ពុម្ពអក្សរខ្មែរលើ iOS 10 ផ្លូវការ នឹងត្រូវកែសម្រួលលែងបាត់ដៃជើងដូចមុន

2016-08-11 17:12:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ពុម្ពអក្សរខ្មែរលើ iPhone បំពាក់ iOS 10 នឹងដំណើរការត្រឹមត្រូវ ១០០ ភាគរយ លែងបាត់ដៃជើងឬជើងត្រួតជាន់គ្នា ដូចកាល iOS ជំនាន់មុនៗ។

បើតាម 4KhmeriPhone ដែលជាក្រុមត្រួសត្រាយផ្លូវស្នើសុំការដាក់អក្សរខ្មែរលើ iOS បានបញ្ជាក់ថា នាពេលថ្មីនេះពុម្ពអក្សរខ្មែរលើ iOS 10 Beta 5 ដំណើរការបានស្រួល លែងបាត់ឬត្រួតជើងអក្សរតទៅទៀត ក្រោយបានស្នើទៅកាន់ Apple រយៈពេលប្រហែលពីរឆ្នាំកន្លងមកនេះ។

ប្រធានក្រុមខាងលើ អះអាងថា ដំណើរការក្នុងការស្នើឲ្យ Apple ពិនិត្យនិងកែសម្រួលពីកំហុសអក្សរលើ iOS ត្រូវចំណាយពេលយូរគួរសម។ ក្រុមលោកត្រូវសហការជាមួយក្រុមហ៊ុនទទួលខុសត្រូវខាងផ្នែករៀបចំទម្រង់ Font សម្រាប់ Apple នៅម៉ាឡេស៊ី ហើយបញ្ជូនទម្រង់អក្សរត្រឹមត្រូវទៅក្រុមហ៊ុន Apple។ ឧទាហរណ៍ពាក្យ "ខ្ញុំ កម្ពុជា បញ្ញា កញ្ញា ក្នុង ឡុង សង្គ្រាម" ជាដើម ជើងតម្រួតលែងបាត់ឬជាន់គ្នាទៀតហើយ។

កំហុស (លើ) និងអក្សរត្រឹមត្រូវ (ក្រោម)

ជាក់ស្តែង ថ្មីនេះក្រុមហ៊ុនទទួលខុសត្រូវខាង Font នៅម៉ាឡេស៊ី បានកែសម្រួលកំហុសបាត់ជើងអក្សរនិងតម្រួតជើងអក្សរមិនឲ្យជាន់គ្នានោះទេ។ នេះបានន័យថា ពុម្ពអក្សរខ្មែរលើ iPhone នឹងលែងមានបញ្ហា ពេល iOS 10 ផ្លូវការចេញ។

ប្រធានក្រុម 4KhmeriPhone បន្ថែមថា ក្រុមលោកនឹងព្យាយាមសហការជាមួយក្រុមហ៊ុន Apple តទៅទៀតក្នុងការនាំអក្សរខ្មែរនិងក្ដារចុចត្រូវត្រូវពេញលក្ខណៈ ដើម្បីផ្តល់ភាពងាយស្រួលដល់ពលរដ្ឋខ្មែរក្នុងការប្រើប្រាស់ពេលអនាគត៕

ចុចអានព័ត៌មានអំពី 4KhmeriPhone Team

អត្ថបទ៖ ប៉ែត ផាន់និត