ស៊ន សៀវម៉ី ជឿថា អូឡាំពិកនៅជប៉ុន ៤ឆ្នាំក្រោយអាចបានមេដាយជូនកម្ពុជា
- 2016-09-05 13:10:06
- ចំនួនមតិ 0 | ចំនួនចែករំលែក 0
ស៊ន សៀវម៉ី ជឿថា អូឡាំពិកនៅជប៉ុន ៤ឆ្នាំក្រោយអាចបានមេដាយជូនកម្ពុជា
ចន្លោះមិនឃើញ
កីឡាការិនីតេក្វាន់ដូជម្រើសជាតិកម្ពុជា ស៊ន សៀវម៉ី មានជំនឿចិត្តថា នឹងអាចដណ្ដើមបានមេដាយជូនកម្ពុជាក្នុងព្រឹត្តិការណ៍អូឡាំពិក ៤ឆ្នាំក្រោយនៅប្រទេសជប៉ុននាឆ្នាំ២០២០។
គម្រោងចង់បញ្ចប់អាជីពជាកីឡាការិនីតេក្វាន់ដូរបស់ ស៊ន សៀវម៉ី ត្រូវបានផ្លាស់ប្ដូរ បន្ទាប់ពីធ្វើមិនបានល្អក្នុងការចូលរួមលើកទី១ក្នុងព្រឹត្តិការណ៍អូឡាំពិកនៅប្រេស៊ីល ។ ការបរាជ័យរបស់កីឡាការិនី ស៊ន សៀវម៉ី បានធ្វើឲ្យរូបកញ្ញាផ្ទាល់ និងក្រុមអ្នកគាំទ្រនៅកម្ពុជាមានការខកចិត្ត។
ស៊ន សៀវម៉ី បានឲ្យដឹងថា ការគាំទ្ររបស់ប្រជាពលរដ្ឋ និងរាជរដ្ឋាភិបាលពិសេសគឺថ្នាក់ដឹកនាំទទួលដំណើរក្រុមកីឡាករ-កីឡាការិនី មកពីប្រទេសប្រេស៊ីលបានធ្វើឲ្យអារម្មណ៍របស់កញ្ញាត្រូវតែចូលរួមម្ដងទៀត។ មិនត្រឹមតែប៉ុណ្ណោះការចូលរួមលើកទី២ នា៤ឆ្នាំក្រោយកញ្ញាអះអាងថា នឹងធ្វើឲ្យបានល្អជាងលើកទី១ ហើយធ្វើយ៉ាងណាដណ្ដើមមេដាយជួនកម្ពុជាពីព្រឹត្តិការណ៍អូឡាំពិកនេះ។
ប្អូនស្រីបង្កើត ស៊ន ដាវិន រូបនេះបន្ថែមថា គម្រោងចង់ចូលនិវត្តន៍ពីអាជីពមួយនេះ ដោយសារមុនចេញទៅប្រកួតគិតថា អាចយកបានមេដាយជូនជាតិ។ ប៉ុន្តែលទ្ធផលផ្ទុយស្រលះធ្វើឲ្យ សៀវម៉ី ចង់ចូលរួមម្ដងទៀត ដោយកំណត់គោលដៅខ្ពស់ជួយជាតិយកមេដាយលើកក្រោយទៀត។
ជាមួយគ្នានោះឯកឧត្ដម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា ធ្លាប់បានលើកឡើងផងដែរថា កម្ពុជាចូលរួមប្រកួតព្រឹត្តិការណ៍អូឡាំពិកនៅប្រេស៊ីលលើកនេះ មិនបានកំណត់គោលដៅដណ្ដើមមេដាយនោះទេ។ ប៉ុន្តែនៅឆ្នាំ២០២០ ដែលជប៉ុនធ្វើម្ចាស់ផ្ទះរៀបចំព្រឹត្តិការណ៍នេះ កម្ពុជា បានកំណត់រួចហើយថា ធ្វើយ៉ាងណាដណ្ដើមមេដាយឲ្យបាន ទោះត្រឹមមេដាយសំរឹទ្ធគឺជាជោគជ័យមួយផងដែរ។
កម្ពុជាមិនបានដណ្ដើមបានមេដាយក្នុងព្រឹត្តិការណ៍កីឡាអូឡាំពិកនៅប្រទេសប្រេស៊ីលឆ្នាំ២០១៦ នេះទេ។ កីឡាការិនីតេក្វាន់ដូជម្រើសជាតិកម្ពុជា ស៊ន សៀវម៉ី ធ្លាក់ត្រឹមវគ្គជម្រុះជុំទី១ ក្រោយថ្វីជើងកីឡាការិនីហុល្លង់៕
អត្ថបទ៖ ស្រី សុវណ្ណដារ៉ា