ដឹងអត់ថា ខ្សែក្រវាត់ សុខហ៊ុច ឈ្នះយប់មិញមានតម្លៃយ៉ាងណា?

2016-08-29 16:31:58
ចំនួនមតិ 0 | ចំនួនចែករំលែក 0

ចន្លោះមិនឃើញ

មុនពេលអ្នកលេងគុនខ្មែរ មឿន សុខហ៊ុច ឈ្នះខ្សែក្រវាត់យប់មិញនៅលើទឹកដីថៃ ទង់ជាតិ និងភ្លេងជាតិនៃព្រះរាជាណាចក្រត្រូវបានគោរពជាផ្លូវការមុនពេលការប្រកួតចាប់ផ្តើម ហើយអ្នកលេងគុនខ្មែរម្នាក់នេះបានធ្វើឲ្យពលរដ្ឋកម្ពុជាមានមោទនភាពចំពោះរូបគេ។ តើខ្សែក្រវាត់នេះមានតម្លៃបែបណា?

ខ្សែក្រវាត់កម្រិតប្រាក់

តាមប្រភពព័ត៌មានបានឲ្យដឹងថា ខ្សែក្រវាត់ដែល មឿន សុខហ៊ុច ឈ្នះយប់មិញជាប្រភេទខ្សែក្រវាត់កម្រិតប្រាក់។ កម្មវិធីប្រដាល់ Max Muay Thai បានកំណត់ការប្រកួតដណ្តើមខ្សែក្រវាត់មារ៉ាតុន៣ប្រភេទគឺមាស ប្រាក់ និងសំរឹទ្ធ។ ការប្រកួតដណ្តើមខ្សែក្រវាត់ត្រូវធ្វើឡើងពីកម្រិតសំរឹទ្ធរួចឈានចូលប្រាក់ និងមាស។ ទោះជាយ៉ាងណា កីឡាករដែលមានកម្រិតខ្ពស់ដូចជាព្រឹត្តិការណ៍ មឿន សុខហ៊ុចប្រកួតឈានចូលកម្រិតដណ្តើមខ្សែក្រវាត់ប្រាក់។

ប្រភពព័ត៌មានដដែលបានឲ្យដឹងថា Max Muay Thai បានរៀបចំកម្មវិធីប្រកួតដណ្តើមខ្សែក្រវាត់ដែល មឿន សុខហ៊ុចឈ្នះយប់មិញគឺជាកម្មវិធីទី១ និងត្រូវរៀបចំការប្រកួតដណ្តើមខ្សែក្រវាត់ប្រាក់៣ទៀតដើម្បីយកម្ចាស់ខ្សែក្រវាត់ទាំង៤ឡើងទៅប្រកួតដណ្តើមខ្សែក្រវាត់មាស។ ដូច្នេះ មឿន សុខហ៊ុចបានក្លាយជាបេក្ខភាពទី១ឡើងទៅប្រកួតដណ្តើមខ្សែក្រវាត់មាស។ ទោះជាយ៉ាងណា ព័ត៌មាននេះមិនទាន់ប្រាកដ១០០%នោះទេពោលគឺអាចប្រែប្រួល។

ខ្សែក្រវាត់កម្រិតពិភពលោក (World Champion) ទោះបីជាការប្រកួតរបស់ Max Muay Thai ជាលក្ខណៈកម្មវិធីប្រកួតរបស់ទូរទស្សន៍ ប៉ុន្តែទាំងពិធីករកម្មវិធី និងអេក្រង់ LED បានបង្ហាញយ៉ាងច្បាស់ថា ខ្សែក្រវាត់ដែល មឿន សុខហ៊ុចទទួលបាននេះជាលក្ខណៈពិភពលោក។ ពិធីករបានប្រកាសក្តែងៗថា World Champion ដូច្នេះមានន័យថា កីឡាករកម្ពុជារូបនេះឈ្នះខ្សែក្រវាត់ពិភពលោក។

ការប្រកួតដណ្តើមខ្សែក្រវាត់មារ៉ាតុននេះមានបេក្ខភាព៤នាក់ក្នុងនោះការប្រកួតជុំទី១ មឿន សុខហ៊ុច បានឈ្នះកីឡាករទួរគីក្នុងទឹកទី១ ខណៈកីឡាករស៊ុយអែត Ammon Decker ឈ្នះកីឡាករម្ចាស់ផ្ទះថៃក្នុងទឹកទី២ដែរ។ ដូច្នេះ សុខហ៊ុចត្រូវជួប Decker វគ្គផ្តាច់ព្រ័ត្រ។ ការប្រកួតវគ្គផ្តាច់ព្រ័ត្របានប្រព្រឹត្តទៅ៣ទឹក ប៉ុន្តែអ្នកទាំងបញ្ចប់ដោយលទ្ធផលស្មើគ្នា ហើយបន្ថែម១ទឹកទៀតពោលគឺទឹកទី៤។ ការប្រកួតកាត់សេចក្តីទឹកទី៤ ចៅក្រមបានកាត់សេចក្តីឲ្យអ្នកលេងរន្ទះជើងកម្ពុជាឈ្នះដោយពិន្ទុដើម្បីក្លាយជាម្ចាស់ខ្សែក្រវាត់តែម្តង។

ប្រាក់រង្វាន់

ក្នុងនាមម្ចាស់ខ្សែក្រវាត់មារ៉ាតុនកម្រិតប្រាក់ មឿន សុខហ៊ុចទទួលបានប្រាក់រង្វាន់២០ម៉ឺនបាត(ប្រហែលជា៥៧៧០ដុល្លារអាមេរិក)។ នេះប្រាក់រង្វាន់ច្រើនគួរសមដែរសម្រាប់កីឡាករកម្ពុជា និងប្រចាំព្រឹត្តិការណ៍ Max Muay Thai។