលើថាតើយើងធ្វើពុម្ពអក្សរនេះឲ្យមានលក្ខណៈសម្បូរបែបឬអត់ ជាពិសេសគឺនិមិត្តសញ្ញាជាច្រើនក្នុងផ្នែកឡាតាំង។ ក្នុងពុម្ពអក្សរខ្មែរយូនីកូដ យើងត្រូវរៀបបណ្តុំអក្សរជាច្រើនទុកឲ្យហើយ ដូចជា ក និង កា ត្រូវធ្វើពីរដងផ្សេងគ្នានេះហើយជាហេតុផលដែលយើងវាយតួប្រកបខ្លះក្រោយសោះ បែរជាចេញនៅខាងមុខបាន ឧ. [មេ] យើងវាយ [ម+េ] តែវាអាចចេញជា [មេ] បាន។ ចំពោះធនធានគឺមិនមានអ្វីក្រៅតែពីកុំព្យូទ័រដែលអាចដំណើរការប្រព័ន្ធWindows។ សម្រាប់កុំព្យូទ័រ Mac អាចប្រើកម្មវិធីផ្សេងបាន ដូចជា Font Lab ជាដើម។ធនធានសំខាន់ជាងគេគឺភាពអំណត់ និងការស្រឡាញ់/ចំណូលចិត្តបើមិនមានធនធានទាំងពីរនេះទេ អ្នកនឹងបោះបង់វាចោលកណ្តាលទីមិនខាន។ 3.បង្កើតពុម្ពអក្សរដោយរបៀបណាខ្លះ? ការពិតមានកម្មវិធីច្រើនសម្រាប់ធ្វើ តែខ្ញុំប្រើកម្មវិធី Logic Font Creator ហើយចំពោះការគូរតួអក្សរមានពេលខ្លះខ្ញុំគូរផ្ទាល់នៅក្នុងកម្មវិធីតែម្តង ឬធ្វើក្នុងកម្មវិធីឌីហ្សាញមួយចំនួន ដូចជា Illustrator, Corel Draw, Photoshop ឬសរសេរដោយដៃលើក្រដាសរួចScan ចូល ឬអាចប្រើកម្មវិធីគូរផ្សេងៗលើស្មាតហ្វូនជាដើម រួចទាញវាចូលទៅក្នុងកម្មវិធីណាមួយខាងលើ។ ជាការងាយគួរជ្រើសរើសគំរូពុម្ពណាដែលដើរបានល្អស្រាប់ រួចយកមកកែច្នៃតាមចិត្ត អាចយកពុម្ពខ្ញុំប្រើដោយសេរីបាន។ 4.តើលោកចំណាយពេលប៉ុន្មានដើម្បីបង្កើតពុម្ពអក្សរខ្មែរនិមួយៗ? មកដល់ពេលនេះ បង្កើតបានប៉ុន្មានហើយ? តាមអារម្មណ៍ បើចង់ខ្លាំង ២ទៅ៣ថ្ងៃរួចមួយហើយ តែបើខ្ជិល អាច១អាទិត្យ ឬ១ខែក៏មាន។ ពុម្ពអក្សរខ្មែរយូនីកូដត្រកូល Kh MPS ខ្ញុំធ្វើបាន៧ហើយ។ 5.តើក្រៅពីបង្កើតពុម្ភអក្សរខ្មែរ លោកគ្រោងធ្វើអ្វីទៀតទេទាក់ទងនឹងបច្ចេកវិទ្យានេះ ? ក្រៅពីការបង្កើតពុម្ពអក្សរខ្មែរយូនីកូដ ខ្ញុំក៏កំពុងចូលរួមសរសេរអត្ថបទវិគីភីឌាជាភាសាអង់គ្លេស បកប្រែ Facebook ជាភាសាខ្មែរ បន្ថែមការបកប្រែទៅក្នុង Google Translate ព្រមទាំងកម្មវិធី Open Source និងវ៉ិបសៃថ៍មួយចំនួន មកជាភាសាខ្មែរ។ បញ្ចូលទីតាំងសំខាន់ៗមួយចំនួនចូលក្នុង Google Map និងសរសេរ Review ជាច្រើនសម្រាប់ Trip Advisor។ ថ្មីៗនេះខ្ញុំក៏បានរៀបចំពុម្ពអក្សរខ្មែរមួយចំនួនដែលអនុញ្ញាតឲ្យអ្នកប្រើប្រាស់អាចដាក់លេខរៀង ឬលេខទំព័រជាលេខខ្មែរ (0១២៣៤៥៦៧៨៩) ជំនួសឲ្យលេខអារ៉ាប់ ដែលយើងនិយមហៅថាលេខសកល (0123456789)។ ខ្ញុំនឹងកាត់បន្ថយការបង្កើតពុម្ពអក្សរ ដោយខ្ញុំនឹងផ្តោតទៅលើដំណោះស្រាយបញ្ហាដែលទាក់ទងនឹងខ្មែរយូនីកូដ ព្រោះខ្ញុំគិតថាមានពុម្ពច្រើនហើយ ម្យ៉ាងក៏មានអ្នកបង្កើតច្រើនដែរ។ 6.តើលោកមានអ្វីចង់និយាយទៅមិត្តអ្នកអានដែរទេ ? -ចំពោះអ្នកចូលចិត្តបង្កើតពុម្ពអក្សរ និងអ្នកមានបំណងចង់ចាប់ផ្តើម ពេលធ្វើពុម្ពអក្សរខ្មែរយូនីកូដ សូមកុំភ្លេចបញ្ចូលពុម្ពអក្សរឡាតាំងដែលមានរូបរាងស៊ីគ្នានឹងអក្សរខ្មែរក្នុងពុម្ពនោះផង ដើម្បីពេលប្តូរKeyboard (Switch Keyboard) ទៅឡាតាំងកុំឲ្យចេញម៉ូដអក្សរផ្សេងដែលមិនស៊ីគ្នា។ -ចំពោះមិត្តអ្នកអានទូទៅ សូមព្យាយាមប្រើប្រាស់អក្សរខ្មែរឲ្យបានច្រើនពេលសរសេរនៅលើបណ្តាញទំនាក់ទំនងសង្គម ជាពិសេសនៅលើ Facebook ដោយកាត់បន្ថយការសរសេរសំនៀងខ្មែរជាឡាតាំង ព្រោះថាការធ្វើបែបនេះយូរៗទៅ លោកអ្នកនឹងខ្សោយទាំងភាសាខ្មែរ និងអង់គ្លេស។ ប្រិយមិត្តអាចទាញយកពុម្ពអក្សរយូនីកូដបង្កើតឡើងដោយលោក ពិសិដ្ឋ បាននៅទីនេះ https://goo.gl/LcY1OV៕ អត្ថបទៈ លីដា

អត្ថបទពេញនិយម

ព្យាករណ៍អាកាសធាតុ! ខែក្រោយនេះ កម្ពុជានឹងមានមានភ្លៀងធ្លាក់ហើយ

បើអត្តសញ្ញាណប័ណ្ណ របក ខូច ឬផុតសុពលភាព អាចទៅធ្វើថ្មីនៅទីតាំងមួយនេះបាន

ចូលឆ្នាំខ្មែរបានសប្បាយជួបជុំហើយ បានទាំងរង្វាន់ពីគ្រុឌឈ្នះផ្អើលពេញភូមិ

ដឹងទេ! បច្ចុប្បន្ន កម្ពុជា កំពុងសម្រុកសាងសង់ស្ពានធំៗចំនួន៣

Dispatch ហែកកកាយទង្វើ Min Hee Jin ព្យាយាមក្ដោប NewJeans និងលាភសក្ការៈពី HYBE

សម្តេចតេជោ បានជួយ ១០ម៉ឺនដុល្លារ ដើម្បីព្យាបាលលោកសាស្រ្តាចារ្យ សំបូរ ម៉ាណ្ណារ៉ា ប៉ុន្តែនៅមិនអាចសង្គ្រោះបាន

អត្ថបទថ្មី

ទស្សនាការសម្ដែងក្បាច់គុនសៅលីញដ៏កម្រលើទឹកដីសៀមរាប

Neymar នៅតែរក្សាកំណត់ត្រាខ្សែប្រយុទ្ធមានតម្លៃខ្លួនខ្ពស់បំផុត ក្នុងប្រវត្តិសាស្ត្រដោះដូរកីឡាករ

Arteta សរសើរ Kai Havertz មិនដាច់ពីមាត់ក្រោយ Arsenal ឈ្នះ Chelsea ៥-០

ជៀសវាងជួបបញ្ហាដដែរៗ សុរ៉ាវឌ្ឍី បង្ហាញមុខបុគ្គល៥នាក់ ដែលអាចមានសិទ្ធផាត់មុខឱ្យខ្លួន

អស់ការអត់ធ្មត់! ណូយ វ៉ាន់ណេត ឲ្យមេធាវីសហការជាមួយមន្ដ្រីក្រសួងមហាផ្ទៃ ចាត់ការអ្នកប្រមាថជីវិតលោក

Panasonic ប្រកាសនូវកិច្ចសហការថ្មីជាមួយក្លិបបាល់ទាត់ Angkor Tiger Siem Reap សម្រាប់រដូវកាលបាល់ទាត់កម្ពុជា 2024/26 ខាងមុខនេះ