“មីងនីនំគមឆ្ងាញ់” អ្នកស្រុកទ្រាំង ល្បីដល់ស្រុកបារាំង

2016-09-24 23:02:50
ចំនួនមតិ 0 | ចំនួនចែករំលែក 0

ចន្លោះមិនឃើញ

នំគមរបស់ “មីងនី” ប្រជាពលរដ្ឋរស់នៅស្រុកទ្រាំងខេត្តតាកែវ មានការសរសើរមានរសជាតិឆ្ងាញ់ប្លែក រហូតល្បីដល់ស្រុកបារាំង។

ជួបក្រុមការងារ "ផ្លូវទៅស្រុក" ដែលបានធ្វើដំណើរទៅភូមិគោកអំពៅ ឃុំស្រង៉ែ ស្រុកទ្រាំង ខេត្តតាកែវ ស្រ្តីដែលអ្នកភូមិស្គាល់ឈ្មោះថា "មីងនី" បានបង្ហើបពីអាថ៌កំបាំងដែលធ្វើនំគមស្រុកទ្រាំងឆ្ងាញ់ល្បីរហូតដល់ពលរដ្ឋខ្មែរនៅស្រុកបារាំងថា ហេតុដែលធ្វើឲ្យនំគមរបស់អ្នកស្រីទទួលបានការគាំទ្រច្រើន ដោយសាររសជាតិឆ្ងាញ់ និងភាពស្អាតដោយមិនលាយឡំ ឬបន្ថែមសារធាតុគីមី។

អ្នកស្រីថា នំគមដែលអ្នកស្រីធ្វើ ជ្រើសរើសយកតែអង្ករដំណើបសុទ្ធល្អ។ ដោយឡែកស្ករស ឬស្ករត្នោតវិញ ជ្រើសរើសយកតែស្ករថ្មីទើបធ្វើឲ្យនំមានរសជាតិទាក់ចិត្តអ្នកញ៉ាំ។

នំគមដែលដែលស្រ្តីរូបនេះធ្វើ មានពីរប្រភេទ គឺស្នូលផ្អែម និងស្នូលប្រៃ។ នំស្នូលផ្អែម ប្រើស្ករស ឬស្ករត្នោតលាយជាមួយដូងចាស់ល្មម (កុំយកទុំពេក) ល្ងរ និងដំណាប់ត្រឡាចតិចៗផង។ ចំណែកនំស្នូលប្រៃវិញ ប្រើសណ្តែកខៀវដោយកិនឲ្យម៉ត់ និងត្រាំអោយរីករយៈពេល ២ ម៉ោង ទើបស្រង់ទុកអោយស្ងួតល្អ។ បន្ទាប់មកយកសាច់ជ្រូកចិញ្ច្រាំលាយជាមួយបង្គា រួចឆាបញ្ចូលគ្នាជាមួយស្លឹកខ្ទឹមអោយឆ្អិន ដើម្បីបង្កើនរសជាតិ។

ស្រ្តីវ័យជាង ៣០ ឆ្នាំបន្តថា ការធ្វើនំគមរបស់អ្នកស្រី ក្រៅពីគិតគូរលើរសជាតិ ការវេចខ្ចប់ក៏គិតសំខាន់លើសុខភាពអ្នកទទួលទានដែរ ដោយខ្ចប់ស្លឹកចេកសុទ្ធ។

នំគមរបស់ស្រ្តីនៅខេត្តតាកែវរូបនេះ ក្រៅពីមានការពេញនិយមពីបងប្អូនខ្មែរនៅបារាំង ពលរដ្ឋមកពីបណ្តាខេត្ត និងរាជធានីភ្នំពេញ ក៏ទទួលស្គាល់ស្នាដៃធ្វើនំគមគាត់ថាមានរសជាតិឆ្ងាញ់ដែរ។

ក្នុងរដូវភ្ជុំឆ្នាំនេះ បើតាមស្រ្តីរូបនេះអះអាងថា មានការបញ្ជាទិញច្រើន ខ្លះទូរសព្ទប្រាប់បងប្អូនផ្ញើទិញ ហើយម្នាក់ៗ កុម្ម៉ង់មិនតិចជាង ៦០០នំទេ ដែលភាគច្រើនអ្នកភ្នំពេញ និងខ្លះទៀតនៅបរទេសដូចជាបារាំងអីជាដើម។

ចំពោះតម្លៃវិញស្រ្តីរូបនេះបញ្ជាក់ថា នំមួយថ្លៃ ៥០០ រៀល បើទិញច្រើនមានការបញ្ចុះទៅតាមហ្នឹង។

អត្ថបទៈ ជិន វេន