ដុងគំនូរតាំងពីក្មេង ក្លាយជាអ្នកឌីហ្សាញបានចំណូលជិតពាន់ដុល្លារ

2016-11-17 02:52:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ដោយសារតែមានចំណូលចិត្តគូរគំនូរតាំងពីក្មេង ទើបជំរុញយុវតី វត្តី សម្រេចចាប់ជំនាញឌីហ្សាញ ដោយបានចំណូលជិតខ្ទង់ពាន់ដុល្លារក្នុងមួយខែ។

វត្តីថា ការគូររូបជាចំណូលចិត្តដែលខ្លួនចូលចិត្តបំផុតតាំងពីក្មេង រហូតធ្លាប់ទទួលបានរង្វាន់ពីរដងសម្រាប់ការប្រឡងគំនូរធ្វើឡើងនៅថៃនិងជប៉ុន។

ព្រោះតែមានដុងតាំងពីក្មេងបែបនេះ ទើបជំរុញឲ្យ វត្តីចាប់យកជំនាញ Web និង Graphic Design នៅវិទ្យាស្ថានស៊ីតិក។ រយៈពេល ៣ឆ្នាំចាប់អាជីពជាអ្នកឌីហ្សាញ វត្តីថា ជួបរឿងលំបាកគួរសម ពិសេសគឺពេលនិយាយជាមួយភ្ញៀវ។

កាលពីប៉ុន្មានឆ្នាំមុនដែលទើបចាប់ផ្ដើមការងារដំបូង យុវតីវ័យ ២៣ ឆ្នាំ រូបនេះស្ទើរសម្រេចចិត្តបោះបង់ចោលជំនាញឌីហ្សាញនេះ ដោយសារការងារនេះធ្វើតម្រូវតែចិត្តអតិថិជន ទាំងខ្លួនឯងមិនពេញចិត្តនឹងធ្វើទាល់តែសោះ។ ប៉ុន្តែដោយសារវាជាជំនាញខ្លួនប្រាថ្នា និងដោយការអត់ទ្រាំរឿងលំបាកៗក្នុងការងារជាច្រើនឆ្នាំមកនេះ ទើបវត្តីយល់ពីសាច់ការរាក់ជ្រៅក្នុងការដោះស្រាយជាមួយអតិថិជន។

“កាលចាប់ផ្ដើមប្រឡូកការងារឌីហ្សាញដំបូង នៅរៀងស្ទើរៗទេបង មិនទាន់យល់សាច់ការអីច្រើន។ ពិបាកបំផុត គឺពេលភ្ញៀវបញ្ជាឲ្យធ្វើនេះធ្វើនោះ សឹងតែទ្រាំមិនបានរត់ចោលការងារ ព្រោះខ្លួនឯងមិនពេញចិត្តសោះ។

បច្ចុប្បន្នវត្តីកំពុងបម្រើការងារក្នុងក្រុមហ៊ុនឯកជនមួយជាអ្នកឌីហ្សាញ ដោយពេលខ្លះនៅដល់ដាច់យប់ជ្រៅ ដើម្បីបង្ហើយការងារឲ្យទាន់ពេលកំណត់។ ចំពោះគម្រោងឌីហ្សាញ កញ្ញាតែងទទួលធ្វើឥតដាច់ ទាំងនៅក្រុមហ៊ុននិងផ្ទាល់ខ្លួន។

“រឿងដាច់យប់ដូចញយដងដែរបង ដោយសារពេលទាំងការងារផ្ទាល់ខ្លួននិងនៅក្រុមហ៊ុនរវល់ខ្លាំង ត្រូវបន្ទាន់ឲ្យរួចរាល់ទាន់ពេល អ៊ីចឹងបង្ខំអត់ដេកដល់ម៉ោងពីរយប់។

ជាអ្នកឌីហ្សាញ វត្តីថាពិតជាធ្វើឲ្យកញ្ញាសប្បាយចិត្ត ព្រោះមានមនុស្សជាច្រើនឃើញសមិទ្ធផលកើតចេញពីស្នាដៃរចនារបស់ខ្លួន ហើយកាន់តែមានមោទនភាពពេលឮការសរសើរពីមនុស្សនៅជុំវិញលើអ្វីដែលខ្លួនបានផលិតឡើង។

ទាក់ទិននឹងការឌីហ្សាញវត្តីថា ត្រូវមានគោលការណ៍ផ្ទាល់ខ្លួន ដោយត្រូវសិក្សាស្រាវជ្រាវ ឲ្យបានស៊ីជម្រៅអំពីប្រធានបទដែលត្រូវរចនា ដើម្បីស្គាល់ និងយល់ដឹងអំពីវាឲ្យកាន់តែច្បាស់លាស់។ ម្យ៉ាងទៀតត្រូវយល់ពីតម្រូវការ គំនិត គោលដៅ និងបំណងរបស់អតិថិជន ឲ្យបានច្បាស់លាស់សិន មុននឹងចាប់ផ្តើមរចនា។ លើសពីនេះត្រូវព្យាយាមឲ្យអស់លទ្ធភាពរួមបញ្ចូល សិល្បៈវប្បធម៌ជាតិ ក្នុងការរចនា ហើយណែនាំ ព្រឹក្សា និងផ្តល់យោបល់បន្ថែម លើចំណុចល្អនានា ដែលអតិថិជនមិនបានគិតដល់។

ធ្វើជាអ្នកឌីហ្សាញវត្តីថា ត្រូវចេះឧស្សាហ៍វិភាគនិងស្វែងរក (Brainstorm) គំនិតថ្មី និងបើកចិត្តទទួលយករាល់ការរិះគន់កែលម្អ ដើម្បីអភិវឌ្ឍខ្លួនកាន់តែប្រសើរទៅថ្ងៃមុខ៕

អត្ថបទ៖ ផាន់និត