មតិជុំវិញការប្រើទូរសព្ទស៊ីមមួយ និងស៊ីមពីរ
- 2016-11-15 08:55:58
- ចំនួនមតិ 0 | ចំនួនចែករំលែក 0
មតិជុំវិញការប្រើទូរសព្ទស៊ីមមួយ និងស៊ីមពីរ
ចន្លោះមិនឃើញ
បច្ចុប្បន្នគេសង្កេតឃើញថា ចរាចរណ៍ទូរស័ព្ទនៅកម្ពុជាកាន់តែមានភាពសម្បូរបែប ហើយក៏កំពុងតែប្រកួតប្រជែងគ្នានៅលើទីផ្សារយ៉ាងខ្លាំងដែរ។ លំហូរទូរស័ព្ទបែបនេះ បានធ្វើឲ្យអ្នកប្រើប្រាស់ជ្រើសរើសដោយសេរី។ តាមសភាពជាក់ស្ដែង អ្នកខ្លះប្រើទូរស័ព្ទបីបួន តែអ្នកខ្លះប្រើទូរស័ព្ទតែមួយ តែស៊ីមពីរបីរ និងពេលខ្លះរហូតដល់ស៊ីមបួនក៏មាន។ តើទូរស័ព្ទស៊ីមច្រើន និងស៊ីមមួយ ណាមួយគេចូលចិត្តប្រើជាង? ហេតុអ្វី?
កំពុងអង្គុយពិភាក្សាគ្នាជាមួយមិត្តភ័ក្ដិអំពីមេរៀនក្រោយចប់ម៉ោងសិក្សា កញ្ញា រ៉ាវីនងាកមុខមកនិយាយជាមួយ Sabay ថា រវាងទូរស័ព្ទប្រើ SIM មួយនិងប្រើ SIM ច្រើនកញ្ញាគិតថាទូរស័ព្ទប្រើ SIM មួយល្អជាង។ តាមសម្ដីនេះ មានន័យថា កញ្ញា ចូលចិត្តប្រើទូរស័ព្ទស៊ីមមួយជាងទូរស័ព្ទស៊ីមច្រើន។
និស្សិតកំពុងសិក្សាបីមហាវិទ្យាល័យរូបនេះលើកឡើងអំពីមូលហេតុថា ទោះបីជាជាទូរស័ព្ទ SIM ច្រើនមានអត្ថប្រយោជន៍ដាក់បាន SIM ច្រើនប៉ុន្តែបើពិនិត្យលើគុណភាពគឺចាញ់ទូរស័ព្ទប្រើបាន SIM មួយដាច់។ “ទូរស័ព្ទប្រើ SIM ច្រើនសំឡេងនិយាយលឺខ្សាវៗ ប្រើអត់បានយូរទេ”។
បច្ចុប្បន្ននៅលើទីផ្សារ ប្រភេទទូរស័ព្ទដែលអាចប្រើប្រាស់ SIM ច្រើនមានការវាយលុកខ្លាំងសម្រាប់បំពេញតម្រូវការរបស់អតិថិជន។ “បើឱ្យខ្ញុំរើស ខ្ញុំរើសយកទូរស័ព្ទប្រើ SIM ច្រើនហើយ ព្រោះអីចំណេញច្រើន”។ នេះបើតាមការគូសបញ្ជាក់របស់និស្សិតផ្នែកសេដ្ឋកិច្ចនៅមហាវិទ្យាល័យធនធានមនុស្ស គឺលោកចាន់។ និស្សិតរូបនេះ និយាយទៀតថា ទូរស័ព្ទ SIM ច្រើនតម្លៃថោក ហើយអាចប្រើប្រាស់បាន SIM ច្រើនទៀត។
ស្របជាមួយគំនិតរបស់និស្សិតសិក្សាបីមហាវិទ្យាល័យកញ្ញា រ៉ាវីន បុគ្គលិកនៅក្រុមហ៊ុនឯកជនមួយ លោក ចាន់រ៉ា ឲ្យដឹងថា តាមបទពិសោធន៍ធ្លាប់ប្រើកន្លងទៅទូរស័ព្ទដែលប្រើបាន SIMច្រើននោះកាន់ថ្មមិនបានយូរទេ។ “ខ្ញុំប្ដូរថ្មអស់ ២ ហើយតាំងពីប្រើមក…”។
ទោះបីជាកំពុងអង្គុយលក់ដាច់បន្តិចមែនប៉ុន្តែកញ្ញា ផា ម្ចាស់ហាងលក់ទូរស័ព្ទមួយកន្លែងនៅផ្សារទំនើបសូរិយាមិនបដិសេធនឹងការឆ្លើយឆ្លងជាមួយអ្នកយកព័ត៌មានSabay ទេ។ ម្ចាស់ហាងរូបនេះរៀបរាប់ថា បច្ចុប្បន្នមិនថាយុវវ័យ ឬមនុស្សចាស់ទេភាគច្រើនគេនិយមប្រើទូរស័ព្ទប្រើSIMច្រើន ព្រោះសមត្ថភាពរបស់វាមិនចាញ់ទូរស័ព្ទម៉ូដែលទំនើបប៉ុន្មានទេ។
“ឥឡូវលក់ដាច់ជាងមុន ព្រោះអីគេនិយមប្រើតែទូរស័ព្ទ SIM ច្រើន…ទូរស័ព្ទ SIM ច្រើនអាចស្ដាប់ចម្រៀង មើលវីដេអូបានទៀត ហើយប្រើបានយូរទៀត”។
អតីតប្រធានផ្នែកទំនាក់ទំនងរបស់ក្រុមហ៊ុនNokia ប្រចាំកម្ពុជាលោកអ៊ី សុគន្ធមានប្រសាសន៍ថា គេមិនអាចវាយតម្លៃថាទូរស័ព្ទប្រភេទណាល្អជាងមួយណាទេ កត្តានេះគឺអាស្រ័យលើអ្នកប្រើប្រាស់ទេ ព្រោះថាប្រសិនបើគេចំណាយលុយទៅទិញហើយ មានន័យថាវាល្អសម្រាប់គេហើយ។
ទាក់ទងទៅនឹងគុណសម្បត្តិយ៉ាងណានោះ លោក អ៊ី សុគន្ធ បន្ថែមថា ទូរស័ព្ទប្រើ SIM ច្រើនអាចកាត់បន្ថយការប្រើប្រាស់ទូរស័ព្ទច្រើន ពិសេសគឺថវិកាតែម្ដង ប៉ុន្តែបើយើងរើសយកទូរស័ព្ទប្រើ SIM មួយគឺមានគុណភាពអាចប្រើបានយូរ។
តាមការសង្កេតមើលឃើញរវាងទូរស័ព្ទប្រើស៊ីមច្រើន និងទូរស័ព្ទប្រើស៊ីមមួយអាចនិយាយបានថាសុទ្ធតែមានគុណសម្បត្តិ និងគុណវិបត្តិផ្សេងៗគ្នា។ នេះគឺអាស្រ័យលើអ្នកប្រើប្រាស់ខ្លួន ថាតើគេគួរចំណាយទឹកប្រាក់បែបណាក្នុងការទទួលបានទូរស័ព្ទមួយណាដែលផ្ដល់អត្ថប្រយោជន៍ដល់គេ។
ចុះចំណែកមិត្តយុវវ័យដែលមិនបានជួបសម្ភាសន៍ផ្ដល់មតិយោបល់ផ្ទាល់វិញនោះ យល់យ៉ាងណាដែរ?
អត្ថបទ៖ វណ្ណថេត
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
