Ice Park Skating School ចែកវិញ្ញាបនបត្រដល់សិស្សអាហារូបករណ៍៦១នាក់ ត្រីមាសទី៣
- 2016-09-26 20:54:57
- ចំនួនមតិ 0 | ចំនួនចែករំលែក 0
Ice Park Skating School ចែកវិញ្ញាបនបត្រដល់សិស្សអាហារូបករណ៍៦១នាក់ ត្រីមាសទី៣
ចន្លោះមិនឃើញ
សាលាបង្រៀនជិះស្គីទឹកកក (Ice Park Cambodia) បានចែកវិញ្ញាបនបត្រដល់សិស្សអាហារូបករណ៍ឆ្នាំ២០១៦ ចំនួន ៦១ នាក់ អាយុពី៦ឆ្នាំ ដល់១២ឆ្នាំ ដែលបានបញ្ចប់ត្រីមាសទី៣ និងទទួលបានជោគជ័យនៃជំនាញជិះស្គីទឹកកក កាលពីថ្ងៃទី២៣ កញ្ញា នៅទីលាន Ice Park Cambodia ជាន់ទី៤ ផ្សារទំនើបអ៊ីអន។
សិស្សទាំងអស់បានទទួលវិញ្ញាបនបត្រទៅតាមកម្រិតធ្វើតេស្ដរបស់ពួកគេ ហើយត្រឹមត្រីមាសទី៣ នេះ Ice Park Cambodia បានហ្វឹកហាត់សិស្សជោគជ័យដល់កម្រិតចំនួន៤៖ កម្រិត១៖ Pre-Alpha ចំនួន ៥ នាក់ (ស្រី២នាក់) កម្រិត២៖ Alpha ចំនួន២២នាក់ (ស្រី១៧នាក់) កម្រិត៣៖ Beta ចំនួន១៩នាក់ (ស្រី១០នាក់) កម្រិត៤៖ Gamma ចំនួន១៥នាក់ (ស្រី១០នាក់) ។
អាហារូបករណ៍សម្រាប់ឆ្នាំ២០១៦ នេះ នឹងបន្តត្រីមាសទី៤ នៅថ្ងៃទី២៦ កញ្ញា និងចប់ទាំងស្រុងត្រឹមត្រីមាសទី៤ នៅថ្ងៃទី១៦ ធ្នូ ២០១៦។
អាហារូបករណ៍ថ្មីឆ្នាំ២០១៧ នឹងរៀបចំហ្វឹកហាត់នៅថ្ងៃទី២ មករា ២០១៧។ អាហារូបករណ៍ថ្មីនេះ នឹងផ្តល់ជូនសិស្សអាយុចាប់ពី ៥ ឆ្នាំ ដល់ ១៧ ឆ្នាំ ខុសគ្នាកាលពីឆ្នាំមុន ដោយសហព័ន្ធសង្ឃឹមថា កូរ៉េខាងត្បូងនឹងមានកម្មវិធីហ្វឹកហាត់ដល់កីឡាករវ័យក្មេងចាប់ពីអាយុ១៣ ដល់១៧ឆ្នាំ ដូចកាលពីដើមឆ្នាំ២០១៦។ សហព័ន្ធស្គីទឹកកកកម្ពុជា នឹងកំណត់ចំនួនត្រឹមតែ៥០នាក់ដំបូងសម្រាប់ត្រីមាសទី១ ព្រោះនៅមានសិស្សអាហារូបករណ៍ចាស់ដែលត្រូវនៅបន្តហ្វឹកហាត់បន្ថែម។ សហព័ន្ធស្គីទឹកកកកម្ពុជានឹងប្រមូលអត្តពលិកថ្នាលដែលមានជំនាញខ្ពស់ជាងគេ មកហ្វឹកហាត់ដាច់ដោយឡែក ហើយសហព័ន្ធសង្ឃឹមថាកីឡាករថ្នាលនឹងអាចវិវត្ត និងមានសមត្ថភាពពេញលេញ ដើម្បីឆ្ពោះទៅកាន់ស៊ីហ្គេម២០២៣បាន។
សហព័ន្ធនឹងរង់ចាំមើលលទ្ធផលអាហារូបករណ៍ឆ្នាំ២០១៧ នៃរបាយការណ៍ត្រីមាសទី១ ថាតើមានការរីកចំរើនដល់កម្រិតណា ហើយសម្រាប់ត្រីមាសទី២ សហព័ន្ធស្គីទឹកកកកម្ពុជានឹងបើកទទួលសិស្សបន្ថែមទៀតដោយយោងលើលទ្ធផលនៃត្រីមាសទី១។
ការចុះឈ្មោះសិស្សអាហារូបករណ៍ឆ្នាំ២០១៧ នឹងធ្វើឡើងនៅថ្ងៃទី៤ តុលា ២០១៦ ហើយផុតកំណត់នៅថ្ងៃទី៣១ តុលា ២០១៦។
ដោយឡែក សិស្សដែលទទួលបានវិញ្ញាបនបត្រពេលនេះ នឹងចូលរួមប្រកួតជាមិត្តភាព នៅថ្ងៃទី២៥ វិច្ឆិកា ២០១៦ វេលាម៉ោង ២ រសៀល ដល់ម៉ោង ៦ ល្ងាច នៅទីលាន Ice Park Cambodia ជាន់ទី៤ ផ្សារទំនើបអ៊ី អន។ ការផុតកំណត់ទទួលពាក្យនៅថ្ងៃទី៣១ តុលា ២០១៦។
ទន្ទឹមនឹងការទទួលពាក្យចូលប្រកួតនេះ Ice Park Cambodia ក៏បើកការទទួលពាក្យសម្រាប់ចូលរួមប្រកួតក្នុងកម្មវិធី Skate Bangkok នៅថៃ ផងដែរ ដែលកម្មវិធីនេះនឹងប្រព្រឹត្តទៅនៅថ្ងៃទី៨ ដល់១១ ធ្នូ ២០១៦។ ហើយបន្ទាប់ពីការវិលត្រលប់មកកម្ពុជាវិញ Ice Park Cambodia នឹងមានកម្មវិធីពិសេសមួយទៀតមានរយៈពេល២ថ្ងៃជាប់គ្នា គឺកម្មវិធី Christmas Show 2016 ដែលនឹងប្រព្រឹត្តទៅនៅថ្ងៃទី២៤-២៥ ធ្នូ ២០១៦ នៅទីលាន Ice Park Cambodia ៕
អត្ថបទ៖ ដៃគូសហការ