សក្ដានុពល Google និង Facebook ជំរុញទឹកចិត្តយុវជនខ្មែរពីររូបប្រាថ្នាចង់ទៅធ្វើការ

2016-08-10 16:37:31
ចំនួនមតិ 0 | ចំនួនចែករំលែក 0

ចន្លោះមិនឃើញ

Google និង Facebook សុទ្ធតែជាក្រុមបច្ចេកវិទ្យាយក្សផ្តល់ចំណូលដល់បុគ្គលិករាប់ម៉ឺនដុល្លារមួយឆ្នាំៗ ថែមទាំងផ្តល់បទពិសោធន៍ការងារប្លែកនិងការប្រកួតប្រជែងខុសពីក្រុមហ៊ុនបច្ចេកវិទ្យាដទៃទៀតលើពិភពលោក។ មូលហេតុនេះទើបជំរុញទឹកចិត្តយុវជន IT ខ្មែរពីររូបប្រាថ្នាដាក់ពាក្យធ្វើការ ដើម្បីមានឱកាសអភិវឌ្ឍសមត្ថភាព។

បូរិត ជាប់អាហារូបករណ៍ទៅសិក្សាផ្នែក Programing Language នៅកូរ៉េ

បូរិត អតីតនិស្សិតផ្នែក IT នៅសាកលវិទ្យាល័យភូមិន្ទភ្នំពេញនិងបច្ចុប្បន្នកំពុងត្រៀមខ្លួនទៅបន្តការសិក្សាផ្នែកវិទ្យាសាស្ត្រកុំព្យូទ័រនៅកូរ៉េខាងត្បូងក្នុងពេលដ៏ឆាប់ខាងមុខ ឲ្យដឹងថា ក្រោយទទួលបានបទពិសោធន៍ច្រើនខាងផ្នែក ភាសាសរសេរកម្មវិធីនៅកូរ៉េ ទីប្រាថ្នាដែលគេចង់ធ្វើការគឺក្រុមហ៊ុន Google បើលទ្ធភាពរួច ។

បូរិត បញ្ជាក់ថា ក្រុមហ៊ុន Google បានបង្កើតធនធានមនុស្សយ៉ាងច្រើនហើយបច្ចេកវិទ្យាបង្កើតកន្លងមកប្រកបដោយភាពច្នៃប្រឌិតនិងតែងមានការគាំទ្រពីមនុស្សរាប់លាននាក់ទូទាំងពិភពលោក។ ក្រៅពីនេះ ប្រាក់ខែក៏ជារឿងមួយដែលធ្វើឲ្យរូបគេរឹតតែចង់ធ្វើការនៅក្រុមហ៊ុនមួយនេះ។

តាំង ម៉េង អ្នកបង្កើតកម្មវិធី Android នៅសិង្ហបុរី

ដោយឡែកសម្រាប់ តាំង ម៉េង ដែលបច្ចុប្បន្នកំពុងបម្រើការងារនៅក្រុមហ៊ុនបច្ចេកវិទ្យាក្នុងប្រទេសសិង្ហបុរី ឲ្យដឹងថា Google និង Facebook សុទ្ធតែជាទីកន្លែងខ្លួនចង់ទៅធ្វើការ ព្រោះក្រុមហ៊ុនទាំងពីរនេះសុទ្ធតែផ្តល់តួនាទីល្អៗសម្រាប់អ្នកបង្កើតកម្មវិធី Android។ ម្យ៉ាងទៀតធ្វើការនៅក្រុមហ៊ុនទាំងនេះ មានឱកាសប្រកួតប្រជែងខ្លាំង និងមានភាពច្នៃប្រឌិតច្រើន ក្នុងការរកដំណោះស្រាយសម្រាប់អ្នកប្រើប្រាស់ទូទាំងពិភពលោក។

តាមពិត តាំង ម៉េង ធ្លាប់បានដាក់ពាក្យធ្វើការនៅក្រុមហ៊ុនទាំងពីរនេះកន្លងមកដែរ តែពុំទាន់មានការឆ្លើយតបណាមួយមកវិញឡើយ។ យ៉ាងណាអ្នកបង្កើតកម្មវិធី Android នេះ ពុំទាន់អស់សង្ឃឹមនៅឡើយទេ និងបានប្តេជ្ញាប្រឹងប្រែងអភិវឌ្ឍខ្លួនបន្ថែមទៀត ដើម្បីមានលទ្ធភាពគ្រប់គ្រាន់ដែលអាចឲ្យ Google ឬ Facebook ជ្រើសរើសគេជាបុគ្គលិក៕

អាន៖ តាំង ម៉េង៖ “ខ្ញុំនឹងដាក់ពាក្យម្តងហើយម្តងទៀត ឲ្យជាប់ការងារនៅ Facebook ឬ Google ”

អត្ថបទ៖ ប៉ែត ផាន់និត