ម្ចាស់ផលិតកម្ម ប្រតិកម្មធ្ងន់ៗទៅលើបុគ្គលថារឿង "ចន្ទ្រា" បានពិន្ទុ ២/៥

2016-09-14 17:20:54
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីពេលថ្មីៗនេះនៅលើបណ្ដាញសង្គមផ្សេងៗ ក៏ដូចជាអ្នកលេងអ៊ីនធឺណិតបានចែករំលែកគ្នាពីមួយទៅមួយពាក់ព័ន្ធទៅនឹងព័ត៌មានដែលបុគ្គលជនជាតិថៃមួយរូបដែលតាំងខ្លួនជាអ្នកវិភាគកុនដោយវិភាគថារឿង"ចន្ទ្រា" ដែលកំពុងមានការចាប់អារម្មណ៍នោះពិន្ទុសម្រាប់សាច់រឿងនេះតែ ២/៥ ប៉ុណ្ណោះ ខណៈពេលនេះ ម្ចាស់ផលិតរឿងខាងលើ ប្រតិកម្មធ្ងន់ៗ។

ដើមឡើយ កាលដែលរឿងកើតឡើងកាន់តែវែងឆ្ងាយ គឺដោយសារមាន Page ហ្វេសប៊ុក របស់កម្ពុជាមួយបកប្រែអត្ថន័យទាំងស្រុងពីភាសាថៃមកភាសាខ្មែរទើបធ្វើឲ្យមានការចែករំលែកជាច្រើនលើបណ្ដាញសង្គម ហ្វេសប៊ុក។ លោក ប៉ុល វិបូ ដែលជាម្ចាស់ផលិតកម្ម អង្គរ ភីកឈ័រ បានឲ្យដឹងថា លោក និងក្រុមការងារទាំងមូលពិតជាមិនយល់ចំពោះ Page ហ្វេសប៊ុក កម្ពុជាមួយដែលបានបកប្រែភាសាថៃមកខ្មែរព្រោះអ្នកដែលសរសេរជាភាសាថៃដែលតាំងខ្លួនជាអ្នកវិភាគកុននោះគ្រាន់តែជាបុគ្គលគ្មានប្រភពមួយច្បាស់ប៉ុណ្ណោះ។

(លោក ប៉ុល វិបូ ម្ចាស់ផលិតកម្ម អង្គរ ភីកឈ័រ)

"Account ម្នាក់ជនជាតិថៃ ដែលតាំងខ្លួនជាអ្នកវិភាគកុនហ្នឹង បើតាមខ្ញុំមើលមានចំនួន Like តិចតួចបំផុត ឬអាចថា Fake account ក៏ថាបាន ចុះហេតុអី Page ខ្មែរមួយហ្នឹងរកឃើញ គាត់ធ្វើហ្នឹងមានន័យដូចម្ដេច បើជនជាតិដទៃជាន់យើងហើយចុះម្ចាស់ Page ដែលបកប្រែហ្នឹងជនជាតិអីបានមកបង្អាប់រឿងយើងដែរ?” លោក ថ្លែង។

លោក បន្តទៀតថា រឿងខ្មែរសម័យនេះ មិនទាន់មានរឿងច្រើននោះទេដែលអាចនាំចេញទៅបរទេសបាន ហើយសម្រាប់រឿង "ចន្ទ្រា" នេះមិនមែនតែបញ្ចាំងនៅខ្មែរនោះទេ។ "បើរឿងហ្នឹងកាត់តភ្លាវ សួរថាខាងបរទេសគេ ទិញទៅហើយមើលមិនកើតគ្មានអ្នកមើល គេព្រមទេ? ម្នាក់ជនជាតិថៃតាំងខ្លួនជាអ្នកវិភាគកុនដើរតែវិភាគឲ្យតែផ្ដាស សូម្បីតែរឿង “Godzilla” របស់ហូលីវូដក៏ឲ្យពិន្ទុរហូតដល់ ២/១០"ដែរ"។

ម្ចាស់ផលិតកម្មបានបន្ថែមទៀតថា លោកនិងប្រធាននាយកដ្ឋានភាពយន្ត លោក ស៊ិន ច័ន្ទសាយ៉ា ចង់ជួបម្ចាស់ Page ដែលបានបកប្រែនោះណាស់ ហើយសួរគាត់ថាមានបំណងអីឲ្យប្រាកដចំពោះភាពយន្តខ្មែរ ព្រោះបើតាមការស្រាវជ្រាវលមើលម្ចាស់ Page នោះមិនមានវត្តមាននៅលើទឹកដីកម្ពុជានោះទេ សព្វថ្ងៃកំពុងរស់នៅប្រទេសឡាវឯណោះ។

បើទោះ មានការវិភាគពីទំព័រហ្វេសប៊ុកថៃមួយ ដែលភាគីខាងភាពយន្ត យល់ថា យកជាការមិនបាន ប៉ុន្តែរឿង "ចន្ទ្រា" ដែលបានចាក់បញ្ចាំងនៅក្នុងស្រុកកាលពីថ្ងៃទី ០៨ កញ្ញា នោះ បច្ចុប្បន្នកំពុងដំណើរការយ៉ាងល្អ។ ព័ត៌មានទទួលបានពីរោងភាពយន្ត បញ្ចេញដោយលោក ប៉ុល វិបូ ហៅ នីត បញ្ជាក់ថា ត្រឹម៤ថ្ងៃប៉ុណ្ណោះ "ចន្ទ្រា" រកចំណូលបាន៧ម៉ឺនដុល្លារឯណោះ ។ចំនួននេះ លោកថា ច្រើនជាងជិតពាក់កណ្ដាល បើធៀបនឹងស្នាដៃទី១របស់លោករឿង "ស្បែកគង់" ក្នុងរយៈពេលចាក់បញ្ចាំងដូចគ្នា៕

អត្ថបទ៖ SAMEDY