ខុនដូប្រណីតមួយមានអាគារលក់ផ្ដាច់សម្រាប់តែជនជាតិខ្មែរ
- 2016-07-29 23:58:53
- ចំនួនមតិ 0 | ចំនួនចែករំលែក 0
ខុនដូប្រណីតមួយមានអាគារលក់ផ្ដាច់សម្រាប់តែជនជាតិខ្មែរ
ចន្លោះមិនឃើញ
ខុនដូភាគច្រើនមានគោលដៅលក់សម្រាប់ជនបរទេសច្រើនជាងជនជាតិខ្មែរ តែសម្រាប់ខុនដូថ្មីមួយនៅភាគខាងត្បូងនៃទីក្រុងភ្នំពេញនេះវិញ បែរជាលក់សម្រាប់តែជនជាតិខ្មែរ និងអាចបង់រំលោះបានទៀតផង ដើម្បីផ្ដល់ជូនដល់ប្រជាជនខ្មែរអាចរស់នៅបែបស្តង់ដាក្នុងស្ទីលថ្មីបែបស៊ីវីល័យ។
បើតាមកញ្ញា ឆឹង សុធារ៉ា ប្រធានផ្នែកលក់នៃគម្រោងខុនដូ Sino Plaza បានប្រាប់ថា ក្នុងចំណោម ៤អគារទាំងអស់ដែលSino plaza មាន គឺមានអគារC មួយមិនលក់ជូនជនបរទេសទេ ពោលគឺលក់ជូនតែជនជាតិខ្មែរប៉ុណ្ណោះ។ ប្រជាជនខ្មែរភាគច្រើនមិនសូវមានទំនោររស់នៅក្នុងខុនដូទេ គឺច្រើនចាប់អារម្មណ៍លើផ្ទះល្វែងជាង ដែលនេះមិនមែនជាស្ទីលថ្មីសម្រាប់មនុស្សជំនាន់ថ្មីឡើយ។
អគារ C នោះមាន 585 unit លើផ្លូវមុនីវង្ស ក្នុងសង្កាត់បឹងត្របែក ខណ្ឌចំការមន។ កញ្ញាបញ្ជាក់ថា សម្រាប់អ្នកមានជីវភាពនិងចំណូលសមរម្យគឺមានភាពងាយស្រួលក្នុងការទទួលបានការស្នាក់នៅបែបសមរម្យជាមួយខុនដូដែលចាយទុនជាង២០០លានដុល្លារនេះ។ ចំពោះតម្លៃជាមធ្យមគឺ ២១០០ដុល្លារក្នុង១មែត្រការ៉េនិងមាន២បន្ទប់គេង។
បើផ្អែកតាម លោក ចេង ខេង អគ្គនាយកក្រុមហ៊ុនអចលនទ្រព្យកម្ពុជា CPL និង ជាអតីតប្រធានសមាគមអ្នកវាយតម្លៃ និង ភ្នាក់ងារអចលនទ្រព្យកម្ពុជា បានអះអាងថា មិនយូរទេ ៥-១០ ឆ្នាំខាងមុខ ការរស់នៅខុនដូនឹងពេញនិយមជាងផ្ទះល្វែង និងវីឡានៅស្រុកខ្មែរ។ វាជាស្ទីលថ្មីសម្រាប់ការរស់នៅដែលផ្ដល់អត្ថប្រយោជន៍ច្រើន ហើយលោកជឿថា ចំពោះប្ដី-ប្រពន្ធថ្មីថ្មោងមានការងារធ្វើ ខុនដូជាជម្រើសល្អមួយសម្រាប់ពួកគាត់៕
អត្ថបទ៖ លឹម សុនា