ធ្វើយ៉ាងណា ដើម្បីក្លាយជាតួឯកវីដេអូ “ស្រទន់មន្តស្នេហ៍”?

2016-07-27 23:36:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រលោមលោកមនោសញ្ចេតនាដ៏ល្បី “ស្រទន់មន្តស្នេហ៍” ដែលគ្រោងនឹងប្រែខ្លួនមកជាវីដេអូភាគទូរទស្សន៍នោះ ពេលនេះកំពុងបើកផ្លូវឲ្យយុវវ័យ ក្លាយជាតួសម្ដែង ដោយជាដំបូងអាចមកសាកល្បងបានជាមួយនឹងលក្ខខ័ណ្ឌងាយៗ។

បើតាមជំនួយការទូទៅរបស់ក្រុមការងារ Studio4 កញ្ញា សម្ផស្ស បានបញ្ជាក់ប្រាប់ Sabay ថា មិនមែនតែតារាអាជីពទេ សូម្បីតែសិស្សនិស្សិត ឬអ្នកធ្វើការគ្រប់ស្រទាប់វណ្ណៈដែលមានរូបសម្រស់សមរម្យ ក៏អាចមកទទួលការធ្វើតេស្ដ(Casting) ដើម្បីអាចជាប់ក្នុងការជ្រើសរើសក្លាយជាតួសម្ដែងក្នុងវីដេអូភាគទូរទស្សន៍ ដែលប្រែក្លាយពីប្រលោមលោកដ៏ល្បីប្រចាំឆ្នាំរឿង "ស្រទន់មន្តស្នេហ៍" ដែរ។ យ៉ាងនេះក្ដី ជំនួយការរូបនេះ សង្កត់ធ្ងន់ថា គ្រប់គ្នា ត្រូវមានសមត្ថភាពគ្រប់គ្រាន់ក្នុងរឿងថ្មីនេះ ទើបអាចជាប់ជម្រើស ព្រោះពុំនោះទេ មិនអាចសម្ដែងដល់កម្រិតអត្តចរិត ឬកពាររបស់តួអង្គក្នុងសាច់រឿងឡើយ។

វិលមកលក្ខខណ្ឌសម្រាប់យកឱកាសចូលសម្ដែងសាកល្បង ខាងក្រុមការងារបានកំណត់លក្ខខ័ណ្ឌងាយៗដែលអាចឲ្យប្រិយមិត្តក្លាយជាតួឯក ឬតួផ្សេងៗទៀតនោះតាមការកំណត់ខាងក្រោម៖

-មានរូបថតមួយជំហរខ្លួន -មានប្រវត្តិរូបសង្ខេប(CV) -ប្រាប់ពីតំណែងតួដែលចង់សម្ដែង -បើមានបទពិសោធន៍ខ្លះៗកាន់តែប្រសើរ ហើយភ្ជាប់ជាមួយ CV ដោយមកដាក់នៅ Studio4 តែម្ដង តាមអាសយដ្ឋានផ្ទះលេខ ៣០ ផ្លូវ ២៦១ សង្កាត់បឹងសាឡាង ខណ្ឌទួលគោក រាជធានីភ្នំពេញ និងតាមរយៈលេខ ០២៣ ៦៣ ២៣ ៣៦៣ ឬផ្ញើទៅកាន់ Inbox របស់ Page Studio4 តែម្ដង។ មួយវិញទៀតប្រិយមិត្ត ក៏អាចផ្ញើជា E-mail បានដូចគ្នា តាមអាសយដ្ឋានខាងក្រោម ក្រុមការងារនឹងពិនិត្យ មុនពេលកោះហៅឲ្យចូលសាកល្បង៖

-admin@ Studio4kh.com

-contact@ Studio4kh.com

-jobs@ Studio4kh.com

លោក ជ័យ សម្បត្តិ អ្នកដឹកនាំរឿងនេះធ្លាប់និយាយថា ដំណើរការធ្វើតេស្តសាកល្បងសមត្ថភាពតួមានរយៈពេលពេញមួយខែសីហាតែម្ដង ដែលការជ្រើសរើសនេះ នឹងត្រូវប្រព្រឹត្តទៅយ៉ាងហ្មត់ចត់បំផុត ព្រោះសាច់រឿង ត្រូវការតួអង្គនីមួយៗមានសមត្ថភាព និងជំនាញខ្ពស់ ទើបអាចបំពេញតាមរូបារម្មណ៍តួអង្គក្នុងសាច់រឿងបាន៕

វីដេអូភាគទូរទស្សន៍ "ស្រទន់មន្តស្នេហ៍" ត្រូវបានដាក់ផែនការផលិត បន្ទាប់ពីរឿងនេះ ទទួលបានការគាំទ្រខ្លាំងក្នុងនាមជាប្រលោមលោកមនោសញ្ចេតនាយុវវ័យ។ យោងតាមសក្ដានុពលដែលមានស្រាប់ Sabay Digital Corp. និងក្រុមហ៊ុន CBS(Cambodia Broadcasting Service) ដែលកាន់កាប់ប៉ុស្តិ៍ទូរទស្សន៍ CTN, MyTV និង CNC បានសហការវិនិយោគជាមួយគ្នា ជាមួយកញ្ចប់ថវិកាជាច្រើនសែនដុល្លារអាមេរិក។ Studio 4 ដែលមានស្នាដៃល្អៗជាច្រើនលើវិស័យថតភាពយន្ត និងប្រភេទនៃការថតផ្សេងទៀត ជាភាគីទី៣ ដែលចូលខ្លួន មកធ្វើជាអ្នកដឹកនាំការថត។

តាមលោក មាស រស្មី តំណាងផលិតកម្ម Studio 4 បច្ចុប្បន្ន "ស្រទន់មន្តស្នេហ៍" កំពុងស្ថិតនៅដំណាក់កាលបើកឱកាសឲ្យយុវវ័យចូលសម្ដែងសាកល្បង(Casting)។ឯសកម្មភាពចេញថតរឿងតែម្ដង គឺនាដើមខែកញ្ញា ២០១៦ខាងមុខ៕

អត្ថបទ៖ទ្រី រ៉ាវី