អ្នកធ្វើដំណើរឆ្លងកាត់ប៉ៃលិន តែងបួងសួងបារមីយាយ យ៉ាត

2016-10-28 15:50:54
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកធ្វើដំណើរស្ទើរគ្រប់គ្នា ដែលបានឆ្លងកាត់ខេត្តប៉ៃលិន រមែងសំចតនៅភ្នំយ៉ាត ដើម្បីចុះទៅបួងសួងរូបសំណាកយាយ យ៉ាត ដូចអ្នកដំណើរទៅខេត្តព្រះសីហនុ ឬ ខេត្តកោះកុង តែងឈប់យានជំនិះ ហើយទៅបួងសួង លោកយាយ ម៉ៅ នៅភ្នំពេជ្រនិល ដូច្នេះដែរ។

លោកយាយម្នាក់ជាឆ្មាំនៅក្នុងព្រះវិហារធំ លើភ្នំយ៉ាត បានប្រាប់ក្រុមការងារ "ផ្លូវទៅស្រុក"ថា យាយ យ៉ាតមានបារីខ្លាំងណាស់ ដោយមនុស្សជាច្រើនបានមកបួងសួង តែងតែសម្រេចដូចសេចក្ដីប្រាថ្នា ដោយខ្លះសុំរកស៊ីមានបាន និង ខ្លះសុំកូន ខ្លះសុំលក់ដី ធ្លី ហើយសម្រេចរមែងមកលាបំណន់វិញ បើពុំដូច្នេះទេ អ្នកសុំបានសម្រេចមិនបានលាបំណន់រមែងឈឺក្បាល វិលមុខ ឬ រលត់រលាយនូវទ្រព្យដែលបានវិញក៏មាន។

លោកយាយ បានរៀបរាប់ទៀតថា រៀងរាល់ថ្ងៃចុងសប្ដាហ៍ ឬ ថ្ងៃបុណ្យទាន ភ្ញៀវទេសចរក្ដី អ្នកធ្វើដំណើរឆ្លងកាត់ខេត្តប៉ៃលិនក្ដី តែងតែមកឈប់បន់ស្រន់ ដោយសារតែមានជំនឿលើបារមីរបស់លោកយាយ។

គួរបញ្ជាក់ថា រូបសំណាកយាយ យ៉ាត ស្ថិតនៅលើ ភ្នំយ៉ាតមានទីតាំងស្ថិតនៅក្នុងក្រុងប៉ៃលិន ខាងស្តាំដៃ តាមបណ្ដោយផ្លូវលេខ៥៧ ។ ភ្នំយ៉ាតជាវត្តចាស់សាងសង់ឡើងជារបៀបវត្តកូឡា៕

សូមទស្សនារូបភាពខាងក្រោមនេះ