Pique អាចត្រូវពិន័យ ដោយសាររិះគន់អាជ្ញាកណ្ដាល ពេល Barca អត់ឈ្នះ

2017-01-10 03:23:47
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក Victoriano Sanchez Arminio ប្រធានគណៈកម្មាធិការបច្ចេកទេសអាជ្ញាកណ្ដាលរបស់បាល់ទាត់អេស្ប៉ាញ បានឲ្យដឹងលោកនឹងស៊ើបអង្កេតលើករណីខ្សែការពារ Gerard Pique របស់ក្រុម FC Barcelona ចំពោះសម្ដីរិះគន់អាជ្ញាកណ្ដាល សម្រាប់២ប្រកួតចុងក្រោយរបស់ក្រុមអ្នកមានបុណ្យ ដែលពុំបានទទួលជ័យជម្នះ។

Pique តវ៉ាអាជ្ញាកណ្តាល កាល Barca ស្មើ Villarreal

Barca បានចាញ់ Athletic Bilbao ២-១ នៅ Copa del Rey វគ្គ១៦ក្រុម ជើងទី១ និងស្មើ Villarreal ១-១ នៅ La Liga ដែលធ្វើឲ្យពួកគេមិនទាន់ស្គាល់ពាក្យថា "ឈ្នះ” ទេ សម្រាប់ឆ្នាំថ្មី២០១៧នេះ។ លទ្ធផលនេះ បានធ្វើឲ្យ Pique មិនសប្បាយចិត្តទេ ហើយកីឡាករជម្រើសជាតិអេស្ប៉ាញរូបនេះ បានរិះគន់អាជ្ញាកណ្ដាលថា ហាក់មានភាពលំអៀងចំពោះក្រុម Barca ដោយពួកគេគួរតែទទួលបានបាល់ចំណេញ១១ម៉ែត្រខ្លះ ហើយថែមទាំងដៀមដាមថា អាជ្ញាកណ្ដាលនៅអេស្ប៉ាញភាគច្រើន លំអៀងទៅក្រុម Real Madrid ទៀតផង។

លោក Arminio បានប្រាប់ដល់ទូរទស្សន៍ La Sexta ថា៖ "ចៅក្រមកំពុងពិនិត្យ និងកំពុងសម្រេចចិត្តករណីរបស់ Pique។ សម្រាប់ពាក្យសម្ដី ដែលប៉ះពាល់ដល់យើង...យើងនឹងផ្ញើលិខិតផ្លូវការទៅគណៈកម្មាធិការរៀបចំការប្រកួត”។

បើគេរកឃើញថា Pique ពិតជាបានរិះគន់ដល់អាជ្ញាកណ្ដាលមែន នោះខ្សែការពារកណ្ដាលរបស់ក្រុមអ្នកមានបុណ្យរូបនេះ នឹងត្រូវពិន័យឲ្យខកខានការប្រកួត ឬអាចពិន័យជាប្រាក់ទៀតផងដែរ៕

ប្រភព៖ Marca ប្រែសម្រួល៖ វិន ជីវ័ន្ត