“KFCAlwaysOriginal” រកឃើញម្ចាស់ជយលាភីប្រកួតវីដេអូ ភ្ជាប់ជាមួយសារអភិរក្សវប្បធម៌ខ្មែរ

2016-10-25 18:01:20
ចំនួនមតិ 0 | ចំនួនចែករំលែក 0

ចន្លោះមិនឃើញ

យុទ្ធនាការ ”KFCAlwaysOriginal” ត្រូវបានបិទបញ្ចប់កាលពីថ្ងៃសៅរ៍ ទី២៣ តុលានេះ នៅផ្សារទំនើបអ៊ីអន Lively Plaza ដោយរកឃើញម្ចាស់ជយលាភីចំនួន៥រូបដែលជ្រើសរើសចេញពីបេក្ខជន៤០រូបដែលបានដាក់ប្រកួតវីដេអូខ្លីស្ដីពីការផ្សព្វផ្សាយវប្បធម៌ខ្មែររយៈពេលកន្លងមកនេះ។

បេក្ខជនទាំង៤០រូបដែលបានចូលរួមប្រកួតបានបង្ហាញពីប្រធានបទផ្សេងៗគ្នា ដូចជា អាហារខ្មែរ សិល្បៈ ម៉ូដសម្លៀកបំពាក់ខ្មែរ តន្ត្រី និងឧបករណ៍តន្ត្រីខ្មែរ ពិធីបុណ្យខ្មែរ ។ល។ ក្រៅពីនេះ ក៏នៅមានការដាក់ប្រកួតស្នាដៃចម្រៀង Original និងកំណាព្យថ្មីៗផងដែរ។ គ្រប់ស្នាដៃវីដេអូទាំងនេះសុទ្ធតែបង្កប់សារអប់រំដល់ការអភិរក្សវប្បធម៌ និងប្រពៃណីដែលជាអត្តសញ្ញាណជាតិខ្មែរយ៉ាងពិតប្រាកដ។ តាមឱ្យដឹងពីគណៈវិនិច្ឆ័យដែលមានសមាសភាពពី KFC និង Hybrid Advertising បានរកឃើញភាពមិនប្រក្រតីមួយចំនួនក្នុងអំឡុងពេលនៃការដាក់ប្រកួតវីដេអូនេះ គឺមានវីដេអូខ្លះប្រើបច្ចេកទេសទទួលបាន Like ដោយស្វ័យប្រវត្តិ ដែលត្រង់នេះគឺជាភាពមិនយុត្តិធម៌ចំពោះបេក្ខជនផ្សេងទៀត។ ដូច្នេះទើបគណៈវិនិច្ឆ័យបានបង្កើតលក្ខខណ្ឌថ្មីដែលវាយតម្លៃទៅលើ៧ចំណុច រួមមាន ប្រធាន ខ្លឹមសារ ដំណើរសាច់រឿង គុណភាពនៃការកាត់វីដេអូ ពន្លឺ សំឡេង និងសម្ភារៈប្រើប្រាស់ពាក់ព័ន្ធសាច់រឿង។

វីដេអូជយលាភីលេខ១ដែលមានចំណងជើងថា “ខ្ញុំស្រឡាញ់ភាសាខ្មែរ“ ជាស្នាដៃរបស់ ហ៊ត់ ថុនាបានបង្ហាញអំពីតម្លៃនៃភាសាខ្មែរដែលជាអត្តសញ្ញាណជាតិដ៏សំខាន់បំផុតមួយ។ នៅក្នុងខ្សែវីដេអូដ៏ទាក់ទាញនេះ ហ៊ត់ ថុនា បានទាញចំណាប់អារម្មណ៍អ្នកទស្សនាជុំវិញបញ្ហាដែលយុវជនខ្មែរបោះបង់លែងប្រើអក្សរខ្មែរដើម្បីភាពងាយស្រួលរបស់ពួកគេ ដោយអនុវត្ត “ខ្មែររ៉ូម៉ាំងនីយកម្ម” (ការប្រើតួអក្សរអង់គ្លេសកត់សូរខ្មែរ) នៅក្នុងបណ្ដាញសង្គម និងកម្មវិធីឌីជីថលផ្សេងៗទៀត។ ការលើកឡើងនេះបានបង្ហាញថា បើសិនយុវជនបច្ចុប្បន្នមិនព្យាយាមរក្សា ឬអភិរក្សអក្សរសាស្ត្រខ្មែរទេ គេនឹងមិនអាចរក្សាភាសាជាតិឱ្យគង់វង្ស សម្រាប់មនុស្សជំនាន់ក្រោយបានឡើយ ហើយអត្តសញ្ញាណខ្មែរក៏ត្រូវបាត់បង់ផងដែរ។ គណៈវិនិច្ឆ័យបានសម្រេចជាឯកច្ឆន្ទ ក្នុងការជ្រើសរើសវីដេអូមួយនេះជាវីដេអូជយលាភី ដោយផ្ដល់ពិន្ទុខ្ពស់ជាងគេទាំងសាច់រឿង និងគុណភាពវីដេអូ។ លោក Y.B Cheah នាយកគ្រប់គ្រងទូទៅរបស់ KFC ខេមបូឌា បានមានប្រសាសន៍ថា “វីដេអូរបស់ ហ៊ត់ ថុនា ជាស្នាដៃដែលល្អជាងគេក្នុងចំណោមស្នាដៃដែលបង្ហាញអំពីមរតកដើមរបស់កម្ពុជា និងជានិមិត្តរូបដ៏មានតម្លៃតំណាងឱ្យជំនឿចិត្តរបស់ KFC ដែលតែងតែបង្ហាញពីភាពពិត និងលើកទឹកចិត្ត ក៏ដូចជាលើកតម្លៃមនុស្សយើងម្នាក់ៗ ព្រមទាំងទទួលស្គាល់អំពីជំនាញផ្សេងៗគ្នារបស់មនុស្សយើងម្នាក់ៗថែមទៀតផង។ ខ្ញុំសូមថ្លែងអំណរគុណដល់អ្នកទាំងអស់គ្នាដែលបានខិតខំប្រឹងប្រែងចែករំលែកភាពច្នៃប្រឌិត និងពេលវេលាដើម្បីធ្វើឱ្យគំនិតរបស់ខ្លួនលេចជារូបរាងឡើង។ សរុបជារួម ស្នាដៃទាំងអស់សុទ្ធតែមានខ្លឹមសារអប់រំល្អ ដើម្បីបង្ហាញពីការអភិរក្សវប្បធម៌ខ្មែរ ហើយយើងពិតជាមានសេចក្ដីសោមនស្សរីករាយជាខ្លាំងដែលបានរំលេចបង្ហាញពីស្មារតីអត្តសញ្ញាណជាតិនេះឡើងសម្រាប់យុវជនយើង។”

ចំពោះជយលាភីទាំង៥រូប ជយលាភីលេខ១ ទទួលបានទូរសព្ទ iPhone7 មួយគ្រឿង ចំណែកលេខ២ដល់លេខ៥ ទទួលបានទូរសព្ទ iPhone 6s Plus ម្នាក់មួយគ្រឿង។ ឈ្មោះនិងស្នាដៃនៃជយលាភីទាំង៥រួមមាន ជយលាភីលេខ១ លោក ហ៊ត់ ថុនា "ខ្ញុំស្រលាញ់អក្សរខ្មែរ”។ លេខ២ កញ្ញា កេន សុធីតា "រនាតឯក”។ លេខ៣ លោក ឯក សាម៉ឺឌី "របៀបចងក្បិនសម្រាប់គុនល្បុក្កតោខ្មែរ”។ លេខ៤ លោក សេង គីមហាន "របៀបធ្វើសម្លកកូរខ្មែរ”។ លេខ៥ លោក អ៊ុក ពិសិដ្ឋ "ស្មូតកំណាព្យខ្មែរបទពាក្យ៧”។ កម្មវិធីប្រកាសលទ្ធផល និងបិទយុទ្ធនាការ #KFCAlwaysOriginal មានការចូលរួមសំដែងពីតារាចម្រៀង ក្មេងខ្មែរ អ្នកនាងរុន ស៊ីរ៉ា លោកដួង សុខគា និងកញ្ញាសារីតាដែលជាពិធីករ និងពិធីការិនី។ ក្នុងព្រឹត្តិការណ៍នេះ ក៏មានកម្មវិធីកម្សាន្តជាច្រើនទៀតដូចជា ហ្គេមបង្វិលកងយករង្វាន់ និងការចាប់ឆ្នោតយកកាដូពិសេស “ពិសាអាហារ KFC មួយឆ្នាំដោយឥតគិតថ្លៃ” ចំនួន៥រង្វាន់៕