គម្រោងលំនៅឋាន សម្រាប់មន្ត្រីរាជការ មានចំណូលទាប និងមធ្យម បង់ត្រឹម៨០ដុល្លារ ក្នុង១ខែ ចាប់ផ្ដើមសាងសង់

2017-01-08 04:38:49
ចំនួនមតិ 0 | ចំនួនចែករំលែក 0

ចន្លោះមិនឃើញ

គម្រោងលំនៅឋាន សាធារណៈ មានតម្លៃសមរម្យ សម្រាប់គ្រួសារមន្ត្រីរាជការ កងកម្លាំងប្រដាប់អាវុធ មន្ត្រីចូលនិវត្តន៍ និងជនពិការ មានចំណូលទាប និងមធ្យម ដែលបង់រំលោះត្រឹម ១ខែ ៨០ដុល្លារ និងក្នុងរយៈពេល ២០ឆ្នាំ បានចាប់ផ្ដើម បើកការដ្ឋានសាងសាង់ ។

ក្នុងពិធីសម្ពោធបើកការដ្ឋាន សាងសង់គម្រោងផ្ទះល្វែងនេះ នៅថ្ងៃទី៧ ខែមករា ឆ្នាំ២០១៧ ស្ថិតនៅក្នុងភូមិកោះគរ ឃុំរកាខ្ពស់ ស្រុកស្អាង ខេត្តកណ្ដាល លោកឧកញ៉ា សៀ រិទ្ធី អគ្គនាយកក្រុមហ៊ុន វើលដ៍ប្រ៊ិដឡែន ខូ អីលធីឌី បានលើកឡើងថា គម្រោងសាងសង់ លំនៅដ្ឋានវគ្គទី១នេះ ខ្ទង់ចំណាយ របស់ក្រុមហ៊ុនប្រមាណជិត ៦០លានដុល្លារ ហើយក្រុមហ៊ុន ក៏គ្រោងបន្តគម្រោងនេះទៀត នៅទីតាំងជុំវិញទីរាជធានីភ្នំពេញ ។

លោកឧកញ៉ា បានបន្តថា “តាមពិតគម្រោងនេះ មានការពិភាក្សារវាងក្រុមហ៊ុន និងរាជរដ្ឋាភិបាល ជាអទិភាពយើងនឹងផ្ដល់ការលក់នេះ ទៅមន្ត្រីរដ្ឋាភិបាលមុន ប៉ុន្តែទន្ទឹមនឹងនេះ យើងក៏មានចំណែកខ្លះ នឹងលក់ឲ្យប្រជាពលរដ្ឋ ដែលមានចំណូលទាប និងមធ្យមដូចគ្នា មិនមែនថាយើងលក់ផ្ដាច់មុខ ឲ្យមន្ត្រីរាជការ គឺមិនមែនទេ” ។

ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា បានមានប្រសាសន៍ថា ផ្ទះដែលចាប់ផ្ដើម សាងសង់នេះមិនមែន ធ្វើឲ្យចេះតែបាន ធ្វើខ្វះគុណភាព តំបន់នៃការអភិវឌ្ឍគម្រោង គិតតែពីផ្ទះជាប់គ្នារហូត ដូចសម្បុកចាបនោះ គឺមិនមែនទេ គឺមានផ្លូវហេដ្ឋា រចនាសម្ព័ន្ធស្រប មានសួនច្បារ មានសាលារៀន និងមន្ទីរពេទ្យជាដើម ព្រោះផ្ទះនេះធ្វើជាលក្ខណៈសហគមន៍ ។

លោកបានបន្តថា “ខ្ញុំក៏ទទួលបានរួមចំណែក នៅក្នុងការការពារបរិស្ថាន និងការប្រែប្រួលអាកាសធាតុ ឲ្យមានផ្ទៃបៃតងនេះ ៥,១ភាគរយយ៉ាងតិច មានទុកទីធ្លា មានទីសាធារណៈ ដើម្បីជួបជុំគ្នានៅក្នុងតំបន់នេះ នេះជាគោលបំណងរបស់យើង” ។ លោកទេសរដ្ឋមន្ត្រី ជា សុផារ៉ា បានសង្កត់ធ្ងន់ថា ការលក់គម្រោងនេះ មិនត្រូវមានបក្ខពួក និយមនោះទេ ។

សូមបញ្ជាក់ថា ការបើកលក់ និងទទួលពាក្យស្នើសុំទិញ លំនៅឋានក្រុមហ៊ុន នឹងប្រកាសបើកលក់ ជាសាធារណៈ ក្នុងរយៈពេល២ ទៅ៣ខែខាងមុខ។ ទីតាំងរបស់គម្រោង តាមបណ្ដោយផ្លុវជាតិលេខ២១ ភូមិកោះគរ ឃុំរកាខ្ពស់ ស្រុកស្អាង ខេត្តកណ្ដាល ។ ចំនួនផ្ទះដែលត្រូវធ្វើ ការសាងសង់មាន ២២៩៧ ល្វែង ចែកជាពីរប្រភេទ ប្រភេទទី១, មានចំនួន២០២៥ខ្នង និងប្រភេទទី២, ទំហំ៨៤ ម៉ែត្រក្រឡា ចំនួន២៧២ខ្នង លើផ្ទៃដីសរុបចំនួន ២៤ ហិកតា ។

ប្រភេទផ្ទះ រួមមាន ទំហំ៤x១០.៥ម ទំហំផ្ទះ៤x៧ម កំម្ពស់២ជាន់ មានបន្ទប់គេង២ បន្ទប់ទឹក១ , ទំហំដី៦x១០.៥ម ទំហំផ្ទះ៦x៧ម កម្ពស់ពីរជាន់ មានបន្ទប់គេង៣ បន្ទប់ទឹក៣ , លំហរមុខផ្ទះ១.៥ម៉ែត្រ , លំហរក្រោយផ្ទះ ២ម៉ែត្រ៕

ប្រភព៖ DAP News