ជិត១ម៉ឺននាក់ត្រៀមការពារសន្តិសុខបុណ្យអុំទូកឆ្នាំនេះ

2014-11-03 22:21:28
ចំនួនមតិ 0 | ចំនួនចែករំលែក 0

ចន្លោះមិនឃើញ

យ៉ាងហោចកម្លាំងសមត្ថកិច្ច ចម្រុះជិត១ម៉ឺននាក់ ត្រូវបានដាក់ពង្រាយ ដើម្បីរក្សាសន្តិសុខ-សណ្តាប់ធ្នាប់ ក្នុងឱកាសព្រះរាជពិធីបុណ្យអុំទូក ដែលនឹងចាប់ផ្តើមពីថ្ងៃទី៥ ដល់ ៧ ខែវិច្ឆិកា នេះ។

លោក ឡុង ឌីម៉ង់ អ្នកនាំពាក្យសាលារាជធានីភ្នំពេញបានប្រាប់ Sabay ថា ដើម្បីការពារសន្តិសុខ សណ្តាប់ធ្នាប់សាលារាជធានីភ្នំពេញ នឹងដាក់ពង្រាយសមត្ថកិច្ចចម្រុះជិត១ម៉ឺននាក់ នៅតាមគោលដៅផេ្សងៗគ្នា រួមទៅនឹងផែនការច្បាស់លាស់មួយ ដោយផ្អែកលើបទពិសោធន៍ ដែលធ្លាប់ឆ្លងកាត់នាពេលកន្លងមក។ "បុណ្យអុំទូកបីថ្ងៃនេះនឹងមានប្រជាពលរដ្ឋមិនក្រោម២លាននាក់ទេ សម្រុកមករាជធានីភ្នំពេញ។ដូច្នេះ យើងបានរៀបចំផែនការច្បាស់លាស់រួចហើយ ដើម្បីការពារសន្តិសុខសណ្តាប់ធ្នាប់”។ លោក ឡុង ឌីម៉ង់ បន្ថែម។

ព្រះរាជពិធីបុណ្យអុំទូកឆ្នាំនេះត្រូវបានរៀបចំឡើង បន្ទាប់ពីបានខកខាន ៣ ឆ្នាំកន្លងមក។ ព្រឹត្តិការណ៍នៅស្ពានពេជ្រ ដែលបានបណ្តាលឲ្យមនុស្សស្លាប់ជាង ៣០០ នាក់ស្លាប់ជាការចងចាំ និងជាបទពិសោធន៍ ដែលសមត្ថកិច្ចត្រូវការពារឲ្យម៉ឺងម៉ាត់ជាទីបំផុត៕