កុមារីអាយុទើប៤ឆ្នាំ អាចនិយាយ ៧ភាសា មិនគួរឲ្យជឿ

2016-10-20 22:39:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្មេងស្រីវ័យទើប ៤ឆ្នាំ មកពីទីក្រុងមូស្គូ ប្រទេសរុស្ស៊ី អាចនិយាយបានដល់ទៅ ៧ភាសា កំពុងធ្វើឲ្យគ្រប់គ្នាភ្ញាក់ផ្អើលកោតសរសើរយ៉ាងខ្លាំង។

ក្មេងស្រីនេះមានឈ្មោះ Angelina Bella Devyatkina អាចនិយាយ ភាសារុស្ស៊ី អង់គ្លេស បារាំង អាល្លឺម៉ង់ អេស្ប៉ាញ ចិន អារ៉ាប បានយ៉ាងល្អក្រោមក្រសែភ្នែកទស្សនិកជនរាប់រយនាក់។ នាងទទួលភាពល្បីល្បាញខ្លាំង បន្ទាប់ពីបានបង្ហាញសមត្ថភាពនិយាយទាំង ៧ភាសានៅក្នុងកម្មវិធី "មនុស្សអស្ចារ្យ ឬ Amazing People” លើកញ្ចក់ទូរទស្សន៍រុស្ស៊ីកាលពីប៉ុន្មានថ្ងៃថ្មីៗនេះ។

ក្នុងការបង្ហាញសមត្ថភាព Bella ត្រូវឆ្លងកាត់តេស្តឆ្លើយឆ្លងសំនួរពីមនុស្ស៧នាក់ ដែលចេះភាសាទាំង៧ ម្នាក់ម្ដងៗ រហូតធ្វើឲ្យគណៈកម្មការ និងទស្សនិកជនភ្ញាក់ផ្អើលបើកភ្នែកធំៗ។

បើតាមម្ដាយរបស់ Bella ជាគ្រូបង្រៀន ប្រាប់សារព័ត៌មានរុស្ស៊ី WeirdRussia ថា អ្នកស្រីបានបង្ហាត់ភាសាទាំងនេះដល់កូនគាត់តាំងពីនាងចេះនិយាយតិចៗមកម្ល៉េះ។ អ្នកស្រីបានជួលអ្នកមើលថែក្មេង មានសញ្ជាតិខុសៗគ្នា ដើម្បីបន្សាំភាសាទាំង៧ ដល់នាង។

មកទល់ពេលនេះ Bella កំពុងស្ថិតនៅជួរមុខក្នុងការប្រកួតប្រជែងជាមួយបេក្ខជនផ្សេងទៀត ដើម្បីក្លាយជាម្ចាស់ពានឈ្នះទឹកប្រាក់ប្រមាណ ១៦០០០ដុល្លារអាមេរិក៕