ហ្វីលីពីន ដាក់ចេញយុទ្ធសាស្ត្រថ្មីក្នុងសង្គ្រាមគ្រឿងញៀន
- 2016-10-25 18:59:36
- ចំនួនមតិ 0 | ចំនួនចែករំលែក 0
ហ្វីលីពីន ដាក់ចេញយុទ្ធសាស្ត្រថ្មីក្នុងសង្គ្រាមគ្រឿងញៀន
ចន្លោះមិនឃើញ
ប៉ូលិសហ្វីលីពីនបានសម្រេចដាក់ចេញផែនការថ្មីក្នុងការធ្វើសង្គ្រាមប្រឆាំងគ្រឿងញៀន ដើម្បីកាត់បន្ថយការសម្លាប់ជនសង្ស័យក្រៅប្រព័ន្ធតុលាការ រួចងាកទៅរកចាប់ខ្លួនក្រុមមនុស្សសំខាន់ៗនៅពីក្រោយការធ្វើជំនួញខុសច្បាប់នេះវិញ។
គម្រោងនេះមានឈ្មោះថា Double Barrel Alpha នឹងរឹតបន្តឹងខ្លាំងជាងមុនដោយផ្ដោតសំខាន់ទៅលើក្រុមអ្នកមានអំណាច និងបុគ្គលល្បីៗដូចជា អ្នកនយោបាយ កងទ័ព ប៉ូលិស មន្ត្រីរដ្ឋាភិបាល និងតារានានា ដែលពាក់ព័ន្ធនឹងជំនួញអាភៀន។
គម្រោងថ្មីនឹងត្រូវលើកយកមកពិភាក្សានៅថ្ងៃអង្គារនេះក្នុងកិច្ចប្រជុំមួយរវាងមេប៉ូលិសមកពី ១៨តំបន់ នៅទីស្នាក់ការកណ្ដាលប៉ូលិសហ្វីលីពីន Camp Crame ស្ថិតនៅភាគខាងជើងរដ្ឋធានីម៉ានីល។ ឯប្រតិបត្តិការនឹងចាប់ផ្ដើមធ្វើសកម្មភាពក្នុងថ្ងៃប្រជុំតែម្ដង។ នេះបើតាមអ្នកនាំពាក្យស្នងការប៉ូលិស Dionardo Carlos បញ្ជាក់ប្រាប់ Reuters ។
ការបើកកិច្ចប្រជុំ កើតមានឡើងបន្ទាប់ពីប្រភពលម្អិតមួយបានចាត់ទុកការពិភាក្សាក្នុងចំណោមមន្ត្រីអនុវត្តច្បាប់ គឺជារឿងសំខាន់ពាក់ព័ន្ធនឹងការសម្លាប់ជនសង្ស័យគ្រឿងញៀន។
បន្ថែមលើនេះ ការបោះឆ្នោតថ្មីមួយ បានសម្ដែងការមិនពេញចិត្តចំពោះយុទ្ធនាការប្រឆាំងគ្រឿងញៀនរបស់ប្រធានាធិបតី Duterte ដោយ ៩៤% ឆ្លើយថាវាមានសារៈសំខាន់ខ្លាំងណាស់ក្នុងការទុកជនសង្ស័យឲ្យនៅរស់៕
ប្រែសម្រួល៖ ឡេង ភារុណ ផ្ដល់សិទ្ធិដោយ៖ Reuters