MAYBANK PREMIER WEALTH បង្កើតឡើងដើម្បីជំរុញសេវាកម្មគ្រប់គ្រងមូលធនតាមប្រព័ន្ធធនាគារ

2016-10-28 23:54:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ធនាគារ មេយប៊ែង (Maybank) កម្ពុជា រៀបចំសិក្ខាសាលារយៈពេល ២ ថ្ងៃ អំពី "ការគ្រប់គ្រងទ្រព្យសម្បត្តិ" ដែលមានការចូលរួមធ្វើបទបង្ហាញដោយអ្នកឯកទេសផ្នែកហិរញ្ញវត្ថុប្រចាំតំបន់អំពីតិចនិកក្នុងការវិនិយោគ ក៏ដូចជាចំណេះដឹងក្នុងការការពារទ្រព្យសម្បត្តិរបស់អ្នក ដែលនឹងត្រូវបង្ហាញដោយដៃគូសហការសេវាកម្មធានារ៉ាប់រង (Bancassurance) របស់ធនាគារ មេយប៊ែង គឺក្រុមហ៊ុន មេនូឡាយហ្វ៍ កម្ពុជា។

សិក្ខាសាលានេះ ត្រូវបើកជូនឲ្យសាធារណជនចូលរួមដោយសេរី ដោយចាប់ផ្ដើមនៅថ្ងៃនេះ នៅអាគារ មេយប៊ែង ថៅវើ ដែលមានទីតាំងនៅតាមបណ្ដោយមហាវិថីព្រះនរោត្តម។

លោកស្រី ស៊ីនត្សៀ លីវ នាយិកាប្រតិបត្តិនៃធនាគារ មេយប៊ែង កម្ពុជា ថ្លែងថា៖ "ការរៀបចំសិក្ខាសាលានេះគឺមានគោលបំណងចម្បងពង្រឹងគោលការណ៍របស់ធនាគារ មេយប៊ែង ក្នុងការផ្ដល់ជូនដល់អតិថិជនPremier Wealth របស់ខ្លួននូវដំណោះស្រាយផ្នែកហិរញ្ញវត្ថុ ដែលមានលក្ខណៈឯកជន និងទូលំទូលាយ រួមជាមួយនឹងសេវាកម្មប្រឹក្សាអំពីការថែរក្សា និងការពារលើទ្រព្យសម្បត្តិរបស់ពួកគេ។

លោកស្រីបន្ថែមថា៖ "សិក្ខាសាលានេះនឹងផ្ដល់ការណែនាំដល់សិក្ខាកាមដែលបានចូលរួមអំពីឱកាសនៃការវិនិយោគ ក្រៅពីការវិនិយោគលើអចលនវត្ថុដែលប្រជាជនកម្ពុជាភាគច្រើនបានដឹងរួចជាស្រេចទៅហើយនោះ ហើយនឹងមានសិក្ខាសាលាផ្សេងៗទៀតដែលនឹងចាប់ផ្ដើមបង្កើតឡើងក្នុងការបណ្ដុះបណ្ដាលដល់អតិថិជនរបស់ធនាគារ មេយប៊ែង ដែលមានចំណាប់អារម្មណ៍ក្នុងការស្វែងយល់ពីជម្រើសវិនិយោគផ្សេងៗទៀតដែលមាននៅក្នុងទីផ្សារសកល"។

លោកស្រីថា ធនាគារ មេយប៊ែង កម្ពុជា មានលទ្ធភាពផ្ដល់ជូនអតិថិជនរបស់ខ្លួនលើវិសាលភាពនៃការយល់ដឹងពីសេវាកម្មហិរញ្ញវត្ថុរបស់សម្ព័ន្ធធនាគារ មេយប៊ែង។ "យើងនឹងធ្វើឲ្យប្រាកដថា អតិថិជនរបស់យើងនឹងមានឱកាសបណ្ដាក់ទុនជាមួយនឹងធនាគារ ឬអាចប្រឹក្សាយោបល់ពីអ្នកឯកទេសអំពីតម្រូវការផ្នែកហិរញ្ញវត្ថុរបស់ពួកគេ"។

ធនាគារ មេយប៊ែង មានផ្ដល់ជូនដំណោះស្រាយផ្នែកហិរញ្ញវត្ថុលើការគ្រប់គ្រងទ្រព្យសម្បត្តិ ដែលមានក្នុងបណ្ដាញសម្ព័ន្ធធនាគារ មេយប៊ែង ទាំងមូល ដែលអនុញ្ញាតឲ្យអតិថិជនធ្វើការជ្រើសរើស និងទទួលបានអត្ថប្រយោជន៍ពីមធ្យោបាយ ឬឱកាសវិនិយោគសមស្របណាមួយ ដែលផ្ដល់ជូនដោយអ្នកជំនាញនៅបណ្ដាប្រទេសផ្សេងៗដែលធនាគារ មេយប៊ែង មានវត្តមាន។

ក្នុងចំណោមសេវាកម្មផ្សេងៗទៀតដែលនឹងត្រូវលើកយកមកធ្វើបទបង្ហាញក្នុងសិក្ខាសាលា គឺសេវាកម្មជួញដូរភាគហ៊ុនតាមប្រព័ន្ធអេឡិចត្រូនិករបស់ Maybank Kim Eng សិង្ហបុរី ដែលហៅកាត់ថា KE Trade។ Maybank Kim Eng គឺជាធនាគារវិនិយោគដែលជាកម្មសិទ្ធិពេញលេញរបស់ធនាគារ មេយប៊ែង ជាមួយនឹងបណ្ដាញនៅក្នុង ១១ប្រទេស និងមានប្រមាណជាង ៨០សាខា។ ទម្រង់នៃការវិនិយោគនេះអនុញ្ញាតឲ្យអតិថិជនស្វែងយល់ ឬធ្វើប្រតិបត្តិការក្នុងទីផ្សារ ជួញដូរ សកលលោក និងផ្ដល់សម្រង់តម្លៃជាក់ស្ដែងសម្រាប់ទីផ្សារភាគហ៊ុនក្នុងតំបន់ ដូចជា ផ្សារភាគហ៊ុនប្រទេសសិង្ហបុរី (SGX) ទីក្រុងហុងកុង (HKEX) ប្រទេសម៉ាឡេស៊ី (BursaMalaysia) ប្រទេសថៃ (SET) និងសហរដ្ឋអាមេរិក (NYSE, NASDAQនិង NYSE Arca)។

តាមរយៈប្រសាសន៍របស់លោកស្រី ស៊ីនត្សៀ លីវ បានលើកឡើងផងដែរថា៖ "អតិថិជន ចាប់ផ្ដើមធ្វើការគ្រប់គ្រងទ្រព្យសម្បត្តិរបស់ខ្លួនកាន់តែមានច្រើនឡើង តាមរយៈការសិក្សាស្រាវជ្រាវ និងវិភាគដោយខ្លួនឯងក្នុងការធ្វើការជួញដូរតាមប្រព័ន្ធអេឡិចត្រូនិក និងទូរសព្ទដៃ។ ទម្រង់នៃការវិនិយោគ និងកម្មវិធីទាំងអស់នេះ បានផ្ដល់នូវវិធីសាស្ត្រជាច្រើនដែលអាចជួយអតិថិជនក្នុងការពិនិត្យ និងតាមដានផលប័ត្ររបស់ពួកគេ ហើយក្នុងចំណោមទម្រង់នៃការវិនិយោគ និងកម្មវិធីទាំងអស់នោះក៏មានប្រព័ន្ធ KE Trade នេះផងដែរ។ កម្មវិធីជួញដូរតាមប្រព័ន្ធទូរសព្ទ KE Trade ដែលត្រូវបានទទួលស្គាល់ថាជាប្រព័ន្ធជួញដូរតាមទូរសព្ទដែលប្រសើរជាងគេបង្អស់ក្នុងរយៈពេល ៥ ឆ្នាំជាប់ៗគ្នា គឺជាកម្មវិធីដែលមានភាពងាយស្រួលក្នុងការប្រើប្រាស់សម្រាប់អ្នកវិនិយោគដែលមានបំណងគ្រប់គ្រងការវិនិយោគរបស់ពួកគេតាមរយៈទូរសព្ទដៃ ឬកុំព្យូទ័រ គ្រប់ពេលវេលា និងគ្រប់ទីកន្លែង"។

លោកស្រី ស៊ីនត្សៀ លីវ បានបន្តថា សិក្ខាសាលាស្ដីពីការគ្រប់គ្រងទ្រព្យសម្បត្តិ ផ្សេងៗទៀតនឹងត្រូវរៀបចំឡើងសម្រាប់អតិថិជនទាំងឡាយណាដែលចង់ធ្វើការគ្រប់គ្រងទ្រព្យសម្បត្តិរបស់ពួកគេ ហើយសិក្ខាសាលាទាំងនេះនឹងអាចជាវេទិកាមួយសម្រាប់អតិថិជនសិក្សាអំពីជម្រើសវិនិយោគផ្សេងៗ។

លោកស្រីបានបន្ថែមថា៖ "អតិថិជនគួរតែចាប់ផ្ដើមសិក្សា និងរៀបចំគម្រោងសម្រាប់ការគ្រប់គ្រងលើទ្រព្យសម្បត្តិឲ្យបានឆាប់រហ័ស នៅពេលដែលពួកគេចាប់ផ្ដើមធ្វើការ។ វាមិនឆាប់ពេកទេក្នុង ការរៀបចំគម្រោងចូលនិវត្តន៍របស់អ្នក ឬសម្រាប់ពេលមានបញ្ហានោះ"។

លោកស្រីបានបន្ថែមថា រាល់ការវិនិយោគតែងតែភ្ជាប់មកជាមួយនូវហានិភ័យនៃការបាត់បង់មូលធន ហើយអតិថិជនគប្បីស្វែងយល់ពីហានិភ័យរបស់ខ្លួន បរិយាកាសនៃការវិនិយោគតម្រូវការនៃលំហូរសាច់ប្រាក់ មុននឹងសម្រេចចិត្តធ្វើការវិនិយោគរយៈពេលវែង។

"នៅធនាគារ មេយប៊ែង កម្ពុជា យើងមានបុគ្គលិកដែលមានជំនាញដែលបានឆ្លងកាត់ការប្រឡងលក្ខណៈផ្លូវការនៅសិង្ហបុរី ដើម្បីជួយអតិថិជនក្នុងការស្វែងយល់ពីហានិភ័យរបស់ខ្លួន និងពន្យល់អតិថិជនពីហានិភ័យនានាពាក់ព័ន្ធនឹងការវិនិយោគទៅលើសេវាកម្ម ឬផលិតផលណាមួយ ដូច្នេះហើយ អតិថិជនអាចសម្រេចចិត្តបានត្រឹមត្រូវ នៅពេលជ្រើសរើសក្នុងការវិនិយោគទៅលើផលិតផលណាមួយ"។ នេះជាការលើកឡើងរបស់លោកស្រី ស៊ីនត្សៀ។

លោកស្រី ស៊ីនត្សៀ ថា ធនាគារ មេយប៊ែង កម្ពុជា នៅតែបន្តស្វែងរក និងផ្ដល់ជូនអតិថិជនរបស់ខ្លួននូវផលិតផល និងសេវាកម្មដែលអាចជួយឲ្យអតិថិជនបង្កើនទ្រព្យសម្បត្តិរបស់ពួកគាត់ និងពង្រឹងទំនាក់ទំនងបច្ចុប្បន្នជាមួយអតិថិជនឲ្យកាន់តែស៊ីជម្រៅថែមទៀត។ ក្នុងចំណោមធនាគារមួយចំនួនតូចដែលមានសមត្ថភាពក្នុងការផ្ដល់ជូនការគ្រប់គ្រងទ្រព្យសម្បត្តិ ធនាគារ មេយប៊ែង មានគោលបំណងក្នុងការជួយលើកតម្កើងការយល់ដឹងពីផលិតផល និងសេវាកម្មវិនិយោគសម្រាប់សហគមន៍៕